ಹುಣಸೂರು: ವಿಶ್ವಶಾಂತಿ ಸಂಸ್ಥೆಯ ಲಕ್ಕಪ್ಪ ಸ್ವಾಮೀಜಿ ನಿಧನ

ಹುಣಸೂರು: ತಾಲ್ಲೂಕಿನ ರತ್ನಾಪುರಿ ಗ್ರಾಮದ ವಿಶ್ವಶಾಂತಿ ಸಂಸ್ಥೆಯ ಸ್ಥಾಪಕ, ಶಿಕ್ಷಣ ತಜ್ಞ ಲಕ್ಕಪ್ಪ ಸ್ವಾಮೀಜಿ (95) ಬುಧವಾರ ರಾತ್ರಿ ಆಶ್ರಮದಲ್ಲಿ ನಿಧನರಾದರು. ಅಂತ್ಯಕ್ರಿಯೆ ಗುರುವಾರ ಆಶ್ರಮದಲ್ಲೇ ನಡೆಯಿತು.

ಅವರು ದಲಿತ ಮತ್ತು ಹಿಂದುಳಿದ ವರ್ಗದ ಮಕ್ಕಳಿಗೆ ಶಿಕ್ಷಣ ನೀಡಲೆಂದು ಸಂಸ್ಥೆಯನ್ನು 70ರ ದಶಕದಲ್ಲಿ ಆರಂಭಿಸಿದರು. ಪ್ರಾಥಮಿಕ ಹಂತದಿಂದ ಪದವಿಯವರೆಗೂ ಸಂಸ್ಥೆಯು ಎಲ್ಲ ಸಮುದಾಯದ ಮಕ್ಕಳಿಗೆ ಶಿಕ್ಷಣ ನೀಡುತ್ತಿದೆ. ಗ್ರಾಮೀಣ ಮಕ್ಕಳಿಗೆ ವಸತಿ ಮತ್ತು ಬಿಸಿಯೂಟದ ವ್ಯವಸ್ಥೆಯೂ ಇದೆ. ದಲಿತ ಸಮುದಾಯದ ಅವರು ಪದವೀಧರರು. ಸರ್ಕಾರಿ ಉದ್ಯೋಗವನ್ನು ತ್ಯಜಿಸಿ, ಸನ್ಯಾಸತ್ವ ದೀಕ್ಷೆ ಪಡೆದಿದ್ದರು. ಸಾವಿರಾರು ವಿದ್ಯಾರ್ಥಿಗಳು ಸ್ವಾಮೀಜಿಗೆ ಅಂತಿಮ ನಮನ ಸಲ್ಲಿಸಿದರು.