ಕೊಪ್ಪಳ |ಮಕ್ಕಳ ಕಲಿಕೆ ಸುಲಭವಾಗಿಸಿದ ಶಿಕ್ಷಕರು

ಕೊಪ್ಪಳ: ಪಠ್ಯಕ್ಕೆ ಸಂಬಂಧಿಸಿದ ಬರಹ, ಚಿತ್ರಗಳನ್ನು ತರಗತಿ ಹಾಗೂ ಶಾಲೆಯ ಆವರಣದಲ್ಲಿಯೂ ನೋಡಿ ವಿದ್ಯಾರ್ಥಿಗಳು ಸುಲಭವಾಗಿ ಕಲಿಯುವಂತೆ ಮಾಡುವ ಕೆಲಸವನ್ನು ಜಿಲ್ಲೆಯ ಸರ್ಕಾರಿ ಶಾಲೆಗಳ ಶಿಕ್ಷಕರು ಪರಿಣಾಮಕಾರಿಯಾಗಿ ಮಾಡುತ್ತಿದ್ದಾರೆ. 

ಜಿಲ್ಲೆಯ ಕುಕನೂರು ತಾಲ್ಲೂಕಿನ ಕುದುರಿಮೋತಿ ಗ್ರಾಮದಲ್ಲಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ 633 ವಿದ್ಯಾರ್ಥಿಗಳು ಹಾಗೂ 18 ಜನ ಶಿಕ್ಷಕರು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಈ ಶಾಲೆಯ ಮಕ್ಕಳಲ್ಲಿ ಕಲಿಕಾ ಆಸಕ್ತಿ ಪರಿಣಾಮಕಾರಿಯಾಗಿಸಲು ಶಾಲಾ ಸಿಬ್ಬಂದಿ ಪಠ್ಯಕ್ಕೆ ಸಂಬಂಧಿಸಿದ ವಿಷಯಗಳನ್ನು ಗೋಡೆಯ ಮೇಲೆ ಬರೆಯಿಸಿದ್ದಾರೆ.

ಪ್ರೌಢಶಾಲೆ ಹಂತದಲ್ಲಿ ಓದುವ ಮಕ್ಕಳು ಕಬ್ಬಿಣದ ಕಡಲೆ ಎಂದುಕೊಳ್ಳುವ ವಿಜ್ಞಾನ, ಗಣಿತ ಹಾಗೂ ಇಂಗ್ಲಿಷ್‌ ವಿಷಯಕ್ಕೆ ಸಂಬಂಧಿಸಿದಂತೆ ಹೆಚ್ಚು ವಿಷಯಗಳ ಚಿತ್ರಗಳನ್ನು ಬರೆಯಲಾಗಿದೆ. ಉಳಿದ ವಿಷಯಗಳ ಬಗ್ಗೆ ಪ್ರಾಜೆಕ್ಟರ್‌ಗಳ ಮೂಲಕ ತೋರಿಸಿ ಕಲಿಕೆ ಸುಲಭ ಮತ್ತು ಪರಿಣಾಮಕಾರಿಯಾಗಿ ಮಾಡಲಾಗುತ್ತಿದೆ.

ನೆರವಾದ ಶಿಕ್ಷಕರ ತಂಡ: ಸರ್ಕಾರಿ ಶಾಲೆಗಳ ಸಬಲೀಕರಣಕ್ಕಾಗಿ ಸರ್ಕಾರಿ ಶಿಕ್ಷಕರು ಸೇರಿ ‘ವಿಶ್ವಬಂಧು ಸೇವಾ ಗುರುಬಳಗ’ ಎನ್ನುವ ತಂಡವನ್ನು ಕೊಟ್ಟಿಕೊಂಡು ಸರ್ಕಾರಿ ಶಾಲೆಗಳಲ್ಲಿ ಫ್ಲೆಕ್ಸ್‌ಗಳನ್ನು ಅಳವಡಿಸಿ ಅದರಲ್ಲಿ ಪಠ್ಯಕ್ಕೆ ಸಂಬಂಧಿಸಿದ ವಿಷಯಗಳನ್ನು ಪೇಂಟಿಂಗ್‌ ಮಾಡಿದ್ದಾರೆ. ಫ್ಲೆಕ್ಸ್‌ ಜೊತೆಗೆ ಗೋಡೆಯಲ್ಲೂ ವಿಜ್ಞಾನ, ಸೌರಮಂಡಲ, ಸೌರಶಕ್ತಿ, ಗಣಿತದ ಪ್ರಮೇಯಗಳು ಹೀಗೆ ಅನೇಕ ವಿಷಯಗಳ ಬಗ್ಗೆ ಚಿತ್ರಿಸಲಾಗಿದೆ. ವಿದ್ಯಾರ್ಥಿಗಳು ಶಾಲೆಯ ಆವರಣದಲ್ಲಿ ಓಡಾಡುವಾಗ ಆ ಚಿತ್ರಗಳು ಆಕರ್ಷಿಸುತ್ತಿವೆ. ಇದು ಮಕ್ಕಳ ಕಲಿಕೆಯ ಆಸಕ್ತಿ ಹೆಚ್ಚಳಕ್ಕೂ ಕಾರಣವಾಗುತ್ತಿದೆ ಎನ್ನುತ್ತಾರೆ ಕುದುರಿಮೋತಿ ಶಾಲೆಯ ಶಿಕ್ಷಕರು.

20 ಜನ ಶಿಕ್ಷಕರಿಂದ ಆರಂಭವಾದ ಗುರುಬಳಗ ಈಗ 150ಕ್ಕೂ ಹೆಚ್ಚು ಜನರ ತಂಡವನ್ನು ಹೊಂದಿದೆ. ವಿವಿಧ ತಂಡಗಳಾಗಿ ಸರ್ಕಾರಿ ಶಾಲೆಗಳನ್ನು ಅಭಿವೃದ್ಧಿ ಮಾಡುತ್ತಿದ್ದು, ಕುದುರಿಮೋತಿ ಶಾಲೆಯಲ್ಲಿ ಮಾಡಿದ ಪಠ್ಯಗಳ ಗೋಡೆಬರಹದ ಚಿತ್ತಾರ ಮಕ್ಕಳ ಕಲಿಕೆಗೆ ಪೂರಕವಾಗಿದೆ. ಈ ತಂಡ ಐದು ವರ್ಷಗಳಿಂದ ಸರ್ಕಾರಿ ಶಾಲೆಗಳ ವಿದ್ಯಾರ್ಥಿಗಳ ಕಲಿಕೆಗೆ ನೆರವಾಗುತ್ತಿದೆ. ಕುದರಿಮೋತಿಯಂತೆಯೇ ಬೇರೆ ಸರ್ಕಾರಿ ಶಾಲೆಗಳಲ್ಲಿಯೂ ಇದು ಮಕ್ಕಳಿಗೆ ಅನುಕೂಲವಾಗಿದೆ.

ಐದು ವರ್ಷಗಳ ಹಿಂದೆ ಆರಂಭವಾಗಿರುವ ಶಿಕ್ಷಕರ ಸೇವಾಬಳಗ ಫ್ಲೆಕ್ಸ್‌ಗಳು, ಗೋಡೆಬರಹದ ಮೂಲಕ ಕಲಿಕೆಗೆ ಪ್ರೇರಣೆ ಮಕ್ಕಳ ಕಲಿಕಾ ಆಸಕ್ತಿ ಹೆಚ್ಚಿಸುತ್ತಿರುವ ಪಠ್ಯದ ಚಿತ್ರಗಳು