ಅರಿವು ಭಾರತ’ದ ಮೌನ ಕ್ರಾಂತಿ: ಪ್ರಜಾ ಪರಿವರ್ತನಾ ವೇದಿಕೆ ಅಧ್ಯಕ್ಷ ಗೋಪಾಲ್

ಚನ್ನಪಟ್ಟಣ (ರಾಮನಗರ): ‘ದೇಶದಲ್ಲಿ ಜಾತಿ ಮತ್ತು ಅಸ್ಪೃಶ್ಯತೆ ವಿರುದ್ಧದ ಹೋರಾಟ ಬುದ್ಧನ ಕಾಲದಿಂದಲೇ ಆರಂಭಗೊಂಡಿದೆ. ಬಸವಣ್ಣ, ಜ್ಯೋತಿಬಾ ಫುಲೆ, ಡಾ. ಬಿ.ಆರ್. ಅಂಬೇಡ್ಕರ್‌ವರೆಗೆ ಅದು ಸಾಗುತ್ತಾ ಬಂದಿದೆ. ಅದೇ ಹಾದಿಯಲ್ಲಿ ಅರಿವು ಭಾರತ ತಂಡ ಮಾಡುತ್ತಿರುವ ಕೆಲಸವು ಅಸ್ಪೃಶ್ಯತೆ ವಿರುದ್ಧದ ಮೌನ ಕ್ರಾಂತಿಯಾಗಿದೆ’ ಎಂದು ಎಂದು ಪ್ರಜಾ ಪರಿವರ್ತನಾ ವೇದಿಕೆ ಅಧ್ಯಕ್ಷ ಗೋಪಾಲ್ ಮೆಚ್ಚುಗೆ ವ್ಯಕ್ತಪಡಿಸಿದರು.

ತಾಲ್ಲೂಕಿನ ಅರಳಾಳುಸಂದ್ರ ಗ್ರಾಮದ ಎ.ಬಿ. ಲೋಕೇಶ್ ಅವರ ಮನೆಯಲ್ಲಿ ‘ಅರಿವು ಭಾರತ’ ತಂಡ ಇತ್ತೀಚೆಗೆ ಹಮ್ಮಿಕೊಂಡಿದ್ದ ‘ನಮ್ಮ ನಡಿಗೆ ಅಸ್ಪೃಶ್ಯತೆ ಮುಕ್ತ ಭಾರತದೆಡೆಗೆ’ ಅಭಿಯಾನದಲ್ಲಿ ಅವರು ಮಾತನಾಡಿದರು.

‘ಪ್ರಾಣಿ, ಪಕ್ಷಿ, ಗಿಡ– ಮರಗಳನ್ನು ನೋಡಿದ ತಕ್ಷಣ ಜಾತಿ ಕಾಣುತ್ತದೆ. ಆದರೆ, ಮನುಷ್ಯನಲ್ಲಿ ಮೇಲ್ನೋಟಕ್ಕೆ ಜಾತಿ ಕಂಡುಹಿಡಿಯಲು ಸಾಧ್ಯವಿಲ್ಲ. ಯಾಕೆಂದರೆ, ಅದನ್ನು ಹೇರಲಾಗಿದೆ ಎಂದು ಬುದ್ಧ ಹೇಳಿದ್ದಾರೆ. ಕುವೆಂಪು ಅಸ್ಪೃಶ್ಯತೆ ವಿರುದ್ಧ ನಡೆಸಿದ ಚಳುವಳಿಗೆ ಅವರ ಸಮುದಾಯದಿಂದಲೇ ಬೆಂಬಲ ಸಿಗಲಿಲ್ಲ. ಅವರ ಸಿದ್ದಾಂತ ಜಾರಿಯಾಗಿದ್ದರೆ ರಾಜ್ಯದ ಚಿತ್ರಣ ಬದಲಾಗುತ್ತಿತ್ತು’ ಎಂದರು.

‘ಮನುಷ್ಯ ಮನುಷ್ಯನನ್ನು ಗೌರವಿಸುವುದೇ ಸಮ ಸಮಾಜ. ಪ್ರೀತಿ, ವಿಶ್ವಾಸದಿಂದ ಮಾತ್ರ ಮನಸ್ಸು ಗೆಲ್ಲಲು ಸಾಧ್ಯ. ಅದಕ್ಕಾಗಿ ಅರಿವು ಭಾರತ ಸಂಘರ್ಷವಿಲ್ಲದ ಚಳವಳಿ ಮಾಡುತ್ತಿದೆ. ಇದು ಪ್ರತಿ ಮನೆಯಲ್ಲಿ ನಡೆಯುವಂತಾಗಬೇಕು. ಜಾತಿ ಮುಕ್ತ ಸಮಾಜ ನಿರ್ಮಾಣವಾದರೆ ಮುಂದೆ ಅದು ದೊಡ್ಡ ಬದಲಾವಣೆಗೆ ಕಾರಣವಾಗಲಿದೆ‌’ ಎಂದು ಅಭಿಪ್ರಾಯಪಟ್ಟರು.

ರೈತ ಸಂಘದ ಮುಖಂಡ ಸಿ. ಪುಟ್ಟಸ್ವಾಮಿ ಮಾತನಾಡಿ, ‘ಪಕ್ಷ ರಾಜಕಾರಣವು ವ್ಯವಸ್ಥಿತವಾಗಿ ಜಾತಿ ವ್ಯವಸ್ಥೆಯನ್ನು ಪೋಷಿಸುತ್ತಿದೆ. ಅದರ ನಡುವೆಯೂ ಅಂಬೇಡ್ಕರ್, ಫುಲೆ, ಬಸವಣ್ಣ, ಕುವೆಂಪು ಮಾರ್ಗದಲ್ಲಿ ಅಸ್ಪೃಶ್ಯತೆ ಮತ್ತು ಜಾತಿ ವಿರುದ್ಧ ಚಳುವಳಿ ಮಾಡಬೇಕಿದೆ. ಇದು ಸಮಾಜದ ಋಣ ತೀರಿಸುವ ಕೆಲಸ‌‌’ ಎಂದು ಹೇಳಿದರು.

ಕಾರ್ಯಕ್ರಮದ ಬಳಿಕ ಲೋಕೇಶ್ ಅವರ ಮನೆಯಲ್ಲಿ ಸರ್ವ ಜಾತಿಗಳ ಸಹಭೋಜನ ಜರುಗಿತು. ಅರಳಾಳುಸಂದ್ರ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ದೊಡ್ಡಮ್ಮ ಸಿದ್ದಯ್ಯ, ಪ್ರಾಧ್ಯಾಪಕ ಡಾ. ರುದ್ರೇಶ್ ಅದರಂಗಿ, ಟಿ. ವಿಜಯಕುಮಾರ್, ಪಿ. ರಮೇಶ್, ಓಂ ಪ್ರಕಾಶ್, ಶಿವಮಲ್ಲಮ್ಮ , ರಾ.ಸಿ. ರಮೇಶ್, ಕೋಲಾರ ದೊರೆಸ್ವಾಮಿ, ಕೆ.ವಿ. ರಮೇಶ್, ರೂಪೇಶ್ , ರವೀಶ್ , ಸುರೇಶ್, ಶಿವಮಲ್ಲೇಗೌಡ, ಪ್ರದೀಪ್, ರಾಜೇಶ್ ಹಾಗೂ ಇತರರು ಇದ್ದರು.