ದೊಡ್ಡಮ್ಮತಾಯಿ ದೇವಾಲಯ: ಅಭಿವೃದ್ಧಿ ಕಾಮಗಾರಿಗೆ ಚಾಲನೆ

ಬೆಟ್ಟದಪುರ: ಸಮೀಪದ ಬೆಟ್ಟದತುಂಗ ಗ್ರಾಮದ ದೊಡ್ಡಮ್ಮತಾಯಿ ದೇವಾಲಯಕ್ಕೆ ತಳಿಗೆ ಸೇವೆ ಮಾಡಲು ಬರುವ ಭಕ್ತಾದಿಗಳ ಅನುಕೂಲಕ್ಕಾಗಿ ದೇವಾಲಯ ಆವರಣದಲ್ಲಿ ಅಭಿವೃದ್ಧಿ ಕಾಮಗಾರಿಗೆ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಪ್ರೀತಿ ಅರಸ್ ಚಾಲನೆ ನೀಡಿದರು.

ಬಳಿಕ ಮಾತನಾಡಿ, ‘ತಳಿಗೆ ಸೇವೆ ಸ್ಥಳದ ಕಾಮಗಾರಿ ಪೂರ್ಣಗೊಂಡ ಬಳಿಕ ದೇವಾಲಯದಲ್ಲಿ ಅನ್ನಪ್ರಸಾದ ತಯಾರಿ ಹಾಗೂ ಹರಕೆ ಸೇವೆಗಳನ್ನು ಸುಸೂತ್ರವಾಗಿ ನಡೆಸಲು ಭಕ್ತಾದಿಗಳಿಗೆ ಅನುಕೂಲವಾಗಲಿದೆ. ಕಾಮಗಾರಿಯನ್ನು ವೈಯಕ್ತಿಕವಾಗಿ, ಸರ್ವಸದಸ್ಯರ ಸಹಕಾರದಿಂದ, ಗ್ರಾಮಸ್ಥರ ಒಪ್ಪಿಗೆಯ ಮೇರೆಗೆ ಕಾಮಗಾರಿ ಕೈಗೊಳ್ಳಲಾಗಿದೆ. ಗ್ರಾಮ ಪಂಚಾಯಿತಿಯಿಂದ ದೇವಾಲಯಕ್ಕೆ ಕುಡಿಯುವ ನೀರಿನ ವ್ಯವಸ್ಥೆಯನ್ನೂ ಮಾಡಿಸಲಾಗಿದೆ’ ಎಂದರು.

ಪಿಡಿಒ ಚೇತನ್, ಕಾರ್ಯದರ್ಶಿ ಚಂದ್ರಹಾಸ, ಸದಸ್ಯರಾದ ಸ್ವಾಮಿ, ಕುಮಾರ, ರವಿ, ಸತೀಶ್, ಮಾದೇವ್, ರೇಣುಕಾ, ಬಿಂದು, ರತ್ನಮ್ಮ, ಅಣ್ಣಯ್ಯ, ಆನಂದ ಭಾಗವಹಿಸಿದ್ದರು.