ಹಾಸನ: ಒಂದೇ ದಿನ 1013 ಮಂದಿ ಕೋವಿಡ್‌ನಿಂದ ಗುಣಮುಖ

ಹಾಸನ: ಜಿಲ್ಲೆಯಲ್ಲಿ ಕೋವಿಡ್ ಎರಡನೇ ಅಲೆ ಆರ್ಭಟದ ನಡುವೆಯೂ ಗುಣಮುಖರಾಗುವವರ ಸಂಖ್ಯೆಯಲ್ಲಿ ಅಲ್ಪ ಏರಿಕೆ ಕಂಡಿದೆ. ಒಂದೇ ದಿನ ಶನಿವಾರ 1013 ಮಂದಿ ಆರೋಗ್ಯದಲ್ಲಿ ಚೇತರಿಕೆಯಾಗಿ, ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ.

1288 ಪ್ರಕರಣಗಳು ಪತ್ತೆಯಾಗಿದ್ದು, ಚಿಕಿತ್ಸೆಗೆ ಸ್ಪಂದಿಸದೆ 15 ಮಂದಿ ಮೃತಪಟ್ಟಿದ್ದಾರೆ. ಕಾಯಿಲೆಗೆ ಈವರೆಗೆ ಅಸುನೀಗಿದವರ ಸಂಖ್ಯೆ 675.ಒಟ್ಟು ಸೋಂಕಿತರ ಸಂಖ್ಯೆ 51,871ಕ್ಕೆ ಏರಿಕೆಯಾಗಿದೆ. 13722 ಸಕ್ರಿಯ ಪ್ರಕರಣಗಳ ಪೈಕಿ 105 ಮಂದಿ ತೀವ್ರ ನಿಗಾ ಘಟಕಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಹೊಸದಾಗಿ ಆಲೂರು ತಾಲ್ಲೂಕಿನಲ್ಲಿ 16, ಅರಕಲಗೂಡು 88, ಅರಸೀಕೆರೆ 95, ಬೇಲೂರು 147, ಚನ್ನರಾಯಪಟ್ಟಣ 117, ಹಾಸನ 664, ಹೊಳೆನರಸೀಪುರ 66, ಸಕಲೇಶಪುರ 87, ಇತರೆ ಜಿಲ್ಲೆಯ 8 ಮಂದಿಗೆ ಸೋಂಕು ತಗುಲಿದೆ ಎಂದು ಜಿಲ್ಲಾ ಆರೋಗ್ಯಾಧಿಕಾರಿ ಕೆ.ಎಂ.ಸತೀಶ್ ಕುಮಾರ್‌ ತಿಳಿಸಿದರು.