ಮೈಸೂರು: ವಾಯುಮಾಲಿನ್ಯದಲ್ಲಿ ಗಮನಾರ್ಹ ಇಳಿಕೆ

ಮೈಸೂರು: ‘ಲಾಕ್‌ಡೌನ್‌’ನಿಂದಾಗಿ ವಾಯು ಮಾಲಿನ್ಯದ ಪ್ರಮಾಣ ತೀವ್ರವಾಗಿ ಕಡಿಮೆಯಾಗಿದೆ. ಹೆಬ್ಬಾಳದಲ್ಲಿರುವ ಮಾಲಿನ್ಯ ನಿಯಂತ್ರಣ ಮಂಡಳಿಯ ವಾಯು ಮಾಲಿನ್ಯ ಮಾಪನ ಕೇಂದ್ರದ ಅಂಕಿಅಂಶಗಳು ಈ ಅಂಶವನ್ನು ದೃಢೀಕರಿಸುತ್ತವೆ.

ಮಾರ್ಚ್ 21ರಂದು ‘ಪಿಎಂ 10’ ಅಂಶವು 88.02 ಇದ್ದದ್ದು, ಜನತಾ ಕರ್ಫ್ಯೂ ದಿನ 40.96ಕ್ಕೆ ಇಳಿಕೆ ಕಂಡಿದೆ. ಪಿಎಂ 2.5 ಅಂಶವು 26.73ರಿಂದ 20.01, ಸಾರಜನಕದ ಡೈ ಆಕ್ಸೈಡ್‌ ಪ್ರಮಾಣ 34.48ರಿಂದ 9.13 ಹಾಗೂ ಗಂಧಕದ ಡೈ ಆಕ್ಸೈಡ್‌ 1.16 ರಿಂದ 0.34ಗೆ ಇಳಿಕೆಯಾಗಿತ್ತು.

ಇದರ ಮರು ದಿನ ಅಂದರೆ ಮಾರ್ಚ್ 23ರಂದು ‘ಪಿಎಂ 10’ ಅಂಶವು 49.79, ಪಿಎಂ 2.5 ಅಂಶವು 21.87 ಹಾಗೂ ಸಾರಜನಕದ ಡೈ ಆಕ್ಸೈಡ್‌ ಪ್ರಮಾಣ 14.99 ಹಾಗೂ ಗಂಧಕದ ಡೈ ಆಕ್ಸೈಡ್‌ 0.25 ಇತ್ತು ಎಂದು ಅಂಕಿ ಅಂಶ ಹೇಳುತ್ತವೆ.

ಈ ಕುರಿತು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ಮಾಲಿನ್ಯ ನಿಯಂತ್ರಣ ಮಂಡಳಿಯ ಪರಿಸರ ಅಧಿಕಾರಿ ಪ್ರಕಾಶ್, ‘ಲಾಕ್‌ಡೌನ್‌ನಿಂದ ವಾಯು ಮಾಲಿನ್ಯದ ಪ್ರಮಾಣ ಕಡಿಮೆಯಾಗಿರುವುದು ನಿಜ. ಇದೊಂದು ಸಕಾರಾತ್ಮಕ ಪರಿಣಾಮ’ ಎಂದು ತಿಳಿಸಿದರು.

ಪಿಎಂ 10 ಮತ್ತು ಪಿಎಂ 2.5 ಎಂದರೆ ಏನು?

ಗಾಳಿಯಲ್ಲಿರುವ ಮಾಲಿನ್ಯಕಾರಕ ಕಣಗಳನ್ನು ಗುರುತಿಸಲು ಅವುಗಳ ಗಾತ್ರಕ್ಕೆ ತಕ್ಕಂತೆ ಪಿಎಂ 10, ಪಿಎಂ 2.5 ಎಂದು ಕರೆಯಲಾಗುತ್ತದೆ. ಪಿಎಂ ಎಂದರೆ ‘ಪರ್ಟಿಕ್ಯುಲೇಟ್ ಮ್ಯಾಟರ್’ ಎಂದರ್ಥ. ಇಂಗಾಲದ ಡೈ ಆಕ್ಸೈಡ್, ಇಂಗಾಲದ ಮಾನಾಕ್ಸೈಡ್, ಸಾರಜನಕದ ಆಕ್ಸೈಡ್‌ನ ಕಣಗಳು ಈ ಸೂಕ್ಷ್ಮರೂಪದಲ್ಲಿರುತ್ತವೆ.