ಮಹಮದ್‌ ಆರಿಫ್‌ ಅಧ್ಯಕ್ಷ–ನಾಗೇಶ್‌ ಉಪಾಧ್ಯಕ್ಷ

ರಾಮನಗರ: ನಗರಸಭೆಯ ನೂತನ ಅಧ್ಯಕ್ಷರಾಗಿ ಮಹ­ಮದ್ ಆರಿಫ್ ಖುರೇಷಿ ಮತ್ತು ಉಪಾ­ಧ್ಯಕ್ಷರಾಗಿ ನಾಗೇಶ್ ಆಯ್ಕೆಯಾದರು.

ಸೋಮವಾರ ನಡೆದ ಚುನಾವಣೆ­ಯಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಮಹಮದ್ ಆರಿಫ್ ಖುರೇಷಿ ಹಾಗೂ ಉಪಾ­ಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ್ದ ನಾಗೇಶ್ ತಲಾ 20 ಮತ ಪಡೆದು ಆಯ್ಕೆಯಾದರು. ಜೆಡಿಎಸ್ ಪಕ್ಷದಿಂದ ಸ್ಪರ್ಧಿ­ಸಿದ್ದ ಮಹಮದ್ ರಫೀಕ್ ಮತ್ತು ಅಬ್ದುಲ್ ಬಾಸಿದ್  11 ಮತ ಪಡೆದು ಸೋಲು ಕಂಡರು.

ಅಧ್ಯಕ್ಷ ಸ್ಥಾನ ಸಾಮಾನ್ಯ ವರ್ಗಕ್ಕೆ ಮತ್ತು ಉಪಾಧ್ಯಕ್ಷ ಸ್ಥಾನ ಬಿಸಿಎಂ 'ಎ' ವರ್ಗಕ್ಕೆ ಮೀಸಲಾಗಿತ್ತು. ಉಪವಿಭಾಗಾ­ಧಿಕಾರಿ ಬಿ.ಎಚ್.ಸಿದ್ದಪ್ಪ ಚುನಾವಣಾಧಿ­ಕಾರಿಯಾಗಿ ಕಾರ್ಯ ನಿರ್ವಹಿಸಿದರು.

ನಗರಸಭೆಯಲ್ಲಿ ಒಟ್ಟು 31 ಸದಸ್ಯರಿದ್ದು  29 ಸದಸ್ಯರು ಚುನಾವಣೆ­ಯಲ್ಲಿ ಭಾಗವಹಿಸಿದ್ದರು. ಮೂರನೇ ವಾರ್ಡಿನ ಸುಜಾತ ಮತ್ತು 4ನೇ ವಾರ್ಡಿನ ನಾಗರಾಜ್ ಅವರು ಚುನಾ­ವಣೆ­-­­ಯಲ್ಲಿ ಗೈರು ಹಾಜರಾಗಿದ್ದರು.

ಕಳೆದ ಹತ್ತು ದಿನಗಳಿಂದ ನಡೆದ ರಾಜ­ಕೀಯ ಬೆಳವಣಿಗೆಗಳಲ್ಲಿ ಬಿಜೆಪಿಯ ಇಬ್ಬರು ಸದಸ್ಯರು ಕಾಂಗ್ರೆಸ್ಸಿಗೆ ಬೆಂಬಲ ಸೂಚಿ­ಸುವ ಮೂಲಕ ಅಚ್ಚರಿ ಮೂಡಿ­ಸಿದರು. ಇದರಿಂದಾಗಿ ಕಾಂಗ್ರೆಸ್ ಪಕ್ಷಕ್ಕೆ ಅಧ್ಯಕ್ಷ ಮತ್ತು ಉಪಾಧ್ಯಕ್ಷ ಗಾದಿ ಸುಲಭ­-­ವಾಗಿ ಒಲಿಯಿತು. ಸಂಸದ ಡಿ.ಕೆ.ಸುರೇಶ್ ಮತ್ತು ವಿಧಾನ ಪರಿಷತ್ ಸದಸ್ಯ ಕೆ.ಗೋವಿಂದರಾಜು ಅವರು ಸಹಾ ಚುನಾವಣೆ ಪ್ರಕ್ರಿಯೆಯಲ್ಲಿ ಭಾಗ­ವಹಿಸಿ ತಮ್ಮ ಮತ ಚಲಾಯಿಸಿದರು.

ಅಧ್ಯಕ್ಷ ಸ್ಥಾನಕ್ಕೆ 1ನೇ ವಾರ್ಡಿನ ಎ.ಬಿ.ಚೇತನ್ ಕುಮಾರ್, 16ನೇ ವಾರ್ಡಿನ ಮಹಮದ್ ಆರಿಫ್ ಖುರೇಷಿ ಅವರು ಕಾಂಗ್ರೆಸ್ ಪಕ್ಷದಿಂದ ನಾಮಪತ್ರ ಸಲ್ಲಿಸಿದರು. ಎ.ಬಿ.ಚೇತನ್ ಕುಮಾರ್ ತಮ್ಮ ನಾಮಪತ್ರ ಹಿಂದಕ್ಕೆ ಪಡೆದರು.

ಜೆಡಿಎಸ್ ಪಕ್ಷದಿಂದ 22ನೇ ವಾರ್ಡಿ­ನಿಂದ ಆಯ್ಕೆಯಾಗಿರುವ ಮಹಮದ್ ರಫೀಕ್ ಅವರು ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿ­ಸಿದ್ದರು.
ಉಪಾಧ್ಯಕ್ಷ ಸ್ಥಾನಕ್ಕೆ ಕಾಂಗ್ರೆಸ್ ಪಕ್ಷದಿಂದ 15ನೇ ವಾರ್ಡ್‌ನ ಮಹ­ಮದ್ ಅಸ್ಲಂ ಷರೀಫ್ ಮತ್ತು 26ನೇ ವಾರ್ಡಿನ ನಾಗೇಶ್ ಅವರು ನಾಮಪತ್ರ ಸಲ್ಲಿಸಿ ನಂತರ ಮಹ­ಮದ್ ಅಸ್ಲಂ ಷರೀಫ್ ಅವರು ತಮ್ಮ ನಾಮಪತ್ರವನ್ನು ಹಿಂದಕ್ಕೆ ಪಡೆದಿದ್ದರು. ಜೆಡಿಎಸ್ ಪಕ್ಷ­ದಿಂದ 11ನೇ ವಾರ್ಡಿನನ ಅಬ್ದುಲ್ ಬಾಸಿದ್ ನಾಮಪತ್ರ ಸಲ್ಲಿಸಿದ್ದರು.

ಜಿಲ್ಲೆಯ ಅಭಿವೃದ್ಧಿಗೆ ಅನುಕೂಲ: ಜಿಲ್ಲೆಯಲ್ಲಿ ನಾಲ್ಕು ಸ್ಥಳೀಯ ಸಂಸ್ಥೆ­ಗಳಿಗೆ ನಡೆದ ಚುನಾವಣೆಯಲ್ಲಿ ಅಧ್ಯಕ್ಷ ಮತ್ತು ಉಪಾಧ್ಯಕ್ಷ ಸ್ಥಾನ­ಗಳನ್ನು ಕಾಂಗ್ರೆಸ್ ಪಕ್ಷ ತನ್ನ ತೆಕ್ಕೆಗೆ ತೆಗೆದುಕೊಳ್ಳುವಲ್ಲಿ ಯಶಸ್ವಿ­ಯಾಗಿದೆ. ಇದರಿಂದ ಇಡಿ ಜಿಲ್ಲೆಯನ್ನು ಅಭಿ­ವೃದ್ಧಿ­­ಪಡಿಸಲು ಅನುಕೂಲವಾಗಿದೆ ಎಂದು ಸಂಸದ ಡಿ.ಕೆ.ಸುರೇಶ್ ತಿಳಿಸಿ­ದರು. 

ಚುನಾವಣೆ ನಂತರ ಸುದ್ದಿ ಗೋಷ್ಠಿ­ಯಲ್ಲಿ ಮಾತ­­ನಾಡಿದ ಅವರು, ಆಯ್ಕೆ­ಯಾಗಿ­ರುವ ಎಲ್ಲಾ ಅಧ್ಯಕ್ಷ ಮತ್ತು ಉಪಾ­ಧ್ಯಕ್ಷರುಗಳಿಗೆ ಪಕ್ಷಬೇಧ ಮರೆತು ಕೆಲಸ ಮಾಡುವಂತೆ ಸೂಚಿಸ­ಲಾಗಿದೆ ಎಂದು  ತಿಳಿಸಿದರು.

ಅಭಿನಂದನೆ: ಕಾಂಗ್ರೆಸ್‌ ಮುಖಂಡ ಸಿ.ಎಂ.ಲಿಂಗಪ್ಪ, ಕೆಎಂಎಫ್ ನಿರ್ದೇಶಕ ಪಿ.ನಾಗರಾಜು, ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಸಯ್ಯದ್ ಜಿಯಾಉಲ್ಲಾ, ಪ್ರಧಾನ ಕಾರ್ಯದರ್ಶಿ ಮರಿ­ದೇವರು, ಕೆಪಿಸಿಸಿ ಸದಸ್ಯ ಕೆ.ರಮೇ­ಶ್, ಕೆ.ಶೇಷಾದ್ರಿ, ನಗರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಸಿಎನ್ಆರ್‌ ವೆಂಕಟೇಶ್, ಉಪಾಧ್ಯಕ್ಷ ಪುಟ್ಟರಾಜು ಮತ್ತು  ಕಾರ್ಯಕರ್ತರು ಅಧ್ಯಕ್ಷ ಮತ್ತು ಉಪಾಧ್ಯಕ್ಷರನ್ನು ಅಭಿನಂದಿಸಿದರು.