ಸಿಂಧನೂರು | ರಸ್ತೆ ಅಪಘಾತ: ಇಬ್ಬರ ಸಾವು

ಸಿಂಧನೂರು: ತಾಲ್ಲೂಕಿನ ಮುದ್ದಾಪುರ ಬಳಿ ರಸ್ತೆ ಸಾರಿಗೆ ಸಂಸ್ಥೆಯ ಬಸ್‍ವೊಂದು ದ್ವಿಚಕ್ರ ವಾಹನಕ್ಕೆ ಡಿಕ್ಕಿ ಹೊಡೆದು ಶನಿವಾರ ರಾತ್ರಿ ಸಂಭವಿಸಿದ ಅಪಘಾತದಲ್ಲಿ ದ್ವಿಚಕ್ರವಾಹನದ ಇಬ್ಬರು ಸವಾರರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಬೂತಲದಿನ್ನಿಯ ದೊಡ್ಲಾ ಹಾಲಿನ ಘಟಕದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಕುನ್ನಟಗಿ ಕ್ಯಾಂಪಿನ ದೇವರಾಜ ಈರಪ್ಪ(23), ಮಲ್ಲಾಪುರದ ಸಂತೋಷ ಕುಮಾರ ಹನುಮಂತ(22) ಮೃತರು.

ಹಾಲಿನ ಡೇರಿಯ ಕೆಲಸದ ಪ್ರಯುಕ್ತ ಮಸ್ಕಿಗೆ ಹೋಗಿ ಮರಳಿ ಬರುವಾಗ ಹೊಸಪೇಟೆಯಿಂದ ಸಿಂಧನೂರು ಮಾರ್ಗವಾಗಿ ಕಲಬುರಗಿಗೆ  ತೆರಳುತ್ತಿದ್ದ ಸಾರಿಗೆ ಬಸ್‍, ಚಾಲಕನ ನಿಯಂತ್ರಣತಪ್ಪಿ ದ್ವಿಚಕ್ರ ವಾಹನ ಸವಾರರಿಗೆ ಡಿಕ್ಕಿ ಹೊಡೆದು ದುರ್ಘಟನೆ ಸಂಭವಿಸಿದೆ.

ಮೃತ ಯುವಕರು ಸ್ನೇಹಿತರಾಗಿದ್ದರು. ಇಬ್ಬರೂ ಸಾವಿನಲ್ಲೂ ಒಂದಾಗಿರುವುದು ಅವರ ಕುಟುಂಬಗಳ ನೋವು ಹೆಚ್ಚಿಸಿದೆ. ಈ ಕುರಿತು ತುರ್ವಿಹಾಳ ಪೊಲೀಸ್ ಠಾಣೆಯ ಪಿಎಸ್‍ಐ ಹುಸೆನಪ್ಪ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.