ಮಂಡ್ಯದ ಮಹಿಳೆ ಹೆಸರಿನಲ್ಲಿ ದೆಹಲಿಯಲ್ಲಿ ಬ್ಯಾಂಕ್‌ ಖಾತೆ; ಸಿಬಿಐ, ಇ.ಡಿ ಪರಿಶೀಲನೆ

ಶ್ರೀರಂಗಪಟ್ಟಣ (ಮಂಡ್ಯ ಜಿಲ್ಲೆ): ಪಟ್ಟಣದ ರಂಗನಾಥನಗರದ ಶ್ರುತಿ ಎನ್‌. ಎಂಬವರ ಹೆಸರಿನಲ್ಲಿ ಬಿಹಾರದ ವ್ಯಕ್ತಿಯೊಬ್ಬ ದೆಹಲಿಯ ಬ್ಯಾಂಕೊಂದರಲ್ಲಿ ಖಾತೆ ತೆರೆದು ನೂರಾರು ಕೋಟಿ ರೂಪಾಯಿ ವ್ಯವಹಾರ ನಡೆಸಿರುವ ಪ್ರಕರಣದ ಬೆನ್ನತ್ತಿರುವ ಸಿಬಿಐ ಮತ್ತು ಇ.ಡಿ ಅಧಿಕಾರಿಗಳು ಮಂಗಳವಾರ ಸಂಜೆ ಇಲ್ಲಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ರಂಗನಾಥನಗರದ ಭೈರವ ಅವರ ಪತ್ನಿ ಶೃತಿ ಅವರ ಮನೆಗೆ ಬೆಂಗಳೂರಿನಿಂದ ಬಂದ ಅಧಿಕಾರಿಗಳ ತಂಡ ಒಂದು ತಾಸಿಗೂ ಹೆಚ್ಚು ಕಾಲ ವಿಚಾರಣೆ ನಡೆಸಿತು. ಅವರ ಬ್ಯಾಂಕ್‌ ಖಾತೆ, ಆಧಾರ್‌ ಚೀಟಿ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಅಧಿಕಾರಿಗಳು ಪಡೆದುಕೊಂಡರು.

ಬೆಂಗಳೂರು ವಲಯದ ಇ.ಡಿ ಅಧಿಕಾರಿ ಬಿನಯ್‌ಕುಮಾರ್, ಸಿಬಿಐ ಅಧಿಕಾರಿ ಎಂ. ಕುಮಾರಸ್ವಾಮಿ ತಂಡ ಭೈರವ ಅವರಿಂದ ಮಾಹಿತಿ ಪಡೆದಿದೆ. ಈ ಸಂದರ್ಭದಲ್ಲಿ ಶ್ರುತಿ ಅವರು ಮನೆಯಲ್ಲಿ ಇರಲಿಲ್ಲ ಎಂದು ತಿಳಿದು ಬಂದಿದೆ.

‘ಅಗತ್ಯ ಬಿದ್ದರೆ ಇ.ಡಿ ಮತ್ತು ಸಿಬಿಐನ ಬೆಂಗಳೂರಿನಲ್ಲಿನ ಕಚೇರಿಗಳಿಗೆ ಅವರನ್ನು ಕರೆತರಬೇಕು ಎಂದು ಭೈರವ ಅವರಿಗೆ ತಿಳಿಸಿದ್ದು, ನೋಟಿಸ್‌ ಕೂಡ ನೀಡಿದ್ದಾರೆ’ ಎಂದು ಸ್ಥಳೀಯ ಪೊಲೀಸರು ಮಾಹಿತಿ ನೀಡಿದ್ದಾರೆ.