ತುಮಕೂರು: ಕಾರ್ಮಿಕ ಸಂಹಿತೆಗೆ ವಿರೋಧ

ತುಮಕೂರು: ರಾಜ್ಯ ಸರ್ಕಾರ ನೂತನ ಕಾರ್ಮಿಕ ಸಂಹಿತೆ ಜಾರಿ ಮಾಡಬಾರದು. ಸಂವಿಧಾನ ಹಕ್ಕು ಚಲಾಯಿಸಿ, ಕಾರ್ಮಿಕರ ಹಕ್ಕು ಉಳಿಸಬೇಕು ಎಂದು ಒತ್ತಾಯಿಸಿ ಸಿಐಟಿಯು ಮತ್ತು ಸಂಯೋಜಿತ ಸಂಘಟನೆಗಳಿಂದ ನಗರದ ಕಾರ್ಮಿಕ ಇಲಾಖೆ ಕಚೇರಿ ಮುಂಭಾಗ ಮಂಗಳವಾರ ಪ್ರತಿಭಟನೆ ನಡೆಯಿತು.

ಹನುಮಂತಪುರದ ಕೊಲ್ಲಾಪುರದಮ್ಮ ದೇವಸ್ಥಾನದಿಂದ ಕಾರ್ಮಿಕ ಇಲಾಖೆ ಕಚೇರಿ ತನಕ ಪ್ರತಿಭಟನಾ ಮೆರವಣಿಗೆ ನಡೆಯಿತು. ಕಾರ್ಮಿಕ ಅಧಿಕಾರಿಗೆ ಮನವಿ ಸಲ್ಲಿಸಲಾಯಿತು.

‘ಕಾರ್ಮಿಕ ಹಕ್ಕು ರಕ್ಷಣೆಗೆ ಸರ್ಕಾರ ಮುಂದಾಗಬೇಕು. ಯಾವುದೇ ಕಾರಣಕ್ಕೂ ರಾಜ್ಯದಲ್ಲಿ ಹೊಸ ಕಾರ್ಮಿಕ ಸಂಹಿತೆ ಜಾರಿಗೊಳಿಸಬಾರದು’ ಎಂದು ಸಿಐಟಿಯು ಜಿಲ್ಲಾ ಘಟಕದ ಅಧ್ಯಕ್ಷ ಸೈಯದ್‌ ಮುಜೀಬ್‌ ಒತ್ತಾಯಿಸಿದರು.

ಸಿಐಟಿಯು ಜಿಲ್ಲಾ ಖಜಾಂಚಿ ಲೋಕೇಶ್‌, ‘ರಾಜ್ಯ ಸರ್ಕಾರ ಕೂಡಲೇ ₹41 ಸಾವಿರ ಕನಿಷ್ಠ ಕೂಲಿ ನಿಗದಿ ಪಡಿಸಬೇಕು. ಕಾರ್ಮಿಕರ ಬದುಕಿಗೆ ಭದ್ರತೆ ಕಲ್ಪಿಸಬೇಕು’ ಎಂದು ಆಗ್ರಹಿಸಿದರು.

ಸಿಐಟಿಯು ಜಿಲ್ಲಾ ಕಾರ್ಯದರ್ಶಿ ಎನ್‌.ಕೆ.ಸುಬ್ರಹ್ಮಣ್ಯ, ವಿವಿಧ ಸಂಘಟನೆಗಳ ಮುಖಂಡರಾದ ಅನಸೂಯ, ಗುಲ್ಜಾರ್‌ ಬಾನು, ಗೌರಮ್ಮ, ಜಬೀನಾ ಬಾನು, ಶಂಕರಪ್ಪ, ಇಬ್ರಾಹಿಂ ಖಲೀಲ್‌, ರಂಗಧಾಮಯ್ಯ, ಸುಜಿತ್‌ ನಾಯಕ, ಮಧುಸೂದನ್‌, ಉಮೇಶ್, ಶಶಿಕಿರಣ್‌, ಚೇತನ್‌, ದೀಪಕ್‌, ತಿಪ್ಪೇಸ್ವಾಮಿ, ನಾಗಭೂಷಣ್‌, ಮುನಾಫ್, ಮಂಜು, ಕೆಂಪರಾಜು, ಮೀನಾಕ್ಷಿ, ಟಿ.ಎಸ್‌.ಭೀಮರಾಜು, ಅಶ್ವತ್ಥಯ್ಯ ಇತರರು ಹಾಜರಿದ್ದರು.