ಕುಷ್ಟಗಿ: ತಂಗುದಾಣ ತೆರವಿಗೆ ‘ನಿರ್ಮಿತಿ’ಗೆ ತಾಕೀತು

ಕುಷ್ಟಗಿ: ಇಲ್ಲಿಯ ನ್ಯಾಯಾಲಯ ಸಂಕೀರ್ಣದ ಮುಂದಿನ ಮುಖ್ಯರಸ್ತೆಯಲ್ಲಿ ಪ್ರಯಾಣಿಕರ ಅನುಕೂಲದ ಉದ್ದೇಶಕ್ಕೆ ನಿರ್ಮಿಸಿರುವ ಶಾಶ್ವತ ತಂಗುದಾಣ ಎರಡು ವರ್ಷದಿಂದಲೂ ಅಪೂರ್ಣ ಸ್ಥಿತಿಯಲ್ಲಿದ್ದು ಸುಗಮ ಸಂಚಾರಕ್ಕೆ ಪ್ರಮುಖ ಅಡ್ಡಿಯಾಗಿದೆ.

ನ್ಯಾಯಾಲಯದ ಮುಂದೆ ನಿಂತು ಸಾರಿಗೆ ಸಂಸ್ಥೆ ಬಸ್‌ ಮೂಲಕ ಬೇರೆ ಬೇರೆ ಊರುಗಳಿಗೆ ತೆರಳುವ ಪ್ರಯಾಣಿಕರನ್ನು ಹತ್ತಿಸಿಕೊಳ್ಳಲು ಬಸ್‌ಗಳೂ ಕೂಡ ಇಲ್ಲಿಯೇ ನಿಲ್ಲುತ್ತವೆ. ಹಾಗಾಗಿ ಮಹಿಳೆಯರು, ಮಕ್ಕಳು, ವೃದ್ಧ ಪ್ರಯಾಣಿಕರಿಗೆ ಬಿಸಿಲು ಮಳೆಯಿಂದ ಆಗುತ್ತಿದ್ದ ತೊಂದರೆ ತಪ್ಪಿಸುವ ಉದ್ದೇಶದಿಂದ ತಂಗುದಾಣ ನಿರ್ಮಿಸಲು ಉದ್ದೇಶಿಸಲಾಗಿತ್ತು.

ಕಲ್ಯಾಣ ಕರ್ನಾಟಕ ಪ್ರದೇಶ ಅಭಿವೃದ್ಧಿ ಮಂಡಳಿ 2021-22ನೇ ಹಣಕಾಸು ವರ್ಷದಲ್ಲಿ ಈ ತಂಗುದಾಣ ನಿರ್ಮಾಣಕ್ಕೆ ₹ 10 ಲಕ್ಷ ಅನುದಾನ ಬಿಡುಗಡೆ ಮಾಡಿದ್ದು, ಇದರ ನಿರ್ಮಾಣದ ಹೊಣೆಯನ್ನು ಕೊಪ್ಪಳ ನಿರ್ಮಿತಿ ಕೇಂದ್ರಕ್ಕೆ ವಹಿಸಲಾಗಿತ್ತು. ಛಾವಣಿ ಹಂತದ ವರೆಗೆ ನಿರ್ಮಾಣಗೊಂಡಿರುವ ತಂಗುದಾಣ ಕಟ್ಟಡ ಕಾಮಗಾರಿಗೆ ನಿರ್ಮಿತಿ ಕೇಂದ್ರ ಈಗಾಗಲೇ ₹4.50 ಲಕ್ಷ ಖರ್ಚು ಮಾಡಿದೆ. ಆದರೆ ಲಕ್ಷಾಂತರ ಹಣ ಖರ್ಚಾದರೂ ಎರಡು ವರ್ಷದಿಂದ ಕಟ್ಟಡ ಕಳೆಬರದಂತೆ ನಿಂತಿದೆ ಎಂದು ಸಾರ್ವಜನಿಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ

ತೆರವಿಗೆ ಸೂಚನೆ: ಈ ವಿಷಯ ಕುರಿತಂತೆ ಲೋಕೋಪಯೋಗಿ ಇಲಾಖೆ ಪತ್ರವನ್ನು ಉಲ್ಲೇಖಿಸಿ ನಿರ್ಮಿತಿ ಕೇಂದ್ರದ ಯೋಜನಾ ನಿರ್ದೇಶಕರಿಗೆ 2022ರ ಅ.12 ರಂದು ಪತ್ರ ಬರೆದಿರುವ ಜಿಲ್ಲಾ ಪ್ರಧಾನ ಸಿವಿಲ್‌ ನ್ಯಾಯಾಧೀಶೆ ಬಿ.ಎಸ್‌.ರೇಖಾ, ನ್ಯಾಯಾಲಯದ ಕೆಲಸಕಾರ್ಯಗಳಿಗೆ ಅಡ್ಡಿಯಾಗುವ ಕಾರಣದಿಂದ ಕಟ್ಟಡವನ್ನು ತೆರವುಗೊಳಿಸುವಂತೆ ಸೂಚಿಸಿದ್ದರು. ಆದರೆ ಪತ್ರ ಬರೆದು ಎರಡು ವರ್ಷವಾಗುತ್ತ ಬಂದರೂ ನಿರ್ಮಿತಿ ಕೇಂದ್ರ ನ್ಯಾಯಾಧೀಶರ ಸೂಚನೆಯನ್ನು ಪಾಲಿಸದಿರುವುದು ಕಂಡುಬಂದಿದ್ದು ನಿರ್ಮಿತಿ ಕೇಂದ್ರ ಇಕ್ಕಟ್ಟಿಗೆ ಸಿಲುಕಿರುವುದು ಸ್ಪಷ್ಟವಾಗಿದೆ.

ಈ ಕುರಿತು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ನಿರ್ಮಿತಿ ಕೇಂದ್ರದ ಎಂಜಿನಿಯರ್ ಆದೇಶ ಗುಡಿಹಾಳ, ಕಟ್ಟಡ ತೆರವಿಗೆ ನ್ಯಾಯಾಲಯ ಲಿಖಿತ ಸೂಚನೆ ನೀಡಿದೆ, ಆದರೆ ತೆರವುಗೊಳಿಸುವುದಕ್ಕೆ ಅವಕಾಶವಿಲ್ಲ ಹಾಗಾಗಿ ಯಾವ ಕ್ರಮ ಕೈಗೊಳ್ಳಬೇಕೆಂಬುದು ಗೊತ್ತಾಗುತ್ತಿಲ್ಲ. ಈ ವಿಷಯದ ಬಗ್ಗೆ ಜಿಲ್ಲಾಧಿಕಾರಿಗೆ ವರದಿ ಸಲ್ಲಿಸಿದ್ದು ಅವರಿಂದ ಇನ್ನೂ ಯಾವ ಮಾರ್ಗದರ್ಶನವೂ ಬಂದಿಲ್ಲ ಎಂದು ವಿವರಿಸಿದರು.