ನೌಕರನ ಜತೆಯಲ್ಲಿದ್ದ ಇಬ್ಬರಿಗೆ ಕೋವಿಡ್–19
ಮೈಸೂರು ಜಿಲ್ಲೆಯಲ್ಲಿ ಪೀಡಿತರ ಸಂಖ್ಯೆ 21ಕ್ಕೇರಿಕೆ
ಮೈಸೂರು: ನಂಜನಗೂಡಿನ ಔಷಧ ಕಾರ್ಖಾನೆಯ ನೌಕರನ ಜತೆಯಲ್ಲಿದ್ದ ಇಬ್ಬರಿಗೆ ಮಂಗಳವಾರ ಕೋವಿಡ್–19 ದೃಢಪಟ್ಟಿದೆ.
ಇದರಿಂದ ಕೋವಿಡ್–19 ಪೀಡಿತ ರೋಗಿಗಳ ಸಂಖ್ಯೆ ಜಿಲ್ಲೆಯಲ್ಲಿ 21ಕ್ಕೇರಿದಂತಾಗಿದೆ. ದಿನೇ ದಿನೇ ಪೀಡಿತರ ಸಂಖ್ಯೆ ಹೆಚ್ಚುತ್ತಿರುವುದು ಜಿಲ್ಲೆಯ ಜನರು ಸೇರಿದಂತೆ ಔಷಧ ಕಾರ್ಖಾನೆಯ ನೌಕರರು, ಅವರ ಕುಟುಂಬ ವರ್ಗದಲ್ಲೂ, ಸಂಬಂಧಿಕರಲ್ಲೂ ಆತಂಕ ಹೆಚ್ಚಿಸುತ್ತಿದೆ.
ಮಾರ್ಚ್‌ 30ರಂದು ಕೋವಿಡ್–19 ದೃಢಪಟ್ಟಿದ್ದ ಕಾರ್ಖಾನೆಯ ನೌಕರನ (ರೋಗಿ ಸಂಖ್ಯೆ 88) ಜತೆಯಲ್ಲಿ ವಾಸವಿದ್ದ 24 ಹಾಗೂ 22 ವರ್ಷದ ಯುವಕರಿಬ್ಬರೂ ಮಂಗಳವಾರ ಕೋವಿಡ್ ಪೀಡಿತರಾಗಿರುವುದು ಖಚಿತಪಟ್ಟಿದೆ.
ಕೋವಿಡ್ ಪೀಡಿತ ಕಾರ್ಖಾನೆಯ ನೌಕರ ನಂಜನಗೂಡಿನ ನಿವಾಸಿ ಎಂದು ಆರೋಗ್ಯ ಇಲಾಖೆ, ಜಿಲ್ಲಾಡಳಿತದ ಮೂಲಕ ಬಿಡುಗಡೆ ಮಾಡಿದ್ದ ಹೆಲ್ತ್ ಬುಲೆಟಿನ್‌ನಲ್ಲಿ ತಿಳಿಸಿತ್ತು.
ಮಂಗಳವಾರ ರಾಜ್ಯ ಸರ್ಕಾರ ಬಿಡುಗಡೆ ಮಾಡಿರುವ ಹೆಲ್ತ್ ಬುಲೆಟಿನ್‌ನಲ್ಲಿ ಹೊಸ ರೋಗಿಗಳಿಬ್ಬರು ಮೈಸೂರು ವಾಸಿಗಳು, ರೋಗಿ ಸಂಖ್ಯೆ 88ರ ಜತೆಯಲ್ಲಿ ವಾಸವಿದ್ದರು ಎಂದು ನಮೂದಿಸಿದೆ. ಇದು ಜನರಲ್ಲಿ ಗೊಂದಲ ಸೃಷ್ಟಿಸಿದೆ.
ಹೊಸದಾಗಿ ಕೋವಿಡ್–19 ಪೀಡಿತರ ಪಟ್ಟಿಗೆ ಸೇರ್ಪಡೆಗೊಂಡವರು ನಂಜನಗೂಡಿನ ಔಷಧ ಕಾರ್ಖಾನೆಯ ನೌಕರರೋ ಅಥವಾ ಈಗಾಗಲೇ ಕೋವಿಡ್ ಪೀಡಿತನಾದ ನೌಕರನ ಗೆಳೆಯರೋ, ಸಂಬಂಧಿಗಳೋ ಎಂಬುದು ಸ್ಪಷ್ಟವಾಗದಾಗಿದೆ. ಈ ಕುರಿತು ಆರೋಗ್ಯ ಇಲಾಖೆಯ ಉನ್ನತ ಅಧಿಕಾರಿಗಳನ್ನು ಸಂಪರ್ಕಿಸಲು ಯತ್ನಿಸಿದರೂ ಲಭ್ಯವಾಗಲಿಲ್ಲ. ಸಂಪರ್ಕಕ್ಕೆ ಸಿಕ್ಕ ಅಧಿಕಾರಿಗಳು ಸಹ ಗೊಂದಲ ಪರಿಹರಿಸಲಿಲ್ಲ.
Lok Sabha Elections Results 2024 |ನರೇಂದ್ರ ಮೋದಿ ಅವರ 'ವಿಕಸಿತ ಭಾರತ' ಅಥವಾ ರಾಹುಲ್ ಗಾಂಧಿ ಅವರ ಇಂಡಿಯಾ ಐಕ್ಯ ಭಾರತ? ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವದ 18ನೇ ಲೋಕಸಭೆಗೆ ನಡೆದ ಚುನಾವಣೆ ಫಲಿತಾಂಶದ ಕ್ಷಣ ಕ್ಷಣದ ಮಾಹಿತಿ, ವಿಶ್ವಾಸಾರ್ಹ ವಿಶ್ಲೇಷಣೆ, ಅಂಕಿ ಅಂಶಗಳಿಗಾಗಿ ಪ್ರಜಾವಾಣಿ ನೋಡಿ. ಇದರ ಜೊತಗೆ, ಆಂಧ್ರಪ್ರದೇಶ ಮತ್ತು ಒಡಿಶಾ ವಿಧಾನಸಭೆ ಚುನಾವಣೆಯ ಫಲಿತಾಂಶವೂ ಇಲ್ಲೇ ಲಭ್ಯ. ಪ್ರಜಾವಾಣಿಯನ್ನು ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಫಾಲೋ ಮಾಡಲು ಮರೆಯದಿರಿ.