ಶಿಕಾರಿಪುರ | ಮಹಿಳೆ ಮೇಲೆ ಹಲ್ಲೆ ಆರೋಪ: ಬಿಜೆಪಿ ಮುಖಂಡನ ವಿರುದ್ಧ ಪ್ರಕರಣ

ಶಿಕಾರಿಪುರ: ಮಹಿಳೆ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಿ ಬಿಜೆಪಿ ತಾಲ್ಲೂಕು ಘಟಕ ಅಧ್ಯಕ್ಷ ವೀರೇಂದ್ರ ಪಾಟೀಲ್ ವಿರುದ್ಧ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಮಹಿಳೆ ದೂರು ದಾಖಲಿಸಿದ್ದಾರೆ.

ಅರಿಸಿಣಗೆರೆ ಗ್ರಾಮದ ನಿವಾಸಿ ಶೋಭಾ ದೂರು ನೀಡಿದ ಮಹಿಳೆ. ಆದರೆ ಮಹಿಳೆ ಮನೆಯವರೇ ನನಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿ ನನ್ನ ಮೇಲೆ ಹಾಗೂ ನನ್ನ ಅತ್ತಿಗೆ ಮೇಲೆ ನಡೆಸಿದ್ದಾರೆ ಎಂದು ಆರೋಪಿಸಿ ವೀರೇಂದ್ರ ಮಹಿಳೆ ವಿರುದ್ಧ ಪ್ರತಿ ದೂರು ದಾಖಲಿಸಿದ್ದಾರೆ.

ಘಟನೆ ವಿವರ: ತಾಲ್ಲೂಕಿನ ಅರಿಸಿಣಗೆರೆ ಗ್ರಾಮದಲ್ಲಿ ವೀರೇಂದ್ರ ಪಾಟೀಲ್ ಹಾಗೂ ಶೋಭಾ ಅಕ್ಕಪಕ್ಕದ ಮನೆ ನಿವಾಸಿಯಾಗಿದ್ದಾರೆ. ನ.6ರಂದು ವೀರೇಂದ್ರ ಪಾಟೀಲ್ ಮನೆ ಪಕ್ಕ ನೀರಿನ ಪೈಪ್ ಅಳವಡಿಸುವ ಸಂದರ್ಭದಲ್ಲಿ ಪೈಪ್ ಅಳವಡಿಸುತ್ತಿರುವ ಜಾಗ ನಮ್ಮ ಮನೆಗೆ ಸೇರಿದ್ದು ಎಂದು ಶೋಭಾ ಹೇಳಿದ್ದಾರೆ. ಈ ಸಂದರ್ಭದಲ್ಲಿ ಇಬ್ಬರ ಮಧ್ಯೆ ವಾಗ್ವಾದ ಸಂಭವಿಸಿದ್ದು ಗಲಾಟೆ ನಡೆದಿದೆ. ಈ ಗಲಾಟೆಗೆ ಸಂಬಂಧಿಸಿದಂತೆ ನ.7ರಂದು ಶೋಭಾ ಹಾಗೂ ವೀರೇಂದ್ರ ಪಾಟೀಲ್ ಪರಸ್ಪರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಗ್ರಾಮಾಂತರ ಠಾಣೆ ಪೊಲೀಸರು ಗಲಾಟೆಗೆ ಸಂಬಂಧಿಸಿದಂತೆ ಮೊಕದ್ದಮೆ ದಾಖಲಿಸಿಕೊಂಡಿದ್ದಾರೆ. ನ.6ರಂದು ವೀರೇಂದ್ರ ಪಾಟೀಲ್ ಹಾಗೂ ಶೋಭಾ ಅವರ ಮಧ್ಯೆ ನಡೆದ ಗಲಾಟೆಯ ವಿಡಿಯೊ ನ.10ರಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ ಪರಿಣಾಮ ಗಲಾಟೆ ಪ್ರಕರಣ ಬೆಳಕಿಗೆ ಬಂದಿದೆ.