ಹಮಾಲಿ ಕಾರ್ಮಿಕರ ಬೇಡಿಕೆ ಈಡೇರಿಸಲು ಆಗ್ರಹ

ಪಾವಗಡ: ಹಮಾಲಿ ಕಾರ್ಮಿಕರ ಬೇಡಿಕೆ ಈಡೇರಿಸಬೇಕು ಎಂದು ಒತ್ತಾಯಿಸಿ ಕಾರ್ಮಿಕರು ಸೋಮವಾರ ತಹಶೀಲ್ದಾರ್ ಡಿ.ಎನ್.ವರದರಾಜು ಅವರಿಗೆ ಮನವಿ ಸಲ್ಲಿಸಿದರು.

ಶ್ರಮದಾಯಕ ಕೆಲಸ ನಿರ್ವಹಿಸುವ ಹಮಾಲಿಗಳ ಬದುಕು ಸುಧಾರಿಸಬೇಕಿದೆ. ಕೊನೆಗಾಲದಲ್ಲಿ ಅನಾರೋಗ್ಯದಿಂದ ಸಂಕಷ್ಟಕ್ಕೀಡಾಗುವ ಹಮಾಲಿ ಕಾರ್ಮಿಕರು, ಅಸಂಘಟಿತ ವಲಯದ ಕಾರ್ಮಿಕರಿಗೆ ಸಾಮಾಜಿಕ ಭದ್ರತಾ ಸೌಲಭ್ಯ ಕಲ್ಪಿಸುವ ಅಗತ್ಯವಿದೆ ಎಂದು ಕಾರ್ಮಿಕರು ಮನವಿ ಮಾಡಿದರು.

ಕಾರ್ಮಿಕರ ಭವಿಷ್ಯನಿಧಿ,ಪಿಂಚಣಿ, ವಸತಿ ಯೋಜನೆ ಜಾರಿ ಮಾಡುವುದು ಅಗತ್ಯವಾಗಿದೆ. ಸಹಜ ಮರಣಕ್ಕೂ ₹1ಲಕ್ಷ ಪರಿಹಾರ ನೀಡಬೇಕು. ಶವ ಸಂಸ್ಕಾರ ಪರಿಹಾರ ಮೊತ್ತವನ್ನು ₹25ಸಾವಿರಕ್ಕೆ ಹೆಚ್ಚಿಸಬೇಕು. ಭವಿಷ್ಯನಿಧಿ ಯೋಜನೆ ಸೂಕ್ತ ಪಿಂಚಣಿ ಯೋಜನೆ ಜಾರಿಮಾಡಬೇಕು. ನಿವೃತ್ತಿ ಸಂಚಾರ ಮೊತ್ತ ನೀಡಬೇಕು. ಮರಣ ಪರಿಹಾರ ₹2ಲಕ್ಷಕ್ಕೆ ಹೆಚ್ಚಿಸಬೇಕು. ಎಲ್ಲ ಕಾರ್ಮಿಕರಿಗೆ ಕಡ್ಡಾಯವಾಗಿ ಕಾರ್ಮಿಕ ಕಾನೂನು ಜಾರಿಯಾಗುವಂತೆ ಕ್ರಮವಹಿಸಬೇಕು ಎಂದು ಒತ್ತಾಯಿಸಿದರು.

ಎಪಿಎಂಸಿ ಹಮಾಲಿ ಸಂಘದ ಕಾರ್ಯದರ್ಶಿ ಒ.ನಾಗರಾಜು, ಬಸ್ ನಿಲ್ದಾಣ ಹಮಾಲಿ ಸಂಘದ ಕಾರ್ಯದರ್ಶಿ ಮದ್ಲೇಟಪ್ಪ, ನಾಗರಾಜು, ಗಂಗಾಧರ್, ರಾಮಾಂಜಿನಪ್ಪ, ರಾಜು, ಹನುಮಂತರಾಯ, ರಮೇಶ್ ರಸೂಲ್ ಸಾಬ್ ಉಪಸ್ಥಿತರಿದ್ದರು.