‘ಸೈನಿಕ, ರೈತರಿಂದ ಜನರ ಜೀವನ ಪಾವನ’

ನರಗುಂದ: ‘ದೇಶದ ಜನರು ನಿರ್ಭಯದಿಂದ ಜೀವನ ನಡೆಸಲು ಸೈನಿಕರು ಹಾಗೂ ದೇಶದ ಬೆನ್ನೆಲುಬು ಆದ ರೈತರು ಪ್ರಮುಖ ಕಾರಣ ದೇಶದ ಸೈನಿಕರು ಮತ್ತು ರೈತರಿಂದ ಜನರ ಜೀವನ ಪಾವನವಾಗಿದೆ’ ಎಂದು ಧಾರವಾಡ ಮುರುಘಾಮಠದ ಮಲ್ಲಿಕಾರ್ಜುನ ಶ್ರೀ ಹೇಳಿದರು.

ತಾಲ್ಲೂಕಿನ ಕೊಣ್ಣೂರ ಗ್ರಾಮದಲ್ಲಿ ಬುಧವಾರ ರಾತ್ರಿ ಚರಮೂರ್ತೇಶ್ವರ ಮಠದ ಶಿವಾನಂದ ದೇವರ ಪಟ್ಟಾಧಿಕಾರದ ಮಹೋತ್ಸವದ ಅಂಗವಾಗಿ ನಡೆದ ಅಸಿ, ಕೃಷಿ, ಋಷಿ ಚಿಂತನ ಗೋಷ್ಠಿಯಲ್ಲಿ ಮಾತನಾಡಿದರು.

‘ನೆರೆ ರಾಷ್ಟ್ರಗಳು ದೇಶದ ಹಿತವನ್ನು ಬಯಸುತ್ತಿಲ್ಲ. ಇದರಿಂದ ಸೇನಾಪಡೆ ನಮ್ಮ ರಕ್ಷಣೆಗೆ ನಿಂತಿದೆ. ಅದೇರೀತಿ ರೈತರ ಜೀವನ ಪ್ರಕೃತಿ ವೈಪರೀತ್ಯದಿಂದ ಹಾಳಾಗುತ್ತಿದೆ. ಬೆಳೆಗಳಿಗೆ ಗೌರವ ಸಿಗುತ್ತಿಲ್ಲ. ಸರ್ಕಾರ, ಸಂಘ ಸಂಸ್ಥೆಗಳು ರೈತರ ಹಾಗೂ ಸೈನಿಕರ ಕುಟುಂಬಕ್ಕೆ ಆಸರೆಯಾಗಬೇಕು’ ಎಂದರು.

ಗದಗನ ತೋಂಟದ ಸಿದ್ದರಾಮ ಸ್ವಾಮೀಜಿ ಮಾತನಾಡಿ, ‘ರೈತರ ಕಷ್ಟಗಳಿಗೆ ಎಲ್ಲರೂ ಸ್ಪಂದಿಸಬೇಕಿದೆ. ರೈತರ ಕುಟುಂಬಕ್ಕೆ ಅಗತ್ಯವಿರುವ ಸೌಲಭ್ಯ ನೀಡಬೇಕು. ದೇಶದ ಸೈನಿಕರಿಗೆ ಎಲ್ಲರೂ ಗೌರವ ಸಲ್ಲಿಸಬೇಕು’ ಎಂದರು.

ಅವರಾದಿಯ ಫಲಹಾರೇಶ್ವರ ಸ್ವಾಮೀಜಿ ಮಾತನಾಡಿ, ಅಸಿ, ಕೃಷಿ, ಋಷಿಯ ಮಹತ್ವ ವಿವರಿಸಿ ದೇಶದ ಪ್ರಗತಿಯಲ್ಲಿ ಮೂರು ಜನರ ಪಾತ್ರ ಮುಖ್ಯ ಎಂದರು.

ಕಾರ್ಯಕ್ರಮ ಉದ್ಘಾಟಿಸಿದ ಮಹೇಶಗೌಡ ಪಾಟೀಲ ಮಾತನಾಡಿದರು. ಶಿರೋಳ ತೋಂಟದಾರ್ಯ ಮಠದ ಶಾಂತಲಿಂಗ ಸ್ವಾಮೀಜಿ, ನಾಗನೂರ ರುದ್ರಾಕ್ಷಿಮಠದ ಅಲ್ಲಮಪ್ರಭು ಸ್ವಾಮೀಜಿ, ಶಿವಕುಮಾರ ಶಿವಾಚಾರ್ಯರು ಹಾಗೂ ಗ್ರಾಮದ ಮುಖಂಡರು ಇದ್ದರು.
ಆರ್.ಬಿ. ಚಿನಿವಾಲರ ನಿರೂಪಿಸಿ, ವಂದಿಸಿದರು.