ಆಧಾರ್-ಇಪಿಐಸಿ ಜೋಡಣೆ ಪೂರ್ಣಗೊಳಿಸಿ: ಸುಂದರೇಶ ಬಾಬು

ಕೊಪ್ಪಳ: ಬಾಕಿ ಉಳಿದ ಮತದಾರರ ಆಧಾರ್-ಇಪಿಐಸಿ ಜೋಡಣೆ ಬೇಗನೆ ಪೂರ್ಣಗೊಳಿಸಬೇಕು ಎಂದು ಜಿಲ್ಲಾಧಿಕಾರಿ ಎಂ. ಸುಂದರೇಶ ಬಾಬು ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚಿಸಿದರು.

ಮತದಾರರ ಗುರುತಿನ ಚೀಟಿಗೆ ಆಧಾರ್ ಸಂಖ್ಯೆ ಜೋಡಣೆ ಮತ್ತು ಜಿಲ್ಲೆಯಲ್ಲಿ ಮಳೆಯಿಂದ ಹಾನಿಯಾದ ಬಗ್ಗೆ ಪರಿಹಾರ ಕ್ರಮಗಳ ಕುರಿತು ಅಧಿಕಾರಿಗಳ ಜೊತೆ ಶುಕ್ರವಾರ ನಡೆದ ವಿಡಿಯೊ ಕಾನ್ಸರೆನ್ಸ್‌ ಸಭೆಯಲ್ಲಿ ಮಾತನಾಡಿದ ಅವರು ‘ಭಾರತ ಚುನಾವಣಾ ಆಯೋಗದ ನಿರ್ದೇಶನದಂತೆ ಮತದಾರರ ಗುರುತಿನ ಚೀಟಿಗೆ ಆಧಾರ ಜೋಡಣೆ ಕಾರ್ಯದಲ್ಲಿ ಜಿಲ್ಲೆಯ ಒಟ್ಟು 11,05,345 ಮತದಾರರ ಪೈಕಿ 8,40,517 (ಶೇ.76.04) ಮತದಾರರ ಆಧಾರ್-ಇಪಿಐಸಿ ಜೋಡಣೆಯಾಗಿದೆ. ಉಳಿದವರ ಜೋಡಣೆ ಬಗ್ಗೆ ಅಧಿಕಾರಿಗಳು ಕ್ರಮ ವಹಿಸಬೇಕು’ ಎಂದರು.

ಹೆಚ್ಚುವರಿ ಜಿಲ್ಲಾಧಿಕಾರಿ ಸಾವಿತ್ರಿ ಬಿ. ಕಡಿ ‘ಮೂಲ ಸೌಕರ್ಯಗಳ ಹಾನಿಯ ವಿವರದಂತೆ ಪಂಚಾಯತ್ ರಾಜ್ ಇಲಾಖೆಗೆ ಸೇರಿದ ಅಂದಾಜು ₹226.05 ಲಕ್ಷದ 21 ಕಿ.ಮೀ ರಸ್ತೆ ಮತ್ತು ಅಂದಾಜು ಮೊತ್ತ ₹123.50 ಲಕ್ಷದ 11 ಸೇತುವೆಗಳು ಹಾನಿಯಾಗಿದೆ’ ಎಂದು ತಿಳಿಸಿದರು.