ಶಿವರಾಮೇಗೌಡರ ಮಗಳ ಮದುವೆಗೆ ಹೈಟೆಕ್‌ ಆಮಂತ್ರಣ

ಮಂಡ್ಯ: ಬಿಜೆಪಿ ಮುಖಂಡ ಜನಾರ್ಧನ ರೆಡ್ಡಿ ಮಗಳ ಮದುವೆಯನ್ನು ಅದ್ದೂರಿಯಾಗಿ ನೆರವೇರಿಸಿ ಸುದ್ದಿಯಾದ ನಂತರ ನಾಗಮಂಗಲದ ಜೆಡಿಎಸ್‌ ಮುಖಂಡ ಎಲ್‌.ಆರ್‌.ಶಿವರಾಮೇಗೌಡ ಕೂಡ ತಮ್ಮ ಮಗಳು ಕಾವ್ಯಾ ಮದುವೆಯನ್ನು ಅದ್ದೂರಿಯಾಗಿ ನೆರವೇರಿಸಲು ಸಿದ್ಧತೆ ಮಾಡಿಕೊಂಡಿದ್ದಾರೆ.

ಹೈಟೆಕ್‌ ವಿಡಿಯೊ ಆಮಂತ್ರಣ ಪತ್ರಿಕೆ ಮಾಡಿಸಿದ್ದು, ಅದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ. ವಿಡಿಯೊದಲ್ಲಿ ಸಹ ಕಲಾವಿದರ ನೃತ್ಯವಿದ್ದು ಶಿವರಾಮೇಗೌಡ, ಪತ್ನಿ ಸುಧಾ, ಮಗಳು ಕಾವ್ಯಾ, ಭಾವಿ ಅಳಿಯ ರಾಜೀವ್‌ ಅವರು ಮದುವೆಗೆ ಆಮಂತ್ರಣ ನೀಡುವ ದೃಶ್ಯಗಳಿವೆ. ಡಿ.6ರಂದು ಬೆಂಗಳೂರಿನ ಅರಮನೆ ಮೈದಾನದಲ್ಲಿ ಆರತಕ್ಷತೆ ನಡೆಯಲಿದ್ದು, 7ರಂದು ವಿವಾಹ ನೆರವೇರಲಿದೆ.

ಜನಾರ್ಧನ ರೆಡ್ಡಿ ಪುತ್ರಿ ವಿವಾಹದ ನಂತರ ಇನ್ನೊಂದು ವೈಭವದ ವಿವಾಹ ನಡೆಯುವ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ನಡೆಯುತ್ತಿದೆ. ಪ್ರತಿಕ್ರಿಯೆ ಪಡೆಯಲು
ಶಿವರಾಮೇಗೌಡ ಅವರು ಸಂಪರ್ಕಕ್ಕೆ ಸಿಗಲಿಲ್ಲ.