ಕಾರು ಗಾಜು ಒಡೆದು ₹1 ಲಕ್ಷ ಕಳ್ಳತನ

ಶಿರಾ: ನಗರದ ತಾಲ್ಲೂಕು ಕಚೇರಿ ಬಳಿ ಶನಿವಾರ ಕಾರಿನ ಗಾಜು ಒಡೆದು ಕಾರಿನೊಳಗೆ ಇದ್ದ ₹1 ಲಕ್ಷ ಕಳ್ಳತನ ಮಾಡಲಾಗಿದೆ.

ತಾಲ್ಲೂಕಿನ‌ ಬುಕ್ಕಾಪಟ್ಟಣ ಹೋಬಳಿ ಲಕ್ಕೇನಹಳ್ಳಿ ಗ್ರಾಮದ ರಘುವೀರ್ ಅವರು ಜಮೀನು ವಿವಾದ ಬಗೆ ಹರಿಸಿಕೊಂಡಿದ್ದು, ಅದರ ಬಾಬ್ತು ₹6 ಲಕ್ಷ ಕೊಡಬೇಕಿತ್ತು. ಅದರಲ್ಲಿ ₹5 ಲಕ್ಷ ನೀಡಿ ಪತ್ರವಾದ ನಂತರ ಉಳಿದ ₹1 ಲಕ್ಷ ನೀಡಲು ಶನಿವಾರ ತಾಲ್ಲೂಕು ಕಚೇರಿ ಬಳಿ ಕಾರು ನಿಲ್ಲಿಸಿ ಪತ್ರಬರಹಗಾರ ಬಳಿ ಪತ್ರ ಮಾಡಿಸುತ್ತಿದ್ದಾಗ ಕಳ್ಳತನ ನಡೆದಿದೆ.

ಪತ್ರ ಸಿದ್ಧವಾಗುತ್ತಿದ್ದ ಸಮಯದಲ್ಲಿ ಹಣ ತರಲು ಕಾರಿನ ಬಳಿ ಬಂದಾಗ ಕಾರಿನ ಗಾಜು ಪುಡಿಯಾಗಿರುವುದು ಕಂಡು ಅನುಮಾನದಿಂದ ನೋಡಿದಾಗ ಕಳ್ಳತನವಾಗಿರುವುದು ದೃಢವಾಗಿದೆ.