ಪ್ರತಿ ದಿನ ಅನುಕಂಪ ಗಿಟ್ಟಿಸಲು ಅಸಾಧ್ಯ: ನಿಖಿಲ್ ಕುಮಾರಸ್ವಾಮಿ

ಮದ್ದೂರು: ‘ಮಂಡ್ಯ ಜಿಲ್ಲೆಯಲ್ಲಿರುವ ನಮ್ಮ ಪಕ್ಷದ ಶಾಸಕರ ವಿರುದ್ಧ ವಿನಾಕಾರಣ, ಕಾಲು ಕೆರೆದುಕೊಂಡು ಮಾತನಾಡಿ ಮತ್ತೆ ಅನುಕಂಪ ಗಿಟ್ಟಿಸಬಹುದು ಎಂದು ಭಾವಿಸಿದ್ದರೆ ಅದು ಪ್ರತಿ ದಿನ ಅಸಾಧ್ಯ’ ಎಂದು ಜೆಡಿಎಸ್ ಯುವ ಘಟಕದ ಅಧ್ಯಕ್ಷ ನಿಖಿಲ್ ಕುಮಾರಸ್ವಾಮಿ ಸಂಸದೆ ಸುಮಲತಾ ಅಂಬರೀಶ್‌ ವಿರುದ್ಧ ಕಿಡಿಕಾರಿದರು.

ಪಟ್ಟಣದಲ್ಲಿರುವ ಶಾಸಕ ಡಿ.ಸಿ.ತಮ್ಮಣ್ಣ ಅವರ ಮನೆಗೆ ಭಾನುವಾರ ಭೇಟಿ ನೀಡಿ ಶಾಸಕರಿಂದ ಅಭಿನಂದನೆ ಸ್ವೀಕರಿಸಿ ಸುದ್ಧಿಗಾರರೊಂದಿಗೆ ಅವರು ಮಾತನಾಡಿದರು.

‘ಅಪರೂಪಕ್ಕೊಮ್ಮೆ ಜಿಲ್ಲೆಗೆ ಬರುವ ಸಂಸದರು ಬಂದಾಗಲೆಲ್ಲ ಶಾಸಕರನ್ನು ಕೆಣಕುವುದು, ಪ್ರಶ್ನಿಸುತ್ತಾರೆ. ಶಾಸಕರನ್ನು ಪ್ರಶ್ನಿಸಲು ಅವರು ಯಾರು? ಶಾಸಕರನ್ನು ಜನರು ಆರಿಸಿ ಕಳುಹಿಸಿರುವ ಜನರೇ ಅವರನ್ನು ಪ್ರಶ್ನೆ ಮಾಡುತ್ತಾರೆ. ಮುಂದಿನ ದಿನಗಳಲ್ಲಿ ರಾಜ್ಯದಾದ್ಯಂತ ಪ್ರವಾಸ ಮಾಡಿ ಪಕ್ಷ ಸಂಘಟಿಸುತ್ತೇನೆ’ ಎಂದರು.