ಕೊಪ್ಪಳ: ನೆಟ್ಟ ಸಸಿಗಳ ಸುತ್ತಲೂ ತ್ಯಾಜ್ಯದ ರಾಶಿ

ಕಾರಟಗಿ: ಅಭಿವೃದ್ಧಿ ಹೆಸರಲ್ಲಿ ಮನುಷ್ಯನ ದುರಾಸೆಗೆ ಪರಿಸರ ಹಾಳಾಗುತ್ತಿದೆ. ಶುದ್ಧ ಗಾಳಿ, ನೀರು, ವಾತಾವರಣವೂ ಕಲುಷಿತಗೊಳ್ಳುತ್ತಿದೆ. ಸುತ್ತಲಿನ ವಾತಾವರಣವನ್ನು ಹಸಿರುಮಯ ಮಾಡಬೇಕೆನ್ನುವ ಕಾರಣಕ್ಕೆ ಅಲ್ಲಲ್ಲಿ ಸಸಿಗಳನ್ನು ನೆಡಲಾಗುತ್ತಿದೆಯಾದರೂ ಅವುಗಳ ನಿರ್ವಹಣೆ ಮತ್ತು ಪೋಷಣೆ ಮಾತ್ರ ಮಾಡುತ್ತಿಲ್ಲ. 

ಪರಿಸರ ದಿನ, ವನಮಹೋತ್ಸವಗಳ ನಿಮಿತ್ತ ಕಾರ್ಯಕ್ರಮ ರೂಪಿಸಿ ಸಸಿ ನೆಡುತ್ತಾರೆ. ಶಾಲಾ, ಕಾಲೇಜುಗಳಲ್ಲಿ ಸಸಿ ನೆಟ್ಟು, ಮನೆ ಮಕ್ಕಳಂತೆ ಫೋಷಿಸಿ, ಬೆಳೆಸಿರಿ ಎಂದು ಬೋಧನೆ ಮಾಡುತ್ತಾರೆ. ಆದರೆ ಸಸಿಗಳು ರಕ್ಷಣೆಯಿಲ್ಲದೆ ನಾಶವಾಗುತ್ತವೆ ಎಂಬುದು ಪರಿಸರ ಪ್ರೇಮಿಗಳ ಬೇಸರವಾಗಿದೆ.

ಇಲ್ಲಿನ ಪುರಸಭೆಯು ಹಸಿರೀಕರಣಕ್ಕೆ ಮುಂದಾಗಿ ಪಟ್ಟಣದ ನವಲಿ ವೃತ್ತ ಹಾಗೂ ಅಲ್ಲಿಂದ ಬೇವಿನಾಳ ತಿರುವಿನವರೆಗೆ ರಸ್ತೆ ಎಡ–ಬಲಗಳಲ್ಲಿ ಸಸಿ ನೆಡಲಾಗಿತ್ತು. ಮಹಿಳಾ ಸ್ವಸಹಾಯ ಗುಂಪುಗಳು ಕೂಡ ಸಸಿ ನೆಡುವ ಅಭಿಯಾನ ನಡೆಸಿದವು. ಆದರೆ ಸಸಿ ನೆಡುವಾಗಿನ ಉತ್ಸಾಹ, ಅವುಗಳ ಪೋಷಣೆ, ರಕ್ಷಣೆಗೆ ಕಂಡು ಬರಲಿಲ್ಲ ಎನ್ನುವುದು ಪರಿಸರ ಪ್ರೇಮಿಗಳ ಬೇಸರಕ್ಕೆ ಕಾರಣ. 

ಪಟ್ಟಣದ ಎಲ್‌ವಿಟಿ ಸಮೂಹ ಸಂಸ್ಥೆಯು ಕೆಲವು ಕಿ.ಮೀಗಳವರೆಗೆ ಸಸಿಗಳಿಗೆ ನೀರುಣಿಸಿ ಪರಿಸರ ಪ್ರಜ್ಞೆ ಮೆರೆಯಿತು. ಮಳೆಗಾಲ ಆರಂಭವಾಗಿದ್ದರಿಂದ ನೀರುಣಿಸುವ ಅವಶ್ಯವಿಲ್ಲ ಎಂದು ಬಿಟ್ಟಿದ್ದೇವೆ. ಮತ್ತೆ ಬೇಸಿಗೆಯಲ್ಲಿ ಅಗತ್ಯಬಿದ್ದರೆ ನೀರುಣಿಸುತ್ತೇವೆ ಎಂದು ಎಲ್‌ವಿಟಿ ಸಮೂಹ ಸಂಸ್ಥೆ ಮುಖ್ಯಸ್ಥ ಕೆ.ನಾಗಪ್ಪ ಹೇಳಿದ್ದಾರೆ.

ಪುರಸಭೆಯು ನೆಟ್ಟ ಸಸಿಗಳ ರಕ್ಷಣೆಯ ಹೊಣೆ ಹೊರಬೇಕು. ಜತೆಗೆ ಸಾರ್ವಜನಿಕರೂ ಪರಿಸರ ಕಾಳಜಿ ತೋರಿದರೆ ಸಸಿಗಳು ಮರಗಳಾಗುತ್ತವೆ.  ವಿದ್ಯಾರ್ಥಿಗಳೂ ಕೂಡ ಸಸಿಗಳನ್ನು ಮನೆಯ ಸದಸ್ಯರಂತೆ ಬೆಳೆಸಬೇಕು ಎಂದು ಶಿಕ್ಷಕರೊಬ್ಬರು ಕಿವಿಮಾತು ಹೇಳಿದರು. ಸಸಿಗಳನ್ನು ಬೆಳೆದ ಸುತ್ತಲೂ ತ್ಯಾಜ್ಯ ಎಸೆಯಲಾಗುತ್ತಿದೆ. ದಾರಿ ಹೋಕರು ಪ್ಲಾಸ್ಟಿಕ್‌ ತ್ಯಾಜ್ಯವನ್ನು ಸಾಕಷ್ಟು ಪ್ರಮಾಣದಲ್ಲಿ ಹಾಕುತ್ತಿರುವ ಕಾರಣ ಸಸಿಗಳು ದೊಡ್ಡವಾಗುವ ಮೊದಲೇ ನಶಿಸಿ ಹೋಗುತ್ತಿವೆ.

‘ಪುರಸಭೆ ವತಿಯಿಂದ ಈಗಾಗಲೇ ನೆಡಲಾಗಿರುವ ಸಸಿಗಳ ರಕ್ಷಣೆಯಾಗಬೇಕಿದೆ. ಸರಿಯಾದ ನಿರ್ವಹಣೆ ಇಲ್ಲದೆ ನೆಟ್ಟಿರುವ ಸಸಿಗಳ ನೆತ್ತಿಯ ಮೇಲೆ ವಿದ್ಯುತ್‌ ತಂತಿಗಳು ಹಾದು ಹೋಗಿವೆ. ಮುಂದಿನ ದಿನಗಳಲ್ಲಿ ಜೆಸ್ಕಾಂನವರು ಸಮೃದ್ಧವಾಗಿ ಬೆಳೆದಿರುವ ಮರಗಳಿಗೆ ಕತ್ತರಿ ಹಾಕುತ್ತಾರೆ. ಆಗ ಅಷ್ಟು ವರ್ಷಗಳ ಶ್ರಮ ಹಾಳಾಗುತ್ತದೆ. ಸಸಿಗಳಿಗೆ ಬಿದಿರಿನ ಆಧಾರ ಒದಗಿಸುವ ಅಗತ್ಯವಿದೆ. ಪುರಸಭೆಯವರು ಸಸಿಗಳ ರಕ್ಷಣೆ ಮಾಡಬೇಕು’ ಎಂದು ರಾಮನಗರದ ಕೆಂಚಪ್ಪ ಅಂಗಡಿ ಹೇಳುತ್ತಾರೆ.