ಮಡಿಕೇರಿ: ಸ್ಕ್ಯಾನಿಂಗ್ ಕ್ಷೇತ್ರದ ನೂತನ ಆವಿಷ್ಕಾರ

ಮಡಿಕೇರಿ: ಇಂಡಿಯನ್ ರೇಡಿಯೊಲಾಜಿಕಲ್‌ ಮತ್ತು ಇಮೇಜಿಂಗ್ ಅಸೋಸಿಯೇಷನ್‌ನ ಕರ್ನಾಟಕ ಘಟಕದ ವತಿಯಿಂದ ಕೊಡಗು ವೈದ್ಯಕೀಯ ವಿಜ್ಞಾನ ಸಂಸ್ಥೆಯ ಕ್ಷ– ಕಿರಣ ವಿಭಾಗ, ಕರ್ನಾಟಕ ಸರ್ಕಾರಿ ವೈದ್ಯಾಧಿಕಾರಿಗಳ ಸಂಘದ ಕೊಡಗು ಶಾಲೆಯ ಸಹಯೋಗದ ವತಿಯಿಂದ ಕಾಲೇಜಿನಲ್ಲಿ ನಡೆದ ರೇಡಿಯೊಲಾಜಿ ಸಮಾವೇಶದಲ್ಲಿ 145 ವೈದ್ಯರು ಭಾಗಿಯಾಗಿದ್ದರು.

ಸಿ.ಟಿ.ಸ್ಕ್ಯಾನಿಂಗ್ ಮೂಲಕ ಹೃದಯಘಾತದ ಮುನ್ಸೂಚನೆ ಅರಿಯುವುದು, ಸ್ಕ್ಯಾನಿಂಗ್ ಮೂಲಕ ಶಿಶು ತಾಯಿ ಗರ್ಭದಲ್ಲಿ ಇರುವಾಗಲೇ ಅಂಗವೈಕಲ್ಯ ತಿಳಿಯುವುದು ಸೇರಿದಂತೆ ಅನೇಕ ಬಗೆಯ ಹೊಸ ಬಗೆಯ ತಂತ್ರಜ್ಞಾನದ ವಿಷಯಗಳನ್ನು ಇಲ್ಲಿ ಚರ್ಚಿಸಲಾಯಿತು. ನೇರವಾಗಿ ಸ್ಕ್ಯಾನಿಂಗ್‌ ಮಾಡುವ ಮೂಲಕ ಪ್ರಾತ್ಯಕ್ಷಿಕೆಯನ್ನೂ ನಡೆಸಲಾಯಿತು.

8 ಮಂದಿ ತಜ್ಞರು ವಿವಿಧ ವಿಷಯಗಳನ್ನು ಕುರಿತು ಮಾತನಾಡಿದರು. ವೈದ್ಯರು ಚರ್ಚೆಯಲ್ಲಿ ಭಾಗಿಯಾಗಿ ತಮ್ಮ ಸಂದೇಹಗಳನ್ನು ಬಗೆಹರಿಸಿಕೊಂಡರು.

ಕುಶಾಲನಗರದ ಪರಿಶಿಷ್ಟ ಪಂಗಡದ ವಿದ್ಯಾರ್ಥಿನಿಲಯದ ವಿದ್ಯಾರ್ಥಿನಿಯರಿಗೆ ಕೊಡೆ, ಲೇಖನ ಸಾಮಗ್ರಿಗಳು ಹಾಗೂ ನಿಘಂಟನ್ನು ಐಆರ್‌ಐಎ ವತಿಯಿಂದ ವಿತರಿಸಲಾಯಿತು.

ಶಾಸಕ ಡಾ.ಮಂತರ್‌ಗೌಡ ಸಮ್ಮೇಳನ ಉದ್ಘಾಟಿಸಿದರು. ಐಆರ್‌ಐಎ ರಾಜ್ಯ ಘಟಕದ ಅಧ್ಯಕ್ಷ ಡಾ.ಜಿ.ಯು.ಪ್ರವೀಣ್ ಅಧ್ಯಕ್ಷತೆ ವಹಿಸಿದ್ದರು.

ಸಂಸ್ಥೆಯ ಡೀನ್ ಮತ್ತು ನಿರ್ದೇಶಕ ಡಾ.ಎ.ಜೆ.ಲೋಕೇಶ್, ಕಾಲೇಜಿನ ಪ್ರಾಂಶುಪಾಲ ಡಾ.ವಿಶಾಲ್‌ಕುಮಾರ್, ವೈದ್ಯಕೀಯ ಅಧೀಕ್ಷಕ ಡಾ.ಸೋಮಶೇಖರ್, ಜಿಲ್ಲಾ ಶಸ್ತ್ರಚಿಕಿತ್ಸಕ ಡಾ.ಎನ್.ನಂಜುಂಡಯ್ಯ, ಕರ್ನಾಟಕ ಸರ್ಕಾರಿ ವೈದ್ಯಾಧಿಕಾರಿಗಳ ಸಂಘದ ಕಾರ್ಯದರ್ಶಿ ಡಾ.ಎಂ.ಯು.ಚೇತನ್, ಐಎಂಎ ಅಧ್ಯಕ್ಷ ಡಾ.ಶ್ಯಾಂ ಅಪ್ಪಣ್ಣ, ಐಆರ್‌ಐಎ ಕಾರ್ಯದರ್ಶಿ ವಿದ್ಯಾಸಾರಥಿ, ಕೇಂದ್ರ ಸಮಿತಿ ಸದಸ್ಯ ಡಾ.ಮಹೇಶ್, ಮೈಸೂರು ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಯ ನಿವೃತ್ತ ಡೀನ್ ಡಾ.ನಂಜರಾಜು ಹಾಗೂ ಡಾ.ರವಿಕಿರಣ್ ಇದ್ದರು.