ಬಡವರ ನೆರವಿಗೆ ಬರುವುದು ಶ್ಲಾಘನೀಯ

ಕಾರಟಗಿ: ‘ಕೊರೊನಾದಿಂದ ಅನೇಕ ಕುಟುಂಬಗಳು ಸಂಕಷ್ಟ ಅನುಭವಿಸುತ್ತಿವೆ. ದುಡಿಯುವ ಕೈಗಳಿಗೆ ಕೆಲಸವಿಲ್ಲದಾಗಿದೆ. ಜೀವನ ನಡೆಸುವುದೇ ದುಸ್ತರವಾಗಿದೆ. ಸಂಕಷ್ಟದ ಸಂದರ್ಭದಲ್ಲಿ ನಮ್ಮ ಕಾರ್ಯಕರ್ತರು ಸಹಾಯ ಹಸ್ತ ಚಾಚುತ್ತಿರುವುದು ಶ್ಲಾಘನಾರ್ಹ. ಇಂಥ ವಾತಾವರಣ ಕ್ಷೇತ್ರದಾದ್ಯಂತ ನಡೆದರೆ ನನ್ನ ಕೈಗೆ ಬಲ ತುಂಬಿದಂತೆ’ ಎಂದು ಶಾಸಕ ಬಸವರಾಜ ದಢೇಸೂಗೂರು ಹೇಳಿದರು.

ಪಟ್ಟಣದ 1ನೇ ವಾರ್ಡ್‌ನಲ್ಲಿ ಪ್ರಮುಖ ವರ್ತಕ ರಾಜಶೇಖರ ಸಿರಿಗೇರಿ ನೀಡಿದ ದಿನಸಿ, ತರಕಾರಿ ಕಿಟ್ ವಿತರಿಸುವ ಕಾರ್ಯಕ್ಕೆ ಚಾಲನೆ ನೀಡಿ ಮಾತನಾಡಿದರು.

ಬಡವರಿಗೆ, ಅಸಹಾಯಕರಿಗೆ, ನಿರ್ಗತಿಕರಿಗೆ ನೆರವು ನೀಡಿ ಪರಸ್ಪರ ಸಹಕಾರದ ಬದುಕು ನಡೆಸಬೇಕು ಎಂದರು.

ರಾಜಶೇಖರ ಸಿರಿಗೇರಿ ಮಾತನಾಡಿ,‘ಲಾಕ್‍ಡೌನ್‌ನಿಂದ ಜನರು ಸಂಕಷ್ಟ ಎದುರಿಸುತ್ತಿರುವುದನ್ನು ಮನಗಂಡು 1ನೇ ವಾರ್ಡ್‍ನಲ್ಲಿ ಬಡವರಿಗೆ, ಅಸಹಾಯಕರಿಗೆ ಕೈಲಾದ ಸಹಾಯ ಮಾಡಲಾಗಿದೆ. ಇದು ನಮ್ಮ ಅಳಿಲು ಸೇವೆ ಮಾತ್ರ’ ಎಂದು ಅವರು ಹೇಳಿದರು.

ಬಿಜೆಪಿ ಮಂಡಲ ಅಧ್ಯಕ್ಷ ಚಂದ್ರಶೇಖರ ಮುಸಾಲಿ ಹಾಗೂ ಶಕ್ತಿ ಕೇಂದ್ರದ ಅಧ್ಯಕ್ಷ ಶರಣಪ್ಪ ಗದ್ದಿ ಮಾತನಾಡಿದರು.

ಪ್ರಮುಖರಾದ ವೀರೇಶಪ್ಪ ಚಿನಿವಾಲರ, ಶಿವಶರಣಗೌಡ ಯರಡೋಣ, ಹಿರೇಬಸಪ್ಪ ಸಜ್ಜನ್, ಮುಖಂಡರು, ಯುವಕರು, ಕಾರ್ಯಕರ್ತರು ಹಾಗೂ ಮಹಿಳೆಯರು ಉಪಸ್ಥಿತರಿದ್ದರು.