ಬೇಲೂರು | ಶಾಸಕ ಸುರೇಶ್‌ಗೆ ಶಿವರಾಂ ಕಿರುಕುಳ: ಶೋಭಾ ಗಣೇಶ್ ಆರೋಪ

ಬೇಲೂರು: ಎಐಸಿಸಿ ಸದಸ್ಯ ಬಿ.ಶಿವರಾಂ ಹಿಂದೆ ವೈ.ಎನ್.ರುದ್ರೇಶಗೌಡರ ಕುಟುಂಬಕ್ಕೆ ಕಿರುಕುಳ ನೀಡಿ ರಾಜಕಾರಣ ಮಾಡಿದ್ದು, ಈಗ ಶಾಸಕ ಎಚ್.ಕೆ.ಸುರೇಶ್ ಅವರಿಗೆ ಕಿರುಕುಳ ನೀಡುತ್ತಿದ್ದಾರೆ ಎಂದು ಬಿಜೆಪಿ ತಾಲ್ಲೂಕು ಮಹಿಳಾ ಘಟಕದ ಅಧ್ಯಕ್ಷೆ ಶೋಭಾಗಣೇಶ್ ಆಕ್ರೋಶ ವ್ಯಕ್ತಪಡಿಸಿದರು.

ಶನಿವಾರ ಸುದ್ದಿಗೋಷ್ಠಿಯಲ್ಲಿ ಅವರು ಮಾತನಾಡಿದರು, ಬಿಜೆಪಿ ಸರ್ಕಾರ ಇಲ್ಲದಿದ್ದರೂ ಸುರೇಶ್ ಮಾಡುತ್ತಿರುವ ಅಭಿವೃದ್ಧಿ  ಕಾರ್ಯಗಳು ಶಿವರಾಂ ಅವರ ಕಣ್ಣು ಕುಕ್ಕುತ್ತಿದೆ. ಹಾಗಾಗಿ ಅವರ ವಿರುದ್ಧ ಅಪಪ್ರಚಾರ ಮಾಡುತ್ತಿದ್ದಾರೆ. ಶಿವಾರಂ ಅವರು ಶಾಸಕ ಎಚ್.ಕೆ.ಸುರೇಶ್ ವಿರುದ್ಧ ಅಪಪ್ರಚಾರ ಮಾಡುವುದನ್ನು ನಿಲ್ಲಿಸದಿದ್ದಲ್ಲಿ ಉಗ್ರ ಪ್ರತಿಭಟನೆ ನಡೆಸಲಾಗುವುದು, ಮುಖ್ಯಮಂತ್ರಿಗಳು ಬರುವ ತನಕ ಪ್ರತಿಭಟನೆ ನಿಲ್ಲಿಸುವುದಿಲ್ಲ ಎಂದು ಎಚ್ಚರಿಕೆ ನೀಡಿದರು.

ಲಕ್ಕುಂದ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ರಾಧ ಮಾತನಾಡಿ, ಪತಿ ಚುನಾವಣೆಗೆ ನಿಂತಾಗ ಪತ್ನಿ ಸೆರಗೊಡ್ಡಿ ಮತ ಕೇಳುವುದು ಸಾಮಾನ್ಯ, ಎಂ.ಪಿ.ಶ್ರೇಯಸ್ ಪಟೇಲ್ ಚುನಾವಣೆಗೆ ನಿಂತಾಗ ಅವರ ತಾಯಿ ಸೆರಗೊಡ್ಡಿ ಮತ ಕೇಳಿರಲಿಲ್ಲವೇ, ಅದೇ ರೀತಿ ಶಾಸಕ ಎಚ್.ಕೆ.ಸುರೇಶ್ ಅವರ ಪತ್ನಿ ಸೆರಗೊಡ್ಡಿ ಮತ ಕೇಳಿದ್ದರು. ಅದನ್ನು ಹೀಯಾಳಿಸುವುದು ಸರಿಯಲ್ಲ ಎಂದರು.

ಕಾಡಾನೆ ಹಾವಳಿ ನಿಯಂತ್ರಿಸಿ: ಸೆರಗೊಡ್ಡಿ ಮನವಿ ಕಾಡಾನೆಗಳ ಸಮಸ್ಯೆಯಿಂದ ಕೃಷಿಕರಿಗೆ ವಿಪರೀತ ತೊಂದರೆಯಾಗಿದ್ದು ಶಾಶ್ವತ ಪರಿಹಾರ ಒದಗಿಸಬೇಕೆಂದು ಬಿಜೆಪಿ ತಾಲ್ಲೂಕು ಮಹಿಳಾ ಘಟಕದ ಅಧ್ಯಕ್ಷೆ ಶೋಭಾಗಣೇಶ್ ಲಕ್ಕುಂದ ಗ್ರಾಮಪಂಚಾಯಿತಿ ಅಧ್ಯಕ್ಷೆ ರಾಧ ಬಂಟೇನಹಳ್ಳಿ ಗ್ರಾಮ ಪಂಚಾಯಿತಿ ಸದಸ್ಯೆ ಶಿವಮ್ಮ ಬಿಜೆಪಿ ಮುಖಂಡರಾದ ತೀರ್ಥಮ್ಮ ರತ್ನಮ್ಮ ಅರಣ್ಯ ಸಚಿವ ಈಶ್ವರಖಂಡ್ರೆ ಅವರಿಗೆ ಸೆರಗೊಡ್ಡಿ ಕೇಳಿಕೊಂಡರು.