ಹಿರೇಕೆರೂರು | ನಕಲಿ ಪತ್ರಕರ್ತರ ನಿಗ್ರಹಕ್ಕೆ ಆಗ್ರಹ

ಹಿರೇಕೆರೂರು: ತಾಲ್ಲೂಕಿನಲ್ಲಿ ನಕಲಿ ಪತ್ರಕರ್ತರ ಹಾವಳಿಗೆ ಕಡಿವಾಣ ಹಾಕಬೇಕೆಂದು ಕಾರ್ಯನಿರತ ಪತ್ರಕರ್ತರ ಸಂಘದ ತಾಲ್ಲೂಕು ಘಟಕದಿಂದ ಸಿಪಿಐ ಬಸವರಾಜ ಪಿ.ಎಸ್ ಅವರಿಗೆ ಸೋಮವಾರ ಮನವಿ ಸಲ್ಲಿಸಲಾಯಿತು.

ಸಂಘದ ತಾಲ್ಲೂಕು ಘಟಕದ ಅಧ್ಯಕ್ಷ ಇಂದೂಧರ ಹಳಕಟ್ಟಿ ಮಾತನಾಡಿ, ‘ನಕಲಿ ಪತ್ರಕರ್ತರು ನೋಂದಣಿಯಿಲ್ಲದ ಚಾನಲ್ ಹೆಸರಿನ ಲೋಗೋಗಳನ್ನು ಹಿಡಿದು ಸರ್ಕಾರಿ ಇಲಾಖೆ ಅಧಿಕಾರಿಗಳ ಕರ್ತವ್ಯಕ್ಕೆ ಅಡ್ಡಿಪಡಿಸುತ್ತಿದ್ದಾರೆ. ಅಲ್ಲದೆ, ಅವರನ್ನು ಬೆದರಿಸಿ ಹಣ ಸುಲಿಗೆ ಮಾಡುತ್ತಿದ್ದಾರೆ.ಇದರಿಂದ ನೈಜ ಪತ್ರಕರ್ತರ ಸಂವಿಧಾನ ಬದ್ಧ ಕಾರ್ಯವೈಖರಿಗೆ ಬಹಳಷ್ಟು ತೊಂದರೆಯಾಗುತ್ತಿದೆ. ಇದು ಸಾರ್ವಜನಿಕ ವಲಯದಲ್ಲಿ ನೈಜ ಪತ್ರಕರ್ತರಿಗೆ ಬೆಲೆ ಇಲ್ಲದಂತಾಗಿದೆ. ಆದ್ದರಿಂದ ನಕಲಿ ಪತ್ರಕರ್ತರಿಗೆ ಕಡಿವಾಣ ಹಾಕಬೇಕು’ ಎಂದರು.

ನಂತರ ಸಂಘದ ಸದಸ್ಯರು ತಹಶೀಲ್ದಾರ್ ಎಚ್.ಪ್ರಭಾಕರಗೌಡ ಅವರಿಗೂ ತಾಲ್ಲೂಕಿನಲ್ಲಿನ ನಕಲಿ ಪತ್ರಕರ್ತರ ಹಾವಳಿಗೆ ಕಡಿವಾಣ ಹಾಕಬೇಕು ಎಂದು ಮನವಿ ಸಲ್ಲಿಸಿದರು.

ಪಿಎಸ್‍ಐ ನೀಲಪ್ಪ ನರನಾಲ ಪತ್ರಕರ್ತರಾದ ಪ್ರವೀಣ ಗೌಡ್ರ, ಪ್ರಕಾಶ ಬಣಕಾರ, ರವಿ ಮೇಗಳಮನಿ ಇದ್ದರು.