ಕಳಪೆ ಕಾಮಗಾರಿ: ದಿಬ್ಬೂರಿಗೆ ಹೋಗಲು ಪೌರ ಕಾರ್ಮಿಕರ ಹಿಂದೇಟು

ತುಮಕೂರು: ಎರಡು ವರ್ಷಗಳ ಹಿಂದಷ್ಟೇ ಪೌರ ಕಾರ್ಮಿಕರಿಗೆ ನಿರ್ಮಿಸಿ ಕೊಟ್ಟಿದ್ದ ಮನೆಗಳು ಬಿರುಕು ಬಿಡುತ್ತಿವೆ. ನಿರಂತರವಾಗಿ ನೀರು ಸೋರಿಕೆಯಿಂದ ಗೋಡೆಗಳು ಪಾಚಿ ಕಟ್ಟುತ್ತಿವೆ. ಇನ್ನೂ ಹತ್ತಾರು ಮನೆಗಳು ಖಾಲಿ ಖಾಲಿಯಾಗಿವೆ.

ಮಹಾನಗರ ಪಾಲಿಕೆಯ ಕಾಯಂ ಪೌರ ಕಾರ್ಮಿಕರಿಗೆ ವಸತಿ ಕಲ್ಪಿಸಲು, ನಗರ ಹೊರವಲಯದ ದಿಬ್ಬೂರಿನ ಬಳಿ 2 ಎಕರೆ ಪ್ರದೇಶದಲ್ಲಿ 52 ಮನೆ ನಿರ್ಮಿಸಲಾಗಿದೆ. ಇದಕ್ಕಾಗಿ ಪಾಲಿಕೆ ₹3.89 ಕೋಟಿ ವ್ಯಯಿಸಿದೆ. 2016ರಲ್ಲಿ ‘ಗೃಹ ಭಾಗ್ಯ’ ಯೋಜನೆಯಡಿ ಮನೆ ನಿರ್ಮಾಣಕ್ಕೆ ಚಾಲನೆ ನೀಡಲಾಗಿತ್ತು. ಸುಮಾರು 9 ವರ್ಷಗಳ ನಂತರ ಕಾಮಗಾರಿ ಪೂರ್ಣಗೊಂಡಿತ್ತು.

2023ರ ಸೆ. 23ರಂದು ಪೌರ ಕಾರ್ಮಿಕರ ದಿನಾಚರಣೆ ಸಮಯದಲ್ಲಿ ಜಿಲ್ಲಾ ಉಸ್ತುವಾರಿ ಜಿ.ಪರಮೇಶ್ವರ ಸಾಂಕೇತಿಕವಾಗಿ ಮನೆಗಳ ಬೀಗವನ್ನು ಕಾರ್ಮಿಕರಿಗೆ ನೀಡಿದ್ದರು. ಹಂಚಿಕೆಯಾದ ಎಲ್ಲ ಮನೆಗಳಲ್ಲಿ ಪೌರ ಕಾರ್ಮಿಕರು ವಾಸಿಸುತ್ತಿಲ್ಲ. ಮೂಲಭೂತ ಸೌಲಭ್ಯದ ಕೊರತೆ ಕಾರಣಕ್ಕೆ ಹಲವು ಮನೆಗಳಿಗೆ ಬೀಗ ಹಾಕಲಾಗಿದೆ.

ಸಮುಚ್ಚಯದ ಬಳಿ ಶುದ್ಧ ಕುಡಿಯುವ ನೀರಿನ ಘಟಕ ಆರಂಭಿಸಿಲ್ಲ. ಇಲ್ಲಿನ ಜನ ಕೊಳವೆ ಬಾವಿ ನೀರೇ ಕುಡಿಯುತ್ತಿದ್ದಾರೆ. ನೀರು ಕುಡಿಯಲು ಯೋಗ್ಯವೇ ಎಂಬುವುದನ್ನು ಪರಿಶೀಲಿಸುವ ಕಾರ್ಯವೂ ಆಗಿಲ್ಲ. ಇದು ಜನರ ಆರೋಗ್ಯ ಕೆಡಿಸುತ್ತಿದೆ. ನೀರಿನ ಘಟಕ ತೆರೆಯುವಂತೆ ಸ್ಥಳೀಯರು ಮನವಿ ಮಾಡಿದರೂ ಆಡಳಿತ ವರ್ಗದಿಂದ ಸಕಾರಾತ್ಮಕ ಸ್ಪಂದನೆ ಸಿಕ್ಕಿಲ್ಲ.

ಅನರ್ಹರಿಗೆ ಮನೆ ಹಂಚಿಕೆ: ಮನೆ ಇಲ್ಲದ ಪೌರ ಕಾರ್ಮಿಕರಿಗೆ ವಸತಿ ನೀಡುವ ಉದ್ದೇಶದಿಂದ ಗೃಹ ನಿರ್ಮಾಣ ಕಾರ್ಯ ನಡೆಸಲಾಗಿದೆ. ಆದರೆ, ಈಗಾಗಲೇ ಮನೆ ಇದ್ದವರಿಗೂ ಸಮುಚ್ಚಯದಲ್ಲಿ ಮನೆ ಹಂಚಿಕೆ ಮಾಡಲಾಗಿದೆ. ಬಾಡಿಗೆ ಮನೆಯಲ್ಲಿ ಇರುವವರು ಇಲ್ಲಿಗೆ ಸ್ಥಳಾಂತರಗೊಂಡಿದ್ದಾರೆ. ಸ್ವಂತ ಮನೆ ಇದ್ದವರು ಇಲ್ಲಿನ ಬಂಡವಾಳ ಕಂಡು ಸ್ಥಳಾಂತರಕ್ಕೆ ಹೆದರುತ್ತಿದ್ದಾರೆ. ಹೀಗಾಗಿ ಹಲವು ಮನೆಗಳು ಖಾಲಿಯಾಗಿವೆ.

ಪೌರ ಕಾರ್ಮಿಕರು ಹೊತ್ತು ಮೂಡುವ ಮುನ್ನವೇ ಕೆಲಸಕ್ಕೆ ತೆರಳಬೇಕಾಗುತ್ತದೆ. ವಸತಿ ಸಮುಚ್ಚಯದಿಂದ ನಗರಕ್ಕೆ ಬರಲು ಬಸ್‌, ಆಟೊ ವ್ಯವಸ್ಥೆ ಇಲ್ಲ. ಸ್ವಂತ ವಾಹನ ಇದ್ದವರು ಮಾತ್ರ ನಗರದ ಕಡೆಗೆ ಬರುವಂತಾಗಿದೆ. ಅನಿವಾರ್ಯವಾಗಿ ಬರಲೇಬೇಕಾದವರು ಆಟೊಗಳಿಗೆ ದುಬಾರಿ ಹಣ ಪಾವತಿಸಬೇಕಾಗುತ್ತದೆ. ಕೆಎಸ್‌ಆರ್‌ಟಿಸಿ ಬಸ್‌ ಸೌಲಭ್ಯ ಕಲ್ಪಿಸಬೇಕು ಎಂಬ ಬೇಡಿಕೆ ಈವರೆಗೂ ಈಡೇರಿಲ್ಲ.

‘ಸಮುಚ್ಚಯದಲ್ಲಿ ಸಂಧಿ ಮನೆಗಳು ಜಾಸ್ತಿ ಇದೆ. ಇದೇ ಕಾರಣಕ್ಕೆ ಪೌರ ಕಾರ್ಮಿಕರು ಇಲ್ಲಿಗೆ ಬರಲು ಹಿಂದೇಟು ಹಾಕುತ್ತಿದ್ದಾರೆ. ಊರಿಂದ ಆಚೆ ಮನೆ ಕೊಟ್ಟಿದ್ದಾರೆ. ಅಗತ್ಯ ಸೌಲಭ್ಯ ಕಲ್ಪಿಸದಿದ್ದರೆ ಬದುಕು ಸಾಗಿಸುವುದು ಹೇಗೆ? ಅಡುಗೆ ಕೋಣೆಯ ಬಟನ್‌ ಒತ್ತಿದರೆ ಶೌಚಾಲಯದಲ್ಲಿ ಲೈಟ್‌ ಬೆಳಗುತ್ತದೆ. ವಿದ್ಯುತ್‌ ಸಂಪರ್ಕ ಸರಿಯಾಗಿ ಇಲ್ಲದೆ ಅನೇಕ ಮೋಟರ್‌ಗಳು ಸುಟ್ಟು ಹೋಗಿವೆ’ ಎಂದು ಮಂಜುಳಾ ಇಲ್ಲಿನ ವಾಸ್ತವದ ಸ್ಥಿತಿ ತೆರೆದಿಟ್ಟರು.

ಭೂಮಿ ಪೂಜೆಗೆ ಸೀಮಿತ

ಮಹಾನಗರ ಪಾಲಿಕೆ ಸಿಬ್ಬಂದಿಗೆ ದಿಬ್ಬೂರಿನಲ್ಲಿ ಗೃಹ ನಿರ್ಮಾಣ ಕಾರ್ಯಕ್ಕೆ ಭೂಮಿ ಪೂಜೆ ನೆರವೇರಿಸಿ ತಿಂಗಳು ಕಳೆದಿದ್ದು ಇದುವರೆಗೆ ಯಾವುದೇ ಬೆಳವಣಿಗೆ ಆಗಿಲ್ಲ. ಪೌರ ಕಾರ್ಮಿಕರಿಗೆ ನೀಡಿರುವ ಮನೆಗಳ ಅನತಿ ದೂರದಲ್ಲಿಯೇ ಸಿಬ್ಬಂದಿಗೂ ವಸತಿ ಗೃಹ ನಿರ್ಮಿಸಲಾಗುತ್ತಿದೆ. ಕಳೆದ ಡಿಸೆಂಬರ್‌ ತಿಂಗಳಿನಲ್ಲಿ ಶಂಕುಸ್ಥಾಪನೆ ನೆರವೇರಿಸಲಾಗಿತ್ತು.

ಬೇಸಿಗೆಯಲ್ಲಿ ಸಮಸ್ಯೆ

ಕಾಮಗಾರಿ ಕಳಪೆ

ವಾಹನ ಸೌಲಭ್ಯ ಬೇಕು

ರಕ್ಷಣೆ ಕಲ್ಪಿಸಿ