ಶೇರಿಭಿಕನಳ್ಳಿ ಸ್ಥಳಾಂತರಕ್ಕೆ ಹಗ್ಗ ಜಗ್ಗಾಟ!

ಚಿಂಚೋಳಿ: ನಾವು ಇನ್ನೂ ಎಷ್ಟು ವರ್ಷ ಹೀಗೆ ಕಾಲ್ನಡಿಗೆಯಲ್ಲಿ ನಮ್ಮೂರಿಗೆ ಹೋಗಬೇಕು? ಮಳೆ, ಗಾಳಿ ಬಿಸಿಲು, ಚಳಿ ಎನ್ನದೇ ನಾವು ಕಾಡೊಳಗೆ ದಿನ ದೂಡಬೇಕು. ನಮ್ಮ ಮಕ್ಕಳು ಹೊಸ ಪ್ರಪಂಚ ನೋಡುವುದು ಬೇಡವೇ? ಎಂಬುದು ಶೇರಿಭಿಕನಳ್ಳಿಯ ಮಹಿಳೆಯರ ಪ್ರಶ್ನೆ.

ಧರ್ಮಾಸಾಗರದಿಂದ 6 ಕಿ.ಮೀ, ಶಾದಿಪುರದಿಂದ 7 ಕಿ.ಮೀ ಅಂತರದಲ್ಲಿರುವ ವನ್ಯಜೀವಿ ಧಾಮದ ಹೃದಯ ಭಾಗದಲ್ಲಿರುವ ಈ ಕುಗ್ರಾಮಕ್ಕೆ ತೆರಳಲು ಸರಿಯಾದ ರಸ್ತೆಯಿಲ್ಲ, ಸಾರಿಗೆ ಸೌಲಭ್ಯವಿಲ್ಲ. ವಿದ್ಯುತ್ ಸೌಲಭ್ಯ ಬಂದರೆ ಬಂತು, ಹೋದರೆ ಹೋಯಿತು ಎಂಬಂತಿದೆ.

2011ರಲ್ಲಿ ಕಾಯ್ದಿಟ್ಟ ಅರಣ್ಯವನ್ನು ವನ್ಯಜೀವಿ ಧಾಮವಾಗಿ ಘೋಷಿಸಲು ಕುಂಚಾವರಂನಲ್ಲಿ ನಡೆದ ಸಭೆಯಲ್ಲಿ ನಿರ್ಣಯಿಸಲಾಯಿತು. 2012ರಲ್ಲಿ ಈ ಕುರಿತು ಅಧಿಕೃತ ಅಧಿಸೂಚನೆ ಹೊರಬಿತ್ತು. ಅಂದಿನಿಂದ ಗ್ರಾಮ ಸ್ಥಳಾಂತರಕ್ಕೆ ಹಗ್ಗ ಜಗ್ಗಾಟ ನಡೆಯುತ್ತಲೇ ಇದೆ.

ಇವರು ಶತಮಾನದಿಂದ ಕಾಡೊಳಗಿದ್ದಾರೆ. ಆದರೆ, ವನವಾಸಕ್ಕೆ ಮುಕ್ತಿಕೊಡಿ ನಾವು ಇಲ್ಲಿಂದ ಹೋಗಲು ಸಿದ್ಧ ಎಂದು ವನ್ಯಜೀವಿ ಮಂಡಳಿ ಉಪಾಧ್ಯಕ್ಷರಾಗಿದ್ದ ಕ್ರಿಕೆಟಿಗ ಅನಿಲ್ ಕುಂಬ್ಳೆ ಅವರ ಎದುರು ಹೇಳಿ 13 ವರ್ಷ ಗತಿಸಿವೆ. ಆದರೂ ಇವರ ಕನಸು ನನಸಾಗಿಲ್ಲ.

ಸೌಲಭ್ಯ ಹಾಗೂ ಪರಿಹಾರ ನೀಡಿದರೆ ಸ್ಥಳಾಂತರಕ್ಕೆ ಸಿದ್ಧ ಎಂದು ಹಲವು ವರ್ಷಗಳ ಹಿಂದೆಯೇ ಗ್ರಾಮದ ನಿವಾಸಿಗಳು ಹೇಳಿದರೂ ಸ್ಥಳಾಂತರ ಪ್ರಕ್ರಿಯೆ ಆಮೆನಡಿಗೆಯಲ್ಲಿ ಸಾಗಿದೆ. ಕಳೆದ ವರ್ಷ ಇಲ್ಲಿ ಕಂದಾಯ, ಸಮಾಜ ಕಲ್ಯಾಣ, ಅರಣ್ಯ (ವನ್ಯಜೀವಿ) ಇಲಾಖೆ ಅಧಿಕಾರಿಗಳು ಗ್ರಾಮಸ್ಥರೊಂದಿಗೆ ಸಭೆ ನಡೆಸಿದ್ದರು. 

ಪ್ರಸಕ್ತ ವರ್ಷದ ನ.19ರಂದು ಮತ್ತೊಂದು ಸಭೆ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಬಸವರಾಜ ಡಾಂಗೆ ಮತ್ತು ವಲಯ ಅರಣ್ಯಾಧಿಕಾರಿ ಸಂಜೀವಕುಮಾರ ಚವ್ಹಾಣ ನೇತೃತ್ವದಲ್ಲಿ ನಡೆಸಿದ (ವನ್ಯಜೀವಿ ಧಾಮದ) ಅಧಿಕಾರಿಗಳು ಗ್ರಾಮ ಸ್ಥಳಾಂತರಕ್ಕೆ ಒಂದೊಂದೇ ಮೆಟ್ಟಿಲು ಹತ್ತುವ ಪ್ರಕ್ರಿಯೆ ನಡೆಸುತ್ತಿದ್ದಾರೆ.

ಮೂಲಗಳ ಪ್ರಕಾರ 65 ಕುಟುಂಬಗಳು ಹೊಂದಿರುವ ಗ್ರಾಮದಲ್ಲಿ 94 ಯೂನಿಟ್ ರೂಪದಲ್ಲಿ ಪರಿಹಾರಕ್ಕೆ ಗುರುತಿಸಲಾಗಿದೆ. ಕೃಷಿ ಭೂಮಿಗೆ ಪರ್ಯಾಯವಾಗಿ ಅಷ್ಟೇ ಪ್ರಮಾಣದ ಕೃಷಿ ಭೂಮಿ, ಪ್ರತಿ ಯೂನಿಟ್‌ಗೆ ₹ 15 ಲಕ್ಷದಂತೆ ಪರಿಹಾರಕ್ಕೆ ನಾವು ಒಪ್ಪಿದ್ದೇವೆ. ನಮ್ಮನ್ನು ಪೆದ್ದಾ ತಾಂಡಾದ ಬಳಿ ಸ್ಥಳ ಗುರ್ತಿಸಿದ್ದು ಇಲ್ಲಿಗೆ ತೆರಳಲು ಒಪ್ಪಿರುವುದಾಗಿ ವಸಂತ ಚಿನ್ನಾ ರಾಠೋಡ ತಿಳಿಸಿದ್ದಾರೆ.

ಸ್ಥಳಾಂತರವಾದ ಸ್ಥಳದಲ್ಲಿ 30x40 ಅಳತೆಯ ಸೈಟ್, ರಸ್ತೆ, ಕುಡಿಯುವ ನೀರು, ಶಾಲೆ, ಅಂಗನವಾಡಿ, ದೇವಾಲಯ, ಬಸ್ ನಿಲ್ದಾಣ, ಸಮುದಾಯ ಭವನ ಹೀಗೆ ವಿವಿಧ ಸೌಲಭ್ಯಗಳು ಕಲ್ಪಿಸುವಂತೆ ಅರಣ್ಯ ಇಲಾಖೆಗೆ ಕೋರಿದ್ದೇವೆ ಎಂದರು.

ಪೆದ್ದಾ ತಾಂಡಾ ಬಳಿಗೆ ಶೇರಿಭಿಕನಳ್ಳಿ ಸ್ಥಳಾಂತರಿಸಲು ಗುರುತಿಸಿದ ಪ್ರದೇಶ ಅರಣ್ಯ ಇಲಾಖೆಗೆ ಸೇರಿದೆ. ಹೀಗಾಗಿ ಇದು ಅರಣ್ಯೇತರ ಉದ್ದೇಶಕ್ಕೆ ಬಳಸಲು ಅನುಮತಿ ನೀಡುವಂತೆ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲು ಅರಣ್ಯ ಇಲಾಖೆ ಮುಂದಾಗಿದೆ. ಆದಷ್ಟು ಬೇಗ ನಮಗೆ ವನವಾಸದಿಂದ ಮುಕ್ತಗೊಳಿಸಿ ಎಂದು ಜನರು ಚಾತಕ ಪಕ್ಷಿಯಂತೆ ಕಾಯುತ್ತಿದ್ದಾರೆ.

ಚಿಂಚೋಳಿ ವನ್ಯಜೀವಿ ಧಾಮದಲ್ಲಿರುವ ಕುಗ್ರಾಮ ವರ್ಷಕ್ಕೊಂದು ಸಭೆಗೆ ಸೀಮಿತವಾದ ಸ್ಥಳಾಂತರ ಪ್ರಕ್ರಿಯೆ ಪೆದ್ದಾ ತಾಂಡಾ ಬಳಿ ಅರಣ್ಯ ಜಮೀನು ಗುರ್ತಿಸಿದ ಅಧಿಕಾರಿಗಳು