ಗಿಗ್‌ ಕಾರ್ಮಿಕರ ವಿಮಾ ಯೋಜನೆ: ಬೆಂಗಳೂರು ಮುಂದೆ, ಜಿಲ್ಲೆಗಳು ಹಿಂದೆ

ಮೈಸೂರು: ‘ಅಸಂಘಟಿತ’ ಕಾರ್ಮಿಕರಿಗೆ ಸಹಾಯಹಸ್ತ ಚಾಚಲು ದೇಶದಲ್ಲಿಯೇ ಮೊದಲ ಬಾರಿಗೆ ರಾಜ್ಯದಲ್ಲಿ ಜಾರಿಗೊಳಿಸಲಾಗಿರುವ ‘ಗಿಗ್‌ ಕಾರ್ಮಿಕರ ವಿಮಾ ಯೋಜನೆ’ಯಡಿ ಮೇ ಮೊದಲ ವಾರದವರೆಗೆ 10,205 ಮಂದಿ ನೋಂದಾಯಿಸಿದ್ದಾರೆ. 5 ಸಾವಿರ ಮೀರಿದ ನೋಂದಣಿಯಿಂದ ಬೆಂಗಳೂರು ನಗರ ಜಿಲ್ಲೆ ಮೊದಲ ಸ್ಥಾನದಲ್ಲಿದೆ.

ಕಾರ್ಮಿಕ ಇಲಾಖೆಯು ಅನುಷ್ಠಾನ ಗೊಳಿಸಿರುವ ಈ ಯೋಜನೆಯಡಿ ಬಾಗಲಕೋಟೆ, ಚಾಮರಾಜನಗರ, ಚಿಕ್ಕಬಳ್ಳಾಪುರ, ಚಿಕ್ಕಮಗಳೂರು, ಹಾವೇರಿ, ಮಂಡ್ಯ ಹಾಗೂ ಯಾದಗಿರಿ ಜಿಲ್ಲೆಗಳಲ್ಲಿ ಎರಡಂಕಿಯ ನೋಂದಣಿಯಷ್ಟೇ ಆಗಿದೆ. ಉಳಿದ ಜಿಲ್ಲೆಗಳಲ್ಲಿ ಮೂರಂಕಿ ತಲುಪಿದೆ.

‘ಸೇವಾ ಸಿಂಧು’ ಪೋರ್ಟಲ್‌ ಮೂಲಕ ನೋಂದಣಿಗೆ ಅವಕಾಶ ವಿದ್ದು, 9,379 ಅರ್ಜಿಗಳನ್ನು ಅನುಮೋದಿಸಲಾಗಿದೆ. 756 ಅರ್ಜಿಗಳು ಪರಿಶೀಲನೆ ಹಂತದಲ್ಲಿವೆ. 31 ತಿರಸ್ಕೃತಗೊಂಡಿವೆ.

ಕರ್ತವ್ಯದಲ್ಲಿ ಇಲ್ಲದಿರುವಾಗಲೂ: ರಾಜ್ಯದಲ್ಲಿ ‘ಗಿಗ್’ ಕ್ಷೇತ್ರದ ಕಾರ್ಮಿಕರು (ವಸ್ತುಗಳು, ಆಹಾರ ಪದಾರ್ಥ ಮೊದಲಾದವುಗಳನ್ನು ತಲುಪಿಸುವ ಸ್ವತಂತ್ರ ಕಾರ್ಮಿಕರು) 2.39 ಲಕ್ಷ ಇರಬಹುದೆಂದು ಅಂದಾಜಿಸಲಾಗಿದೆ. ಅವರಿಗಾಗಿ ತಂದಿರುವ ಯೋಜನೆಯ ಸೌಲಭ್ಯವು ಕರ್ತವ್ಯದಲ್ಲಿರುವಾಗ ಅಥವಾ ಇಲ್ಲದಿರುವಾಗ ಸಂಭವಿಸುವ ಅಪಘಾತಗಳಿಗೂ ಅನ್ವಯ ಆಗುತ್ತದೆ. ಪ್ರೀಮಿಯಂ ಪಾವತಿಸದೆ ಉಚಿತವಾಗಿ ನೋಂದಾಯಿಸಬಹುದು.

ಸ್ವಿಗ್ಗಿ, ಜೊಮ್ಯಾಟೊಗಳಂತಹ ಸಂಸ್ಥೆಗಳಲ್ಲಿ ಫುಡ್‌ ಡೆಲಿವರಿ ಮಾಡುವ ಹಾಗೂ ಇ–ಕಾಮರ್ಸ್‌ ಸಂಸ್ಥೆಗಳಾದ ಅಮೆಜಾನ್, ಪ್ಲಿಫ್‌ಕಾರ್ಟ್, ಬಿಗ್‌ಬಾಸ್ಕೆಟ್, ಪೋರ್ಟರ್, ಫಾರ್ಮಸಿ, ಬ್ಲಿಂಕ್‌ಇಟ್‌, ಜೆಪ್ಟೋ, ಬಿಗ್ ಬಾಸ್ಕೆಟ್, ಡಾಮಿನೋಜ್ ಮೊದಲಾದ ಕಂಪನಿಗಳಲ್ಲಿ ಡೆಲಿವರಿ ವೃತ್ತಿಯಲ್ಲಿ ತೊಡಗಿರುವವರನ್ನು ‘ಗಿಗ್’ ಕಾರ್ಮಿಕರೆಂದು ಪರಿಗಣಿಸಲಾಗಿದೆ. ಅವರು ಹಾಗೂ ಕುಟುಂಬದವರಿಗೆ ಸಾಮಾಜಿಕ ಭದ್ರತೆ ಒದಗಿಸುವುದೇ ಯೋಜನೆಯ ಉದ್ದೇಶ.

ಕಂಪನಿಗಳಿಗೆ ಮನವಿ: ‘ಯೋಜನೆಗೆ ಉತ್ತಮ ಪ್ರತಿಕ್ರಿಯೆ ದೊರೆಯುತ್ತಿದ್ದು, ಜಾಗೃತಿ ಮೂಡಿಸಲಾಗುತ್ತಿದೆ. ನೋಂದಣಿ ಮಾಡಿಸಲೆಂದು ಶಿಬಿರ ಗಳನ್ನೂ ಆಯೋಜಿಸುತ್ತಿದ್ದೇವೆ. ತಮ್ಮ ಬಳಿ ಕೆಲಸ ಮಾಡುತ್ತಿರುವ ಕಾರ್ಮಿಕರ ನೋಂದಣಿಗೆ ಕ್ರಮ ಕೈಗೊಳ್ಳುವಂತೆ ಆಯಾ ಕಂಪನಿಯವರಿಗೇ (ಅಗ್ರಿಗೇಟರ್ಸ್‌) ಕೋರುತ್ತಿದ್ದೇವೆ’ ಎಂದು ಇಲಾಖೆಯ ಆಯುಕ್ತ ಎಚ್‌.ಎನ್. ಗೋಪಾಲಕೃಷ್ಣ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ನೋಂದಾಯಿಸಿದ ಗಿಗ್ ಕಾರ್ಮಿಕ ಅ‍ಪಘಾತದಿಂದ ಮೃತಪಟ್ಟರೆ ವಿಮಾ ಪರಿಹಾರವಾಗಿ ₹2 ಲಕ್ಷ ಹಾಗೂ ಜೀವ ವಿಮೆಯ ಮೊತ್ತ ₹2 ಲಕ್ಷ ಸೇರಿ ಒಟ್ಟು ₹4 ಲಕ್ಷ ಕುಟುಂಬದವರಿಗೆ ದೊರೆಯಲಿದೆ. ಶಾಶ್ವತ ಅಂಗವಿಕಲತೆ ಹೊಂದಿದಲ್ಲಿ ₹2 ಲಕ್ಷ, ಆಸ್ಪತ್ರೆ ವೆಚ್ಚವಾಗಿ ₹1 ಲಕ್ಷದವರೆಗೆ ಹಾಗೂ ಜೀವ ವಿಮೆಯಾಗಿ ₹2 ಲಕ್ಷ ಸಿಗುತ್ತದೆ. ಈ ಕಾರ್ಮಿಕರು ಸೌಲಭ್ಯ ಪಡೆದುಕೊಳ್ಳಲು ಮುಂದೆ ಬರಬೇಕು. ಅವರಿಗೆ ಮತ್ತಷ್ಟು ಸಾಮಾಜಿಕ ಭದ್ರತೆ ಕಲ್ಪಿಸುವ ಆಶಯದೊಂದಿಗೆ, ಅವರಿಗಾಗಿಯೇ ಪ್ರತ್ಯೇಕ ಮಂಡಳಿ ರಚನೆಗೂ ಸರ್ಕಾರ ಕ್ರಮ ವಹಿಸಿದೆ’ ಎಂದು ತಿಳಿಸಿದರು.

ನೋಂದಣಿಯಲ್ಲಿ ಟಾಪ್‌ 10 ಜಿಲ್ಲೆಗಳು

• ಬೆಂಗಳೂರು; 5,349

• ಧಾರವಾಡ; 512

• ದಕ್ಷಿಣ ಕನ್ನಡ; 398

• ಬೆಳಗಾವಿ; 371

• ಉತ್ತರಕನ್ನಡ; 336

• ಮೈಸೂರು; 285

• ದಾವಣಗೆರೆ; 208

• ವಿಜಯಪುರ; 176

• ತುಮಕೂರು; 167

• ಶಿವಮೊಗ್ಗ; 162

(ಮಾಹಿತಿ: ಕಾರ್ಮಿಕ ಇಲಾಖೆ)