ಭರ್ಜರಿ ವ್ಯಾಪಾರ ಕಂಡ ನಾಗಪುರ ಕಿತ್ತಳೆ

ಕಾರವಾರ: ನಗರದ ಬಿಎಸ್‌ಎನ್‌ಎಲ್ ಕಚೇರಿ ಎದುರು ಬುಧವಾರ ನಾಗಪುರದಿಂದ ತಂದಿರುವ ಕಿತ್ತಳೆ ಹಣ್ಣಿನ ವ್ಯಾಪಾರ ಭರ್ಜರಿಯಾಗಿ ನಡೆಯಿತು.

ಸುಮಾರು ಒಂದು ಮಿನಿ ಲಾರಿ ತುಂಬ ಕಿತ್ತಳೆ ಹಣ್ಣನ್ನು ತಂದು ರಸ್ತೆ ಬದಿಯಲ್ಲಿ ರಾಶಿಹಾಕಿ ವ್ಯಾಪಾರಸ್ಥರು ಮಾರಾಟ ಮಾಡುತ್ತಿದ್ದರು. ಕಿತ್ತಳೆ ಹಣ್ಣು ಕೆಜಿಗೆ ಮಾರುಕಟ್ಟೆಯಲ್ಲಿ ರೂ 60 ಇದೆ. ಆದರೆ ನಾಗಪುರದಿಂದ ತಂದ ಕಿತ್ತಲೆ ಹಣ್ಣನ್ನು ಕಿಲೋಗೆ ಕೇವಲ ರೂ 30ರಂತೆ ಮಾರಾಟ ಮಾಡುತ್ತಿದ್ದರು. ಕಡಿಮೆ ಬೆಲೆ ಇರುವುದರಿಂದ ಸಹಜವಾಗೇ ಗ್ರಾಹಕರು ಕಿತ್ತಳೆ ಹಣ್ಣಿನತ್ತ ಆಕರ್ಷಿತರಾಗಿ ಕಿಲೋಗಟ್ಟಲೇ ಕಿತ್ತಳೆ ಹಣ್ಣು ತೆಗೆದುಕೊಂಡು ಹೋದರು.

`ಕಳೆದ ಬಾರಿ ಕಾಶ್ಮೀರಿ ಸೇಬು ಹಣ್ಣು ತಂದು ಮಾರಾಟ ಮಾಡಿದ್ದೆ ಈ ಬಾರಿ ಕಿತ್ತಳೆ ಹಣ್ಣು ತಂದಿದ್ದೇನೆ. ಇದು ಖಾಲಿಯಾದ ನಂತರ ಮತ್ತೊಂದು ಲೋಡ್ ಹಣ್ಣು ತಂದು ಮಾರಾಟ ಮಾಡುತ್ತೇನೆ~ ಎಂದು ವ್ಯಾಪಾರಿ ಶಾನಬಾಗ `ಪ್ರಜಾವಾಣಿ~ಗೆ ತಿಳಿಸಿದರು.