ಮುಳಬಾಗಿಲು | ಕಗ್ಗಲನತ್ತ ಗ್ರಾಮ: ಗುಡಿಸಿಲು ಮುಕ್ತ ಯಾವಾಗ?

ಮುಳಬಾಗಿಲು: ತಾಲ್ಲೂಕಿನ ಕಗ್ಗಲನತ್ತ ಗ್ರಾಮದಲ್ಲಿ 15ಕ್ಕೂ ಹೆಚ್ಚು ಗುಡಿಸಿಲುಗಳು ಕೇವಲ ತೆಂಗಿನ ಗರಿ, ಪೊರಕೆ ಹುಲ್ಲು ಹಾಗೂ ಪ್ಲಾಸ್ಟಿಕ್ ಕವರ್‌ಗಳಿಂದ ನಿರ್ಮಾಣವಾಗಿವೆ. ಈ ಗ್ರಾಮ ಗುಡಿಸಿಲು ಮುಕ್ತವಾಗಲು ಎದುರು ನೋಡುತ್ತಿದೆ.

ಕಗ್ಗಲನತ್ತ ಹೆಸರಿಗಷ್ಟೇ ಗ್ರಾಮ. ರಸ್ತೆ ಸಂಪರ್ಕ ಇಲ್ಲದ ಕುಗ್ರಾಮ. ಈ ಗುಡಿಸಿಲು ಮನೆಗಳಲ್ಲೇ ಇಲ್ಲಿನ ಸುಮಾರು 60-70 ವರ್ಷ ಜೀವನ ಕಳೆದಿದ್ದಾರೆ. ಆದರೂ, ಇದುವರೆಗೂ ಬಹುತೇಕ ಮಂದಿಗೆ ಸರ್ಕಾರದ ಯಾವ ವಸತಿ ಯೊಜನೆಯಿಂದಲೂ ಪ್ರಯೋಜನ ಸಿಕ್ಕಿಲ್ಲ. 

ಗ್ರಾಮದಲ್ಲಿ 41 ಮನೆಗಳಿವೆ. 15 ಮನೆಗಳು (ಗುಡಿಸಿಲುಗಳು). ಕೇವಲ ತಾತ್ಕಾಲಿಕ ಶೆಡ್‌ಗಳು. ಪ್ಲಾಸ್ಟಿಕ್, ಹುಲ್ಲು, ಸೀರೆ, ಬಟ್ಟೆಗಳಿಂದ ತಾತ್ಕಾಲಿಕವಾಗಿ ನಿರ್ಮಾಣ ಮಾಡಲಾಗಿದೆ. 

ಸಾಮಾನ್ಯವಾಗಿ ಅಂಬೇಡ್ಕರ್ ವಸತಿ ಯೋಜನೆ, ಆಶ್ರಯ ಯೋಜನೆ, ಬಸವ ಯೋಜನೆ ಮತ್ತಿತರ ಯೋಜನೆ ಇಲ್ಲಿನ ನಿವಾಸಿಗಳನ್ನು ತಲುಪಿಲ್ಲ.

ಈಚೆಗೆ ಪ್ರಧಾನ ಮಂತ್ರಿ ಅವಾಸ್ ಯೋಜನೆಯಡಿ ವಸತಿ ರಹಿತರ ಮನೆಗಳನ್ನು ಗ್ರಾಮ ಪಂಚಾಯಿತಿ ಅಧಿಕಾರಿಗಳಿಂದ ಪಟ್ಟಿ ಮಾಡುವ ಕೆಲಸ ನಡೆದಿತ್ತು. ಈ ಬಾರಿ ವಸತಿ ಭಾಗ್ಯ ಸಿಗುವುದೇ ಎಂದು ಜನ ಎದುರು ನೋಡುತ್ತಿದ್ದಾರೆ.

ಇನ್ನು ಗ್ರಾಮಕ್ಕೆ ಯಾವುದೇ ಬಸ್ ವ್ಯವಸ್ಥೆ ಇಲ್ಲ. ಮಣ್ಣಿನ ರಸ್ತೆಯಲ್ಲಿ ಗುಡಿಪಲ್ಲಿ ಅಥವಾ ಗೂಕುಂಟೆ ಮುಖ್ಯ ರಸ್ತೆ ಮೂಲಕ ಕಗ್ಗಲನತ್ತ ಗ್ರಾಮಕ್ಕೆ ಎರಡು ಮೂರು ಕಿಲೋಮೀಟರ್ ನಡೆದು ಹೋಗಬೇಕಾಗಿದೆ.

ಇನ್ನು ಗ್ರಾಮದಲ್ಲಿ ಏಕೈಕ ಸಿಸಿ ರಸ್ತೆ, ಕುಡಿಯುವ ನೀರಿನ ವ್ಯವಸ್ಥೆ ಬಿಟ್ಟರೆ ಉಳಿದಂತೆ ಚರಂಡಿ ಇಲ್ಲವಾಗಿದೆ. ಇನ್ನು ಕುಡಿಯುವ ನೀರಿಗಾಗಿ ಅಳವಡಿಸಲಾಗಿರುವ ಸಿಸ್ಟನ್ ಸುತ್ತಲೂ ಹುಲ್ಲು ಹಾಗೂ ಕಸಕಡ್ಡಿ ತುಂಬಿಕೊಂಡಿದೆ ಎಂದು ಗ್ರಾಮಸ್ಥರು ಅಳಲು ತೋಡಿಕೊಂಡರು.