ಸ್ಮಾರ್ಟ್ ಸಿಟಿ ಅಪ್ರಯೋಜಕ: ಸಿಪಿಐಎಂ ಟೀಕೆ

ತುಮಕೂರು: ನಗರದಲ್ಲಿ ನಡೆಯುತ್ತಿರುವ ಸ್ಮಾರ್ಟ್ ಸಿಟಿ ಯೋಜನೆಯು ನಮಗೆ ಹೊಂದಿಕೊಳ್ಳದ ಅಪ್ರಯೋಜಕ ವಿದೇಶಿ ಮಾದರಿಯ ಕಾಪಿಯಾಗಿದೆ ಎಂದು ಸಿಪಿಐಎಂ ರಾಜ್ಯ ಸಮಿತಿ ಸದಸ್ಯ ಸೈಯದ್ ಮುಜೀಬ್ ಆಕ್ರೋಶ ವ್ಯಕ್ತಪಡಿಸಿದರು.

ನಗರದ ಜನ ಚಳವಳಿ ಕೇಂದ್ರದಲ್ಲಿ ಸಿಪಿಐಎಂ ಕೈಗಾರಿಕಾ ಕಾರ್ಮಿಕರ ಘಟಕದ ಸಮ್ಮೇಳನ ಉದ್ಘಾಟಿಸಿ ಮಾತನಾಡಿದರು.

ಯೋಜನೆ ರೂಪಿಸುವ ಹಂತದಲ್ಲಿ ಇದನ್ನು ವಿರೋಧಿಸಿದಾಗ ಮೌನವಾಗಿದ್ದವರು, ಈಗ ಜಾರಿ ಹಂತದಲ್ಲಿ ಕೂಗಾಡಿದರೇನು ಪ್ರಯೋಜನ ಎಂದು ಪ್ರಶ್ನಿಸಿದರು.

ಧರ್ಮದ ಹೆಸರಿನಲ್ಲಿ ಅಮಲೇರಿಸಿಕೊಂಡು ಯುವಜನತೆಯನ್ನು ದಿಕ್ಕು ತಪ್ಪಿಸುವ ಕೆಲಸ ನಡೆದಿದೆ. ಕೊಲೆಗಡುಕತನವನ್ನು ಲಜ್ಜೆ ಇಲ್ಲದೆ ಮಾತನಾಡುತ್ತಿದ್ದಾರೆ ಎಂದರು.

ಕಾರ್ಮಿಕ ಮುಖಂಡ ಶಿವಕುಮಾರಸ್ವಾಮಿ ಮಾತನಾಡಿ, ದುಡಿಯುವವರ ಸಂಕಟಗಳಿಗೆ ಸ್ಪಂದಿಸದೆ ಲಾಭ ಮಾತ್ರ ಲೆಕ್ಕ ಹಾಕುವ ಅಮಾನವೀಯತೆ ಕಂಡುಬರುತ್ತಿದೆ ಎಂದರು.

ಸಿಪಿಐಎಂ ಜಿಲ್ಲಾ ಕಾರ್ಯದರ್ಶಿ ಎನ್.ಕೆ.ಸುಬ್ರಮಣ್ಯ, ‘ಕೋವಿಡ್ ಸಂಕಟಗಳ ನಡುವೆ ಸರ್ಕಾರ ಬೆಲೆ ಏರಿಕೆ ಮಾಡಿದೆ. ರೈತ, ಕಾರ್ಮಿಕ, ಜನ ವಿರೋಧಿ ನೀತಿಗಳು ಬದುಕನ್ನು ಮತ್ತಷ್ಟು ದುಸ್ತರಗೊಳಸಿವೆ’ ಎಂದು ಆರೋಪಿಸಿದರು.

ಸಿಪಿಐಎಂ ನಗರ ಸಮಿತಿಯ ಷಣ್ಮಖಪ್ಪ, ಕಾರ್ಮಿಕರ ಮುಖಂಡರಾದ ಲೋಕೇಶ್, ರಂಗಧಾಮಯ್ಯ ಇದ್ದರು. ಕೈಗಾರಿಕಾ ಕಾರ್ಮಿಕರ ಘಟಕ ಕಾರ್ಯದರ್ಶಿಯಾಗಿ ಗಿರೀಶ್ ಅವರನ್ನು ಆಯ್ಕೆ ಮಾಡಲಾಯಿತು.