ಕೊರಟಗೆರೆ | ಮಡಿಕೆಗೆ ತಗ್ಗಿದ ಬೇಡಿಕೆ: ನಶಿಸುತ್ತಿದೆ ಕುಂಬಾರಿಕೆ

ಕೊರಟಗೆರೆ: ತಾಲ್ಲೂಕಿನಲ್ಲಿ ಕುಂಬಾರಿಕೆ ನಶಿಸುತ್ತಿದೆ. ಮಣ್ಣಿನ ವಸ್ತುಗಳ ಜಾಗವನ್ನು ಈಗ ಪ್ಲಾಸ್ಟಿಕ್, ಸ್ಟೀಲ್, ಗ್ಲಾಸ್ ವಸ್ತುಗಳು ತುಂಬಿವೆ.

ಮಣ್ಣಿನ ಪಾತ್ರೆಗಳೆಂದರೆ ‘ಹಳೆಯದ್ದೆ’ ಎಂಬ ಧೋರಣೆ ಜನಮನದಲ್ಲಿ ಬೇರೂರಿದೆ. ಕಡಿಮೆ ಬೆಲೆ ಹಾಗೂ ಸುಲಭ ಬಳಕೆಗೆ ಲಭ್ಯವಾದ ಇತರ ವಸ್ತುಗಳ ಮಣ್ಣಿನ ಪಾತ್ರೆಗಳ ಬೇಡಿಕೆಯನ್ನು ಕುಗ್ಗಿಸಿದೆ.

ಕುಂಬಾರಿಕೆ ಕೇವಲ ಕಲೆ ಅಲ್ಲ. ಅದು ಜೀವನೋಪಾಯ. ಜನರು ಮಣ್ಣಿನ ಪಾತ್ರೆಗಳಿಂದ ದೂರ ಸರಿದಂತೆ, ಈ ಕಲೆಯ ಮೇಲೆ ಅವಲಂಬಿತವಾದ ಸಾವಿರಾರು ಕುಂಬಾರ ಕುಟುಂಬಗಳು ಆರ್ಥಿಕ ಸಂಕಷ್ಟ ಎದುರಿಸುತ್ತಿವೆ. ಪರಂಪರೆಯಿಂದ ಬಂದಿರುವ ಈ ಕುಶಲತೆಗೆ ತಕ್ಕ ಗೌರವ ಹಾಗೂ ಬೆಂಬಲ ಸಿಗದಿರುವುದರಿಂದ ಹೊಸ ತಲೆಮಾರಿನವರು ಈ ವೃತ್ತಿಯಿಂದ ದೂರ ಸರಿಯುತ್ತಿದ್ದಾರೆ.

ಪ್ಲಾಸ್ಟಿಕ್ ಮತ್ತು ಲೋಹದ ಪಾತ್ರೆಗಳಿಗೆ ಬದಲಾಗಿ ಮಣ್ಣಿನ ಪಾತ್ರೆಗಳನ್ನು ಬಳಸುವುದು ಪರಿಸರ ಮತ್ತು ಆರೋಗ್ಯಕ್ಕೆ ಲಾಭಕಾರಿ. ಮಣ್ಣಿನ ಸಂವೇದನೆ, ಅದರ ಸುಗಂಧ, ತಂಪು ಮರೆಯಲಾಗದ ಅನುಭವ ನೀಡುತ್ತದೆ. 

ಪ್ರಾಚೀನ ಭಾರತೀಯ ಸಂಸ್ಕೃತಿಯಲ್ಲಿ ಮಣ್ಣಿನ ಪಾತ್ರೆಗಳನ್ನು ಶುದ್ಧ ಎಂದು ಪರಿಗಣಿಸಲಾಗುತ್ತಿತ್ತು. ಪೂಜೆ, ನದಿಯಲ್ಲಿ ಸ್ನಾನ ಅಥವಾ ಆಹಾರ ಸೇವನೆಗೆ ಮಣ್ಣಿನ ಪಾತ್ರೆಗಳ ಮಹತ್ವ ಹೆಚ್ಚಿತ್ತು. ಇದೊಂದು ಜೀವಶೈಲಿಯ ಭಾಗವಾಗಿತ್ತು. ಆದರೆ ಇಂದಿನ ‘ಮಾರ್ಕೆಟ್ ಶೈಲಿ’ ಬದುಕಿನಲ್ಲಿ ಈ ಮೌಲ್ಯಗಳಿಗೆ ಬೆಲೆ ಕಡಿಮೆಯಾಗಿದೆ.

ಪ್ಲಾಸ್ಟಿಕ್ ಉತ್ಪನ್ನಗಳು ಇಂದು ಎಲ್ಲೆಲ್ಲೂ ಪ್ರವೇಶಿಸುತ್ತಿವೆ. ಇದರ ಪರಿಣಾಮವಾಗಿ ಪರಿಸರ, ಮನುಷ್ಯನ ದೇಹಕ್ಕೆ ಹಾಗೂ ಪಶುಪಕ್ಷಿಗಳಿಗೆ ಅಪಾರ ಹಾನಿಯಾಗಿದೆ. ತ್ಯಾಜ್ಯ ಪ್ಲಾಸ್ಟಿಕ್ ನೂರಾರು ವರ್ಷಗಳವರೆಗೂ ನೆಲದಿಂದ ಹೊರಹೋಗದೆ ಉಳಿಯುತ್ತದೆ. ಆದರೆ ಮಣ್ಣಿನ ವಸ್ತುಗಳು ನೈಸರ್ಗಿಕವಾಗಿ ಮಣ್ಣಿಗೆ ಬೆರೆತುಹೋಗುತ್ತವೆ.

ಒಂದೇ ಸಲ ಬಳಸಿ ತ್ಯಾಜ್ಯವಾಗುವ ಪ್ಲಾಸ್ಟಿಕ್ ಪಾತ್ರೆಗಳ ಬದಲಿಗೆ ಮಣ್ಣಿನ ತಾತ್ಕಾಲಿಕ ಪಾತ್ರೆಗಳನ್ನು ಬಳಸುವುದು ಪರಿಸರ ಸಂರಕ್ಷಣೆಗೆ ದೊಡ್ಡ ಹೆಜ್ಜೆಯಾಗಿದೆ. ಮಣ್ಣಿನ ಗಿಣ್ಣಿ, ತಟ್ಟೆ, ಕುಡಿಕೆಗಳು ಮರುಬಳಕೆಗೂ ಯೋಗ್ಯವಾಗಿವೆ ಎನ್ನುತ್ತಾರೆ ಪರಿಸರ ತಜ್ಞರು.