ಮಾರಮ್ಮನ ಜಾತ್ರೆಗೂ ಕೋವಿಡ್ ಭಯ

ಮಧುಗಿರಿ: ತಾಲ್ಲೂಕಿನ ಇತಿಹಾಸ ಪ್ರಸಿದ್ಧ ದಂಡಿನ ಮಾರಮ್ಮ ದೇವಿಯ ಜಾತ್ರಾ ಮಹೋತ್ಸವಕ್ಕೆ ಕೋವಿಡ್ ಭಯ ಕಾಡುತ್ತಿದೆ. ಮಾ.20 ರವರೆಗೂ ಜಾತ್ರೆ ನಡೆಯಬೇಕಿತ್ತು.

ಆದರೆ ರಾಜ್ಯದಲ್ಲಿ ಕೋವಿಡ್ ಭೀತಿಯಿಂದ ರಾಜ್ಯ ಸರ್ಕಾರ ಸಾರ್ವಜನಿಕರ ಜಾತ್ರೆಗಳಿಗೆ ನಿರ್ಬಂಧ ಹೇರಿದೆ. ಜಾತ್ರೆ ಸ್ಥಗಿತಗೊಳ್ಳುತ್ತದೆಯೊ ಎಂಬ ಭೀತಿ ಜನರಲ್ಲಿ ಕಾಡತೊಡಗಿದೆ.

ಮಾ.18 ರಂದು ದೇವಿಯ ಬೆಳ್ಳಿ ಪಲ್ಲಕ್ಕಿ, 19 ರಂದು ಅಗ್ನಿಕೊಂಡಕ್ಕೆ ರಾಜ್ಯ ಹಾಗೂ ಆಂಧ್ರಪ್ರದೇಶದ ವಿವಿಧ ಕಡೆಗಳ ಸಾವಿರಾರು ಭಕ್ತರು ಪಾಲ್ಗೊಳ್ಳುವರು.

ಜಾತ್ರೆ ಪ್ರಾರಂಭವಾಗಿ ಮೂರು ದಿನಗಳು ಕಳೆದಿವೆ. ದೇವಿಗೆ ಆರತಿ ಸೇವೆ ಮಾಡದಿದ್ದರೆ ನಮಗೆ ತೊಂದರೆ ಆಗತ್ತದೆ ಎಂಬ ಆತಂಕ ಮಹಿಳೆಯರಲ್ಲಿದೆ.

ಜಾತ್ರಾ ಮಹೋತ್ಸವಕ್ಕೆ ಮನೆಗಳಲ್ಲಿ ಸಕಲ ಸಿದ್ಧತೆಗಳು ಭರದಿಂದ ಸಾಗಿವೆ. ಜನರು ನೆಂಟರಿಷ್ಟರು, ಮಿತ್ರರಿಗೆ ಜಾತ್ರೆಗೆ ಬರುವಂತೆ ಆಹ್ವಾನ ನೀಡಿದ್ದಾರೆ.