ಬಿಸಿಲಿನ ಬೇಗೆ, ಈಜುಕೊಳಕ್ಕೆ ಲಗ್ಗೆ

ಕಲಬುರ್ಗಿ: ಈಜು ಕ್ರೀಡೆಯಾಗಿ, ವ್ಯಾಯಾಮವಾಗಿ, ಹವ್ಯಾಸವಾಗಿ ಪ್ರಸಿದ್ಧಿ ಪಡೆದಿದೆ. ದೈಹಿಕ ಸದೃಢತೆ ಮತ್ತು ಆರೋಗ್ಯ ಕಾಪಾಡಿಕೊಳ್ಳಲು ಚಿಕ್ಕ ಮಕ್ಕಳಿಂದ, ಹಿರಿಯ ನಾಗರಿಕರವರೆಗೆ ಎಲ್ಲರೂ ಈಜಿನ ಮೊರೆ ಹೋಗುತ್ತಿದ್ದಾರೆ.

ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ತಾಪಮಾನದಿಂದ ರಕ್ಷಣೆ ಪಡೆಯಲು ಪ್ರತಿನಿತ್ಯ ನೂರಾರು ಜನ ನಗರದ ಚಂದ್ರಶೇಖರ ಪಾಟೀಲ ಕ್ರೀಡಾಂಗಣದಲ್ಲಿರುವ ಈಜುಕೊಳಕ್ಕೆ ಲಗ್ಗೆ ಇಡುತ್ತಿದ್ದಾರೆ. ಅಲ್ಲದೆ, ಮಕ್ಕಳಿಗೆ ರಜೆ ಆರಂಭವಾಗಿದ್ದು, ಪೋಷಕರು ಮಕ್ಕಳೊಂದಿಗೆ ಈಜುಕೊಳಕ್ಕೆ ಕರೆತರುತ್ತಿದ್ದಾರೆ.

ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ವತಿಯಿಂದ ವಿಶೇಷ ಈಜು ತರಬೇತಿ ಶಿಬಿರ ಆಯೋಜಿಸಲಾಗಿದ್ದು, ಮಾರ್ಚ್ 14ರಿಂದ ಮೊದಲ ಬ್ಯಾಚ್‌ ಆರಂಭವಾಗಿದೆ. ಮೂರು ಬ್ಯಾಚ್‌ಗಳನ್ನು ಮಾಡಲಾಗಿದ್ದು, ಪ್ರತಿ ಬ್ಯಾಚ್‌ಗೆ 15 ದಿನ ತರಬೇತಿ ನೀಡಲಾಗುತ್ತಿದೆ. ಎರಡನೇ ಬ್ಯಾಚ್ ಏಪ್ರಿಲ್ ನಾಲ್ಕರಿಂದ ಮತ್ತು ಮೂರನೇ ಬ್ಯಾಚ್‌ನ ತರಬೇತಿ ಏಪ್ರಿಲ್ 25ರಿಂದ ಆರಂಭವಾಗಲಿದೆ.

‘ಈಗಾಗಲೇ 150 ಜನ ನೋಂದಣಿ ಮಾಡಿಸಿದ್ದಾರೆ. ತರಬೇತಿ ಪಡೆದವರು ಮತ್ತು ಪಡೆಯುತ್ತಿರುವವರು ಸೇರಿ 250ಕ್ಕೂ ಹೆಚ್ಚು ಜನ ಈಜುಕೊಳಕ್ಕೆ ಬರುತ್ತಾರೆ. ಬೆಳಿಗ್ಗೆ ಏಳರಿಂದ 10 ಗಂಟೆವರೆಗೆ ಮತ್ತು ಸಂಜೆ ನಾಲ್ಕು ಗಂಟೆಯಿಂದ ಏಳು ಗಂಟೆವರೆಗೆ ತರಬೇತಿ ನೀಡಲಾಗುತ್ತಿದೆ. ಸಂಜೆ 4ರಿಂದ 5ರವರೆಗೆ ಮಹಿಳೆಯರಿಗೆ ಮಾತ್ರ ಅವಕಾಶ ಇದೆ’ ಎಂದು ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಸಹಾಯಕ ನಿರ್ದೇಶಕ ಆರ್‌.ಜಿ.ನಾಡಗೀರ ಹೇಳಿದರು.

ಬಾಲಕಿಯರು ಮತ್ತು ಮಹಿಳೆಯರಿಗೆ ಪ್ರತ್ಯೇಕ ತರಬೇತಿ ನೀಡಲಾಗುತ್ತಿದೆ. ಒಬ್ಬ ಮಹಿಳಾ ಮತ್ತು ಒಬ್ಬ ಪುರುಷ ಕೋಚ್ ಇದ್ದಾರೆ. ಅಲ್ಲದೆ, ತುರ್ತು ಸಂದರ್ಭಗಳಲ್ಲಿ ರಕ್ಷಣೆಗೆ ನಾಲ್ವರು ಜೀವ ರಕ್ಷಕ ಸಿಬ್ಬಂದಿಯನ್ನು ನೇಮಕ ಮಾಡಲಾಗಿದೆ ಎಂದರು.

ಈಗಾಗಲೇ ಈಜು ಕಲಿತವರು ₹100 ಶುಲ್ಕ ಪಾವತಿಸಿ ಈಜುಕೊಳ ಬಳಸಬಹುದು. 15 ದಿನಗಳ ತರಬೇತಿ ಪಡೆಯಲು 16 ವರ್ಷದೊಳಗಿನವರಿಗೆ ₹1,050 ಮತ್ತು 16ಕ್ಕಿಂತ ಹೆಚ್ಚಿನ ವಯೋಮಾನದವರಿಗೆ ₹1,550 ಶುಲ್ಕ ನಿಗದಿಪಡಿಸಲಾಗಿದೆ. ಸರ್ಕಾರಿ ನೌಕರರು, ನಿವೃತ್ತ ನೌಕರರು ಮತ್ತು 16 ವರ್ಷದೊಳಗಿನವರಿಗೆ ತಿಂಗಳಿಗೆ ₹500 ಶುಲ್ಕ ಇದೆ. ಸರ್ಕಾರಿ ನೌಕರರಲ್ಲದವರಿಗೆ ₹1,000 ಶುಲ್ಕ ನಿಗದಿಪಡಿಸಲಾಗಿದೆ. ನೋಂದಣಿ ಶುಲ್ಕ ₹50 ಇದೆ. ಈಜುಗಾರರು ಈಜಲು ಬೇಕಾದ ಪರಿಕರಗಳನ್ನು ತಾವೇ ಖರೀದಿಸಬೇಕು ಎಂದು ಮಾಹಿತಿ ನೀಡಿದರು.
**
ಓಜೋನೇಟರ್‌ ಅಳವಡಿಕೆ ವಿಳಂಬ

ಈಜುಕೊಳದ ಸ್ವಚ್ಛತೆ ಮತ್ತು ಈಜುಗಾರರ ಆರೋಗ್ಯದ ದೃಷ್ಟಿಯಿಂದ ಚೆನ್ನೈನ ಓಜೋನ್ ಟೆಕ್ನಾಲಜೀಸ್ ಕಂಪನಿಯಿಂದ ಓಜೋನೇಟರ್ ಖರೀದಿಸಲು ತೀರ್ಮಾನಿಸಲಾಗಿತ್ತು. ಆದರೆ, ಈವರೆಗೂ ಕೊಳದಲ್ಲಿ ಓಜೋನೇಟರ್‌ ಅಳವಡಿಸಿಲ್ಲ.

ಈ ಬಗ್ಗೆ ಪ್ರತಿಕ್ರಿಯಿಸಿದ ನಾಡಿಗೀರ ಅವರು, ಖರೀದಿ ಪ್ರಕ್ರಿಯೆ ಮುಗಿದಿದೆ. ಆದರೆ, ಕೆಆರ್‌ಡಿಐಎಲ್‌ನಿಂದ ಹಣ ಸಂದಾಯವಾಗದ ಕಾರಣ ಅವರು ಹಸ್ತಾಂತರ ಮಾಡಿಲ್ಲ. ಈ ಬಗ್ಗೆ ಕ್ರೀಡಾಂಗಣ ಸಮಿತಿ ಸಭೆಯಲ್ಲಿ ಪ್ರಸ್ತಾಪಿಸಿ ಸಮಸ್ಯೆ ಪರಿಹರಿಸಲಾಗುವುದು ಎಂದರು.

ಈಜುಕೊಳ 50 ಮೀಟರ್‌ ಉದ್ದ, 21 ಮೀಟರ್ ಅಗಲ ಇದ್ದು, 6.5 ಅಡಿ ಅಳವಿದೆ. ಕೊಳವನ್ನು ಕ್ಲೋರಿನ್ ಬಳಸಿ ಸ್ವಚ್ಛಗೊಳಿಸಲಾಗುತ್ತಿದೆ. ಅಲ್ಲದೆ, ನೀರು ಶುದ್ಧೀಕರಣ ಘಟಕವೂ ಇದೆ ಎಂದು ತಿಳಿಸಿದರು.
**

ಬೇಬಿ ಈಜುಕೊಳ

ಈಗಿರುವ ಈಜುಕೊಳದ ಪಕ್ಕದಲ್ಲಿ ಬೇಬಿ ಈಜುಕೊಳ ಇದೆ. ಅದರಲ್ಲಿ ಏಳರಿಂದ ಹತ್ತು ವರ್ಷದ ಮಕ್ಕಳಿಗೆ ಈಜಲು ಅವಕಾಶ ನೀಡಲಾಗುತ್ತದೆ ಎಂದು ನಾಡಗೀರ ತಿಳಿಸಿದರು.

ಬೇಸಿಗೆಯಲ್ಲಿ ಕ್ರೀಡಾಂಗಣಕ್ಕೆ ಬರುವವರ ಸಂಖ್ಯೆ ಹೆಚ್ಚಾಗುತ್ತದೆ. ಅಲ್ಲದೆ, ಮಕ್ಕಳಿಗೆ ದೊಡ್ಡ ಕೊಳ ನೋಡಿದರೆ ಭಯವಾಗುತ್ತದೆ. ಹೀಗಾಗಿ ಈ ಬೇಬಿ ಕೊಳದ ವ್ಯವಸ್ಥೆ ಮಾಡಲಾಗಿದೆ ಎಂದರು.