62 ಅಭ್ಯರ್ಥಿಗಳಿಗೆ ‘ನೋಟಾ’ಗಿಂತ ಕಡಿಮೆ ಮತ

ಕಲಬುರ್ಗಿ: ಜಿಲ್ಲೆಯ ಒಂಬತ್ತು ವಿಧಾನಸಭಾ ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದ್ದ 94 ಅಭ್ಯರ್ಥಿಗಳ ಪೈಕಿ 62 ಅಭ್ಯರ್ಥಿಗಳು ನೋಟಾಕ್ಕಿಂತಲೂ (ಮೇಲಿನ ಯಾರಿಗೂ ಮತವಿಲ್ಲ) ಕಡಿಮೆ ಮತಗಳನ್ನು ಪಡೆದಿದ್ದಾರೆ.

ಒಟ್ಟು 11,234 ನೋಟಾ ಮತಗಳು ಚಲಾವಣೆಯಾಗಿವೆ. ಈ ಪೈಕಿ ಕಲಬುರ್ಗಿ ಉತ್ತರ ಮತ್ತು ದಕ್ಷಿಣದಲ್ಲಿ ಅತಿ ಹೆಚ್ಚು ಅಂದರೆ 11 ಅಭ್ಯರ್ಥಿಗಳು ‘ನೋಟಾ’ಕ್ಕಿಂತ ಕಡಿಮೆ ಮತ ಪಡೆದಿದ್ದಾರೆ. ಸೇಡಂನಲ್ಲಿ ಅತಿ ಕಡಿಮೆ ಅಂದರೆ ಒಬ್ಬರು ಮಾತ್ರ ನೋಟಾಗಿಂತ ಕಡಿಮೆ ಮತ ಪಡೆದಿದ್ದಾರೆ.

ಮಹಾಮೈತ್ರಿಗೂ ಸೋಲು: ಜನಾಂದೋಲನಗಳ ಮಹಾಮೈತ್ರಿಯಿಂದ ಸ್ಪರ್ಧಿಸಿದ್ದ ಇಬ್ಬರು ಅಭ್ಯರ್ಥಿಗಳು ಪಡೆದಿರುವ ಮತಗಳು ಕೂಡ ನೋಟಾಗಿಂತ ಕಡಿಮೆ ಇವೆ.

ಕಲಬುರ್ಗಿ ಉತ್ತರ ಮತಕ್ಷೇತ್ರದ ವೆಲ್ಫೇರ್ ಪಾರ್ಟಿ ಆಫ್ ಇಂಡಿಯಾ ಅಭ್ಯರ್ಥಿ ಸೈಯ್ಯದ್ ಅಬ್ದುಲ್ ಬಾರಿ 252 ಹಾಗೂ ಕಲಬುರ್ಗಿ ಗ್ರಾಮೀಣ ಮತಕ್ಷೇತ್ರದ ಎಸ್‌ಯುಸಿಐ (ಸಿ) ಅಭ್ಯರ್ಥಿ ಗಣಪತಿರಾವ್ ಮಾನೆ ಅವರು 1,044 ಮತಗಳನ್ನು ಪಡೆದಿದ್ದಾರೆ.

ಕಲಬುರ್ಗಿ ಉತ್ತರ ಮತಕ್ಷೇತ್ರದಿಂದ ಆಮ್ ಆದ್ಮಿ ಪಾರ್ಟಿಯಿಂದ ಕಣದಲ್ಲಿದ್ದ ಸಂಜೀವಕುಮಾರ ಕರಿಕಲ್ ಪಡೆದ ಮತಗಳು ಕೂಡ ನೋಟಾಕ್ಕಿಂತ ಕಡಿಮೆ ಇವೆ. ಇವರ ಪರ 198 ಮತಗಳು ಚಲಾವಣೆಯಾಗಿವೆ.

ಜೆಡಿಎಸ್ ಹೊರತಲ್ಲ: ಆಳಂದ ಜೆಡಿಎಸ್ ಅಭ್ಯರ್ಥಿ ಸೂರ್ಯಕಾಂತ ಕೊರಳ್ಳಿ 1,387 ಮತಗಳನ್ನು ಪಡೆದಿದ್ದಾರೆ. ಇಲ್ಲಿ 1,445 ನೋಟಾ ಮತ ಚಲಾವಣೆಯಾಗಿವೆ.

ನೋಟಾಕ್ಕಿಂತ ಕಡಿಮೆ ಮತ

ಅಫಜಲಪುರ (4), ಜೇವರ್ಗಿ (8), ಚಿತ್ತಾಪುರ (4), ಸೇಡಂ (1) ಚಿಂಚೋಳಿ (7), ಕಲಬುರ್ಗಿ ಗ್ರಾಮೀಣ (8), ಕಲಬುರ್ಗಿ ದಕ್ಷಿಣ (11), ಕಲಬುರ್ಗಿ ಉತ್ತರ (11), ಆಳಂದ (8).

‘ನೋಟಾ’ಗಿಂತ ಕಡಿಮೆ ಅಂತರ

ಆಳಂದ ಕಾಂಗ್ರೆಸ್ ಅಭ್ಯರ್ಥಿ ಬಿ.ಆರ್.ಪಾಟೀಲ ಅವರು ‘ನೋಟಾ’ಗಿಂತ ಕಡಿಮೆ ಮತಗಳ ಅಂತರದಲ್ಲಿ ಸೋಲು ಅನುಭವಿಸಿದ್ದಾರೆ. ಆಳಂದನಲ್ಲಿ 1,445 ನೋಟಾ ಚಲಾವಣೆಯಾಗಿದ್ದರೆ, ಪಾಟೀಲ ಅವರು 697 ಮತಗಳ ಅತ್ಯಲ್ಪ ಅಂತರದಿಂದ ಪರಾಭವಗೊಂಡಿದ್ದಾರೆ. ಬಿಜೆಪಿಯ ಸುಭಾಷ ಗುತ್ತೇದಾರ ಅವರು 76,815 ಮತಗಳನ್ನು ಪಡೆದಿದ್ದರೆ, ಬಿ.ಆರ್.ಪಾಟೀಲ ಅವರು 76,118 ಮತಗಳನ್ನು ಪಡೆದಿದ್ದಾರೆ.