‘ಹೇಮಾವತಿ ತಡೆಯಲು ಪಿತೂರಿ’

ತುಮಕೂರು: ಜಿಲ್ಲೆಗೆ ಹೇಮಾವತಿ ನೀರು ನೀಡುವುದನ್ನು ತಡೆಯಲು ಪಕ್ಕದ ಜಿಲ್ಲೆಯ ಬಲಿಷ್ಠ ರಾಜಕಾರಣಿ­ಗಳು ಪಿತೂರಿ ಮಾಡುತ್ತಿದ್ದಾರೆ. ನಮ್ಮ ಪಾಲಿನ ನೀರು ಪಡೆಯಲು ಹೋರಾಟ ಅಗತ್ಯ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಟಿ.ಬಿ.ಜಯಚಂದ್ರ ಆಪಾದಿಸಿದರು.

ತಾಲ್ಲೂಕಿನ ಹೊನ್ನುಡಿಕೆ ಗ್ರಾಮ­ದಲ್ಲಿ ಭಾನುವಾರ ಬಹುಗ್ರಾಮ ನೀರು ಸರಬರಾಜು ಯೋಜನೆಯಡಿ ಹೊನ್ನು­ಡಿಕೆ ಕೆರೆಯಿಂದ 27 ಗ್ರಾಮಗಳಿಗೆ ಶುದ್ಧ ಕುಡಿಯುವ ನೀರು ಕಲ್ಪಿಸುವ ಯೋಜನೆ ಉದ್ಘಾಟಿಸಿ ಮಾತನಾಡಿದ ಅವರು, ಸರ್ಕಾರ ಯಾವುದೇ ಇರಲಿ, ಅಭಿವೃದ್ಧಿ ಮತ್ತು ನೀರಿನ ವಿಚಾರದಲ್ಲಿ ರಾಜ­ಕೀಯ ಮಾಡಬಾರದು ಎಂದರು.

ಅಭಿವೃದ್ಧಿ ಯೋಜನೆಗಳಿಗೆ ತಕರಾರು ತೆಗೆಯುವವರು ಹೆಚ್ಚುತ್ತಿದ್ದಾರೆ. ರಾಜ­ಕೀಯದಿಂದ ಅಭಿವೃದ್ಧಿ ಯೋಜನೆಗಳು ಕುಂಠಿತವಾಗುತ್ತಿವೆ. ಎತ್ತಿನಹೊಳೆ ಯೋಜನೆ ಜಾರಿಗೆ ಸರ್ಕಾರ ಎಲ್ಲ ಕ್ರಮಕೈಗೊಂಡಿದ್ದರೂ ಕೆಲವು ರಾಜ­ಕಾರಣಿ­ಗಳು ಇಲ್ಲದ ಆರೋಪ ಮಾಡು­ತ್ತಿದ್ದಾರೆ. ನೇತ್ರಾವತಿ ನದಿಗೂ ಎತ್ತಿನ ಹೊಳೆ ಯೋಜನೆಗೂ ಸಂಬಂಧವಿಲ್ಲ. ಸಮುದ್ರಕ್ಕೆ ಹರಿದು ಹೋಗುವ ನೀರನ್ನು ಹಳ್ಳಗಳಿಂದ ಎತ್ತಿನಹೊಳೆ ಯೋಜನೆಗೆ ಬಳಕೆ ಮಾಡಲಾಗುವುದು. ಕೇಂದ್ರ ಪರಿಸರ ಇಲಾಖೆ ಯೋಜನೆಗೆ ಅನು­ಮತಿ ನೀಡಿದೆ. ಇದರಿಂದ ಜಿಲ್ಲೆಯ ಕುಡಿಯುವ ನೀರಿನ ಸಮಸ್ಯೆ ಬಗೆ­ಹರಿ­ಯು­ತ್ತದೆ ಎಂದು ಹೇಳಿದರು.

ರಾಜ್ಯದ 126 ತಾಲ್ಲೂಕುಗಳಲ್ಲಿ ಬರದ ಸ್ಥಿತಿ ಇದೆ. ಮಳೆ ಬಾರದಿದ್ದರೆ ಕುಡಿಯುವ ನೀರು ನೀಡುವುದೂ ಕಷ್ಟ. ಸರ್ಕಾರ ಎಷ್ಟೇ ಹಣ ನೀಡಿದರೂ ಸಮರ್ಪಕ ನೀರು ನೀಡುವುದು ಕಷ್ಟ. ಜನತೆ ಇಂತಹ ಸಂದರ್ಭದಲ್ಲಿ ವಿವೇ­ಚನೆ­ಯಿಂದ ವರ್ತಿಸಬೇಕು. ಅಂತ­ರ್ಜಲ­ದ ಮಟ್ಟ ಕುಸಿದಿದ್ದು, ನೀರು ಬಳಕೆ ತಗ್ಗಿಸಬೇಕು ಎಂದು ಸಲಹೆ ಮಾಡಿದರು.

ಶಾಸಕ ಬಿ.ಸುರೇಶ್‌ಗೌಡ ಪ್ರಾಸ್ತಾ­ವಿಕ ಮಾತನಾಡಿ, ಅಂತರ್ಜಲ ಶುದ್ಧ­ವಿಲ್ಲ ಎಂಬ ಕಾರಣಕ್ಕೆ ಹೇಮಾವತಿ ನೀರು ಪೂರೈಕೆ ಮಾಡಲಾಗುತ್ತಿದೆ. ಹಾಸನ ಮತ್ತು ಮಂಡ್ಯದ ಜನ ಕಾವೇರಿ ನೀರು ಕುಡಿಯುವುದರಿಂದ ಅವರನ್ನು ಬಗ್ಗಿಸಲು ಸಾಧ್ಯವಾಗುವುದಿಲ್ಲ. ನೀವು ಸಹ ಹೇಮಾವತಿ ನೀರು ಕುಡಿದು ನನ್ನ ವಿರುದ್ಧವೇ ತೊಡೆ ತಟ್ಟುವಂತಾಗಬೇಡಿ ಎಂದು ಮಾರ್ಮಿಕವಾಗಿ ಹೇಳಿದರು.

ಜಿ.ಪಂ. ಉಪ ಕಾರ್ಯ­ದರ್ಶಿ ಕೃಷ್ಣಪ್ಪ, ಎಂಜಿನಿಯರ್‌ ಶಿವಕುಮಾರ್‌, ತಹಶೀಲ್ದಾರ್‌ ಮಾರುತಿ ಪ್ರಸನ್ನ, ಗ್ರಾಮ ಪಂಚಾಯಿತಿ ಅಧ್ಯಕ್ಷ ಶಿವ­ರಾಜ್‌, ಮುಖಂಡರಾದ ದಕ್ಷಿಣಾ­ಮೂರ್ತಿ, ನೀಲಕಂಠಪ್ಪ, ಗಂಗಾಧರ ಇತರರು ಭಾಗವಹಿಸಿದ್ದರು.