ವಿಜ್ಞಾನ ಸಂಶೋಧನೆಯತ್ತ ಆಸಕ್ತಿ ಇರಲಿ

ಉಡುಪಿ: `ಮೂಲ ವಿಜ್ಞಾನ ಅಧ್ಯಯನದತ್ತ ವಿದ್ಯಾರ್ಥಿಗಳ ಒಲವು  ಕಡಿಮೆಯಾಗುತ್ತಿದೆ. ಹೀಗಾಗಿ ವಿದ್ಯಾರ್ಥಿಗಳು ವಿಜ್ಞಾನ ಕ್ಷೇತ್ರದ ಅಧ್ಯಯನ ಮತ್ತು ಸಂಶೋಧನೆಯತ್ತ ಆಸಕ್ತರಾಗಬೇಕು~ ಎಂದು ಕುವೆಂಪು ವಿಶ್ವವಿದ್ಯಾಲಯದ ವಿಶ್ರಾಂತ ಕುಲಪತಿ ಬಿ.ಎಸ್. ಶೇರಿಗಾರ್ ಹೇಳಿದರು.

ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ, ವಿಜ್ಞಾನ ಮತ್ತು ತಂತ್ರಜ್ಞಾನ ಅಕಾಡೆಮಿ ಉಡುಪಿಯ ಪೂರ್ಣಪ್ರಜ್ಞ ಕಾಲೇಜಿನ ಸಹಭಾಗಿತ್ವದಲ್ಲಿ ಕಾಲೇಜಿನಲ್ಲಿ ಬುಧವಾರ ಆಯೋಜಿಸಿದ್ದ ರಾಷ್ಟ್ರೀಯ ವಿಜ್ಞಾನ ದಿನಾಚರಣೆ ಉದ್ಘಾಟಿಸಿ ಅವರು ಮಾತನಾಡಿದರು.

`ವಿಜ್ಞಾನ ಕ್ಷೇತ್ರದ ಸಂಶೋಧನೆಗೆ ಸರ್.ಸಿ.ವಿ.ರಾಮನ್ ಕೊಡುಗೆಯಾದ ರಾಮನ್ ಪರಿಣಾಮ  ನೆನಪಿಸಿಕೊಳ್ಳುವ ಸಲುವಾಗಿ ಈ ದಿನವನ್ನು ದೇಶದಾದ್ಯಂತ ಆಚರಿಸಲಾಗುತ್ತಿದೆ. ಸರ್.ಸಿ.ವಿ. ರಾಮನ್ ಕೇವಲ ರೂ.300 ಬೆಲೆಬಾಳುವ ಉಪಕರಣಗಳನ್ನಷ್ಟೇ ಬಳಸಿಕೊಂಡು ಈ ಸಂಶೋಧನೆ ನಡೆಸಿದರು. ಅವರ ಸಾಧನೆಗಾಗಿ ನೊಬೆಲ್ ಮತ್ತು ನೈಟ್‌ಹುಡ್ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.   ರಾಮನ್ ಅವರ ಸಾಧನೆ, ಜೀವನ ಚರಿತ್ರೆಗಳಿಂದ ಯುವಜನರು ಪ್ರೇರಿತರಾಗಬೇಕಾಗಿದೆ~ ಎಂದರು.

`ವಿಜ್ಞಾನ ಕ್ಷೇತ್ರವು ಸಾಕಷ್ಟು ಬೆಳೆದಿದ್ದು ಅನೇಕ ನೂತನ ಉಪಕರಣಗಳು ಸಂಶೋಧನೆಗೆ ಸಹಕರಿಸುತ್ತಿವೆ. ನ್ಯಾನೊ ತಂತ್ರಜ್ಞಾನ ಮೂಲಕ ತಲೆಕೂದಲಿನ ದಪ್ಪವನ್ನು 1 ಲಕ್ಷ ನ್ಯಾನೋ ಮೀಟರ್ ಎಂದು ಅಳೆದಿದ್ದಾರೆ~ ಎಂದರು.

ಪರಮಾಣು ಶಕ್ತಿಯ ಲಾಭ ಮತ್ತು ಅಪಾಯಗಳ ಕುರಿತು ವಿವರಿಸಿದ ಅವರು, `ಪರ‌್ಯಾಯ ಇಂಧನ ಕಂಡು ಹಿಡಿಯುವ ಅನಿವಾರ್ಯತೆ ಬಂದೊದಗಿದೆ. ಪವನಶಕ್ತಿ ಮತ್ತು ಸೌರಶಕ್ತಿಗಳಿಂದ ಪರ‌್ಯಾಯ ಇಂಧನವನ್ನು ಪಡೆಯುವ ಪ್ರಯತ್ನ ನಡೆಯುತ್ತಿರುವುದು ಶ್ಲಾಘನೀಯ~ ಎಂದರು.

ಪರಿಸರ ವಿಜ್ಞಾನಿ ಎನ್.ಎ. ಮಧ್ಯಸ್ಥ ಅವರು ಮೈಸೂರಿನ ಮಹಾರಾಜ ಕಾಲೇಜಿನಲ್ಲಿ ಸರ್.ಸಿ.ವಿ.ರಾಮನ್ ಅವರ ಉಪನ್ಯಾಸದಿಂದ ಪ್ರಭಾವಿತಗೊಂಡಿದ್ದನ್ನು ನೆನಪಿಸಿಕೊಂಡರು. ಪ್ರಾಂಶುಪಾಲ ಕೆ.ಸದಾಶಿವ ರಾವ್ ಅಧ್ಯಕ್ಷತೆ ವಹಿಸಿದ್ದರು.

ಭೌತಶಾಸ್ತ್ರ ವಿಭಾಗದ ಮುಖ್ಯಸ್ಥ ಎ.ಪಿ.ಭಟ್, ರಸಾಯನಶಾಸ್ತ್ರದ ಮುಖ್ಯಸ್ಥೆ  ಸಂಧ್ಯಾ, ಗಣಿತ ವಿಭಾಗದ ಮುಖ್ಯಸ್ಥ ರಾಘವೇಂದ್ರ ಇದ್ದರು.