ಕಾರವಾರ: ಪಣಸೋಲಿ ಆನೆ ಶಿಬಿರಕ್ಕೆ 2 ಗಂಡಾನೆ ಸೇರ್ಪಡೆ

ಕಾರವಾರ: ಜೊಯಿಡಾ ತಾಲ್ಲೂಕಿನ ಪಣಸೋಲಿಯ ಆನೆ ಶಿಬಿರಕ್ಕೆ ಹೊಸದಾಗಿ ‘ಆಲೆ’ ಮತ್ತು ‘ಧನುಷ್’ ಹೆಸರಿನ ಎರಡು ಗಂಡು ಆನೆಗಳ ಸೇರ್ಪಡೆಯಾಗಿದೆ.

ಶಿವಮೊಗ್ಗ ಜಿಲ್ಲೆಯ ಸಕ್ರೆಬೈಲ್‌ ಆನೆಶಿಬಿರದಿಂದ ಕರೆತರಲಾದ ಗಂಡಾನೆಗಳನ್ನು ಶುಕ್ರವಾರ ಪಣಸೋಲಿ ಶಿಬಿರಕ್ಕೆ ಅಧಿಕೃತವಾಗಿ ಸೇರ್ಪಡೆ ಮಾಡಿಕೊಳ್ಳಲಾಯಿತು. ಶಾಸಕ ಆರ್.ವಿ.ದೇಶಪಾಂಡೆ ಆನೆಗಳಿಗೆ ಪೂಜೆ ಸಲ್ಲಿಸಿ, ಬರಮಾಡಿಕೊಂಡರು.

ಹೊಸ ಆನೆಗಳ ಸೇರ್ಪಡೆಯೊಂದಿಗೆ ಪಣಸೋಲಿ ಆನೆ ಶಿಬಿರದಲ್ಲಿನ ಆನೆಗಳ ಸಂಖ್ಯೆ 5ಕ್ಕೆ ಏರಿಕೆಯಾಗಿದೆ. ಇಲ್ಲಿ ಈವರೆಗೆ ಮೂರು ಹೆಣ್ಣು ಆನೆಗಳು ಮಾತ್ರವೇ ಇದ್ದವು. ಗೌರಿ ಹೆಸರಿನ ಆನೆ ಮರಿಯು ಅನಾರೋಗ್ಯದಿಂದ ಕೆಲ ದಿನಗಳ ಹಿಂದಷ್ಟೇ ಮೃತಪಟ್ಟಿತ್ತು.

‘ಪಣಸೋಲಿ ಆನೆ ಶಿಬಿರದಲ್ಲಿ ‘ಶಿವಾಂಗಿ’, ‘ಚಾಮುಂಡಿ’ ಮತ್ತು ‘ಚಂಚಲಾ’ ಹೆಸರಿನ ಹೆಣ್ಣು ಆನೆಗಳು ಮಾತ್ರವೇ ಇದ್ದವು. ಕಾಡಾನೆಗಳ ಸೆರೆಹಿಡಿಯಲು ಕೂಂಬಿಂಗ್ ಕಾರ್ಯಾಚರಣೆ ನಡೆಸಲು ಗಂಡಾನೆಗಳ ಜೋಡಿ ಅಗತ್ಯವಿದ್ದ ಕಾರಣದಿಂದ ಎರಡು ಆನೆಗಳನ್ನು ಕರೆತರಲಾಗಿದೆ. 17 ವರ್ಷದ ‘ಆಲೆ’ಗೆ ಕೂಂಬಿಂಗ್ ತರಬೇತಿ ಇದೆ. 7 ವರ್ಷದ ‘ಧನುಷ್‌ಗೆ ಇನ್ನಷ್ಟೆ ತರಬೇತಿ ಸಿಗಬೇಕಿದೆ. ಇವು ಇಲ್ಲಿಯೇ ಕಾಯಂ ಆಗಿ ಇರಲಿವೆ. ಈಗ ಶಿಬಿರದಲ್ಲಿ ಆನೆಗಳ ಪೂರ್ಣ ಕುಟುಂಬ ರಚನೆಯಾದಂತಾಗಿದೆ’ ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ಆನೆಗಳ ಸೇರ್ಪಡೆ ಕಾರ್ಯಕ್ರಮದ ವೇಳೆ ಕಾಳಿ ಹುಲಿ ಸಂರಕ್ಷಿತಾರಣ್ಯದ ಡಿಸಿಎಫ್ ನೀಲೇಶ್ ಶಿಂಧೆ, ಪಣಸೋಲಿ ಆರ್‌ಎಫ್‌ಒ ರವಿಕಿರಣ, ಕೆಟಿಆರ್ ವ್ಯಾಪ್ತಿಯ ಅರಣ್ಯಾಧಿಕಾರಿಗಳು ಪಾಲ್ಗೊಂಡಿದ್ದರು.