ಹಾಸನ: ತ್ರಿವಳಿ ಮಕ್ಕಳಿಗೆ ಜನ್ಮ ನೀಡಿದ ಮಹಿಳೆ

ಹಾಸನ: ಜಿಲ್ಲೆಯ ಹೊಳೆನರಸೀಪುರ ತಾಲ್ಲೂಕಿನ ದೊಡ್ಡಕಾಡನೂರು ಗ್ರಾಮದ ಮಹಿಳೆಯೊಬ್ಬರು ಇಲ್ಲಿನ ಹಿಮ್ಸ್‌ ಆಸ್ಪತ್ರೆಯಲ್ಲಿ ಗುರುವಾರ ಒಂದು ಗಂಡು ಹಾಗೂ ಎರಡು ಹೆಣ್ಣು ಸೇರಿದಂತೆ ಮೂವರು ಮಕ್ಕಳಿಗೆ ಜನ್ಮ ನೀಡಿದ್ದಾರೆ.

ಹಿಮ್ಸ್ ಆಸ್ಪತ್ರೆಯಲ್ಲಿ ತಪಾಸಣೆಗೆ ಒಳಪಟ್ಟಿದ್ದ ಅವರಿಗೆ, ಅಲ್ಲಿನ ಸ್ತ್ರೀರೋಗ ತಜ್ಞೆ ಡಾ.ನ್ಯಾನ್ಸಿ ಪಾಲ್ ಮಾರ್ಗದರ್ಶನದಲ್ಲಿ ವೈದ್ಯರು, ಸಿಬ್ಬಂದಿಗಳು ಗುರುವಾರ ಬೆಳಿಗ್ಗೆ 11 ಗಂಟೆಗೆ ಶಸ್ತ್ರಚಿಕಿತ್ಸೆಯ ಮೂಲಕ ಹೆರಿಗೆ ಮಾಡಿಸಿದ್ದಾರೆ.

ಮೊದಲು ಜನಿಸಿದ ಗಂಡು ಮಗು 2.1 ಕೆ.ಜಿ. ತೂಕವಿದ್ದು, ಎರಡನೇ ಹೆಣ್ಣು ಮಗು 1.9 ಕೆ.ಜಿ., ಮತ್ತೊಂದು ಹೆಣ್ಣು ಮಗು 1.8 ಕೆ.ಜಿ. ತೂಕವಿದೆ. ಮೂರು ಶಿಶುಗಳಿಗೆ ಯಾವುದೇ ತೊಂದರೆ ಇಲ್ಲ ಎನ್ನುವುದು ದೃಢಪಟ್ಟಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

‘ಅಂಗವಿಕಲತೆ ಇಲ್ಲದೇ ಹುಟ್ಟಿರುವುದು ವಿಶೇಷ ಪ್ರಕರಣ. ಸಾಮಾನ್ಯವಾಗಿ 6 ರಿಂದ 6.30 ಕೆ.ಜಿ.ಯಷ್ಟು ತೂಕದ ಮಗುವನ್ನು ತಾಯಿ ಹೊರಬಲ್ಲಳು. ಆದರೆ ಈಗ ಜನಿಸಿರುವ ಮೂರು ಮಕ್ಕಳು ಸೇರಿ 8 ಕೆ.ಜಿ.ಗೂ ಹೆಚ್ಚು ಭಾರವನ್ನು ಹೊತ್ತಿರುವ ಮಹಿಳೆಗೆ ಸುರಕ್ಷಿತ ಹೆರಿಗೆ ಆಗಿರುವುದು ವಿಶೇಷ’ ಎಂದು ಡಾ.ನ್ಯಾನ್ಸಿ ತಿಳಿಸಿದರು.