ಮಾರಿಕಾಂಬಾ ದೇವಿಗೆ ಕಾಣಿಕೆ ರೂಪದಲ್ಲಿ ಬಂಗಾರ ನೀಡಲು ಮನವಿ

ಸಾಗರ: ಇಲ್ಲಿನ ಮಾರಿಕಾಂಬಾ ದೇವಿ ನ್ಯಾಸ ಪ್ರತಿಷ್ಠಾನವು ಮಾರಿಕಾಂಬಾ ಜಾತ್ರೆ ಅಂಗವಾಗಿ ಮಾರಿಕಾಂಬಾ ದೇವಿಯ ಉತ್ಸವ ಮೂರ್ತಿಗೆ ಎರಡು ಎಳೆಯ ಬಂಗಾರದ ಸರವನ್ನು ಸಿದ್ದಪಡಿಸಲು ನಿರ್ಧರಿಸಿದ್ದು ಇದಕ್ಕೆ ಭಕ್ತರು ಕಾಣಿಕೆ ರೂಪದಲ್ಲಿ ಬಂಗಾರ ನೀಡುವಂತೆ ಪ್ರತಿಷ್ಠಾನ ಕೋರಿದೆ.

2023ನೇ ಸಾಲಿನ ಜಾತ್ರೆ ಸಂದರ್ಭದಲ್ಲಿ ಭಕ್ತರು ಹಾಗೂ ಚಿನ್ನ, ಬೆಳ್ಳಿ ಅಂಗಡಿಯ ಮಾಲೀಕರು ದಾನವಾಗಿ ನೀಡಿದ್ದ 670 ಗ್ರಾಂ ತೂಕದ ಬಂಗಾರ ಪ್ರತಿಷ್ಠಾನದ ಬಳಿ ಇದೆ. ಉಳಿದಂತೆ ಕಾಣಿಕೆ ರೂಪದಲ್ಲಿ ಬರುವ ಬಂಗಾರವನ್ನು ಸೇರಿಸಿ ಎರಡು ಎಳೆಯ ನೂತನ ಸರ ತೊಡಿಸಲಾಗುವುದು ಎಂದು ಪ್ರತಿಷ್ಠಾನದ ಪ್ರಕಟಣೆ ತಿಳಿಸಿದೆ.