ಮಾಲೂರು | ಹಲವು ಮದುವೆಗೆ ಸಾಕ್ಷಿಯಾದ ಉದ್ಯಾನ

ಮಾಲೂರು: ಸಾಮಾನ್ಯವಾಗಿ ಪಾರ್ಕ್‌ ವಾಯು ವಿಹಾರ, ವ್ಯಾಯಾಮ ಮತ್ತು ಮಕ್ಕಳ ಆಟಕ್ಕೆ ಸೀಮಿತವಾಗಿರುತ್ತದೆ. ಆದರೆ ಇಲ್ಲೊಂದು ವಿಶಿಷ್ಟ ಉದ್ಯಾನವಿದೆ. ಅದು ನೂರಾರು ಮದುವೆಗಳಿಗೆ ಸಾಕ್ಷಿಯಾಗಿದೆ!.

ಪಟಟ್ಣದಲ್ಲಿ ರೇಣುಕಾ ಯಲ್ಲಮ್ಮ ಬಡಾವಣೆಯಲ್ಲಿರುವ ಕೋಚಿಮುಲ್ ನಿರ್ವಹಿಸುತ್ತಿರುವ ಉದ್ಯಾನದಲ್ಲಿ ಕಲ್ಯಾಣ ವೆಂಕಟರಮಣಸ್ವಾಮಿ ದೇವಾಲಯ ಇದೆ. ಹೀಗಾಗಿ ಇಲ್ಲಿ ಸರಳ ಮದುವೆಗಳು ನಡೆಯುತ್ತಿರು‌ತ್ತವೆ.

1ನೇ ವಾರ್ಡ್‌ ವ್ಯಾಪ್ತಿಯ ಪುರಸಭೆಗೆ ಸೇರಿದ ಒಂದು ಎಕರೆಯಲ್ಲಿ ಕೋಚಿಮುಲ್‌ ಸುಂದರ ಉದ್ಯಾನ ನಿರ್ಮಿಸಿದೆ. ವಿವಿಧ ಪ್ರಬೇಧದ ಮರ–ಗಿಡಗಳನ್ನು ಇಲ್ಲಿ ಪೋಷಿಸಲಾಗುತ್ತಿದೆ. ಹಿರಿಯ ನಾಗರಿಕರು, ಸಾರ್ವಜನಿಕರಿಗೆ ವಾಯು ವಿಹಾರಕ್ಕೆ ವಾಕಿಂಗ್‌ ಪಾಥ್‌, ಯುವಕರು ವ್ಯಾಯಾಮಕ್ಕೆ ಓಪನ್‌ ಜಿಮನ್‌ ಹಾಗೂ ಮಕ್ಕಳ ಆಟಕ್ಕೆ ಆಟದ ಪರಿಕರ, ಕುಳಿತುಕೊಳ್ಳಲು ಆಸನಗಳು ಹಾಗೂ ವಿಶ್ರಾಂತಿ ಪಡೆಯಲು ಕುಟೀರ ನಿರ್ಮಿಸಲಾಗಿದೆ.

82 ಸಾವಿರ ಜನಸಂಖ್ಯೆ ಹೊಂದಿರುವ ಮಾಲೂರಿನಲ್ಲಿ ಇರುವುದು ಎರಡೇ ಪಾರ್ಕ್‌. ಅದರಲ್ಲಿ ಇದು ಒಂದು. ಬಿಸಿಲಿನ ಬೇಗೆ ಮತ್ತು ದಣಿವು ತೀರಿಸಿಕೊಳ್ಳಲು ಈ ಜಾಗ ಹೇಳಿ ಮಾಡಿಸಿದಂತಿದೆ. ಕುಟುಂಬಗಳು, ಸ್ನೇಹಿತರು ಒಂದೆಡೆ ಕುಳಿತು ಹರಟೆ ಹೊಡೆಯಲು ಹಾಗೂ ಭೋಜನ ಸವಿಯಲು ಅನುಕೂಲ ಕಲ್ಪಿಸಲಾಗಿದೆ.

ಉದ್ಯಾನದಲ್ಲಿ ಸಾರ್ವಜನಿಕರು ಕಲ್ಯಾಣ ವೆಂಕಟರಮಣಸ್ವಾಮಿ ದೇವಾಲಯ ನಿರ್ಮಿಸಿದ್ದಾರೆ. ಹೀಗಾಗಿ ವೆಂಕಟರಣ ಸಾನಿಧ್ಯದಲ್ಲಿ ಬಡ ಮತ್ತು ಮಧ್ಯಮ ವರ್ಗದ ಕುಟುಂದಗಳು ವಿವಾಹ ಮತ್ತು ನಾಮಕರಣ ಹಮ್ಮಿಕೊಳ್ಳುತ್ತಾರೆ. ಉದ್ಯಾನ ವಿಶಾಲವಾಗಿರುವ ಕಾರಣ ಹಾಗೂ  ದೇಗುಲ ಇರುವುದರಿಂದ ಪಾರ್ಕ್‌ ಹಲವು ಮಂಗಳ ಕಾರ್ಯಗಳಿಗೆ ಸಾಕ್ಷಿಯಾಗಿದೆ.