ಕವಿತಾಳ | ರಸ್ತೆ ದುರಸ್ತಿಗಿಲ್ಲ ಕಾಳಜಿ: ತಪ್ಪದ ಸಂಕಷ್ಟ

ಕವಿತಾಳ: ಬೆಳಗಾವಿ–ರಾಯಚೂರು ಚತುಷ್ಪಥ ರಾಷ್ಟ್ರೀಯ ಹೆದ್ದಾರಿ ನಿರ್ಮಾಣ ಕಾಮಗಾರಿ ಕಾರಣ ಭಾರಿ ವಾಹನ ಸಂಚಾರದಿಂದ ಸರ್ವೀಸ್‌ ರಸ್ತೆಗಳು ಹದಗೆಟ್ಟಿವೆ. ಗುತ್ತಿಗೆ ಪಡೆದ ಕಂಪನಿ, ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳು ಸರ್ವೀಸ್‌ ರಸ್ತೆ ದುರಸ್ತಿಗೆ ಕಾಳಜಿ ವಹಿಸುತ್ತಿಲ್ಲ. ಸಾರ್ವಜನಿಕರು, ವಾಹನ ಸವಾರರು ತೀವ್ರ ಸಮಸ್ಯೆ ಎದುರಿಸುವಂತಾಗಿದೆ.

ಇಲ್ಲಿನ ಮಸ್ಕಿ ರಸ್ತೆ ಹಾಗೂ ಆನಂದಗಲ್‌ ಗ್ರಾಮದ ಹತ್ತಿರ ತಾತ್ಕಾಲಿಕ ಕ್ಯಾಂಪ್‌ ಹಾಕಲಾಗಿದೆ. ಕಂಕರ್‌, ಮರಂ ಹಾಗೂ ಮತ್ತಿತರ ಅಗತ್ಯ ಸಾಮಗ್ರಿಯನ್ನು ಬೇರೆಡೆಯಿಂದ ತಂದು ಇಲ್ಲಿ ಸಂಗ್ರಹಿಸಲಾಗುತ್ತದೆ ಮತ್ತು ಬೇರಡೆ ಸಾಗಿಸಲಾಗುತ್ತಿದೆ.

‘15 ಟನ್‌ ಭಾರ ಸಾಗಿಸುವ ಲಾರಿಗಳಲ್ಲಿ ನಿಯಮ ಉಲ್ಲಂಘಿಸಿ 40 ಟನ್‌ಗೂ ಅಧಿಕ ಭಾರ ಸಾಗಿಸುತ್ತಿದ್ದು, ಕವಿತಾಳದಿಂದ ಮಸ್ಕಿ, ಆನಂದಗಲ್‌, ಹರ್ವಾಪುರದಿಂದ ಪಾಮನಕಲ್ಲೂರು ಮತ್ತು ಗೊಲ್ದಿನ್ನಿ ಹತ್ತಿರ ಮುಖ್ಯ ರಸ್ತೆಗಳು ಸಂಪೂರ್ಣ ಹಾಳಾಗಿವೆ’ ಎಂದು ಸ್ಥಳೀಯರು ಆರೋಪಿಸಿದರು.

‘ಹೆದ್ದಾರಿ ನಿರ್ಮಾಣಕ್ಕೆ ಜಮೀನು ಸ್ವಾಧೀನ ಪಡಿಸಿಕೊಳ್ಳುವ ವಿಷಯದಲ್ಲಿ ಪೊಲೀಸ್‌ ಬಂದೋಬಸ್ತ್‌ ನೊಂದಿಗೆ ಆಗಮಿಸಿ ರೈತರ ಮೇಲೆ ದೌರ್ಜನ್ಯ ನಡೆಸುವ ಅಧಿಕಾರಿಗಳು ಅಧಿಕ ಭಾರ ಸಾಗಾಟದಿಂದ ಹಾಳಾದ ಸರ್ವೀಸ್‌ ರಸ್ತೆ ದುರಸ್ತಿ ಬಗ್ಗೆ ಕಾಳಜಿ ವಹಿಸದಿರುವುದು ವಿಪರ್ಯಾಸ’ ಎಂದು ಕಾರ್ಮಿಕ ಸಂಘಟನೆ ಮುಖಂಡ ಎಂ.ಡಿ.ಮೆಹಬೂಬ್‌ ಆರೋಪಿಸಿದರು.