ರೈತರ ಕೈ ಸುಡುತ್ತಿರುವ ‘ಡಿ.ಎ.ಪಿ’

ಮುಂಡಗೋಡ: ಕೆಲವು ದಿನಗಳಿಂದ ಸುರಿದ ಮಳೆಯು ಬಿತ್ತನೆಗೆ ಹದ ಮಾಡಿಕೊಟ್ಟಿದೆ. ವರ್ಷದ ದುಡಿಮೆ ಆರಂಭಕ್ಕೆ, ಅನ್ನದಾತ ಈಗಾಗಲೇ ಚಾಲನೆ ನೀಡಿದ್ದಾರೆ. ಹೊಲಗದ್ದೆಗಳನ್ನು ಹಸನು ಮಾಡಿ, ಕಾಳಿನ ಕಣಜ ತುಂಬಿಸಲು ಅಣಿಯಾಗಿದ್ದಾರೆ. ಆದರೆ, ರಸಗೊಬ್ಬರ ದರ ಏರಿಕೆಯಾಗಿದ್ದು, ರೈತರಿಗೆ ಹೊರೆಯಾಗಿದೆ.

‘ಡಿ.ಎ.ಪಿ. ಗೊಬ್ಬರವು ಈ ಸಲಕೈ ಸುಡುತ್ತಿದೆ. ಕಳೆದ ವರ್ಷ ಪ್ರತಿ ಚೀಲಕ್ಕೆ ₹1,200 ರೂಪಾಯಿ ಇದ್ದ ದರವು, ಈ ಸಲ ₹1,900ಕ್ಕೆ ಏರಿಕೆಯಾಗಿದೆ. 1026 ಮಾದರಿಯ ಗೊಬ್ಬರವೂ ಪ್ರತಿ ಚೀಲದ ಮೇಲೆ ₹625ಯಷ್ಟು ಹೆಚ್ಚಳವಾಗಿದೆ. ವರ್ಷದಿಂದ ವರ್ಷಕ್ಕೆ ಬೀಜ, ಗೊಬ್ಬರ ಬೆಲೆ ಏರುತ್ತಿದೆ. ಆದರೆ ರೈತ ಬೆಳೆದ ಬೆಳೆಗೆ ಸೂಕ್ತ ಬೆಲೆ ಸಿಗುತ್ತಿಲ್ಲ’ ಎಂದು ರೈತ ಬಾಬಣ್ಣ ವಾಲ್ಮೀಕಿ ಹೇಳಿದರು.

ತಾಲ್ಲೂಕಿನಲ್ಲಿ 13,000 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಕೆಲಸ ನಡೆಯುತ್ತದೆ. ಇದಲ್ಲದೇ 6 ಸಾವಿರದಿಂದ 8 ಸಾವಿರ ಹೆಕ್ಟೇರ್ ಅರಣ್ಯ ಅತಿಕ್ರಮಣ ಭೂಮಿಯಲ್ಲಿಯೂ ರೈತರು ಕೃಷಿ ಕೆಲಸ ಮಾಡುತ್ತಾರೆ. ಮಳೆ ತುಸು ಬಿಡುವು ನೀಡಿದರೆ, ಬಿತ್ತನೆ ಕಾರ್ಯ ಭರದಿಂದ ಸಾಗಲಿದೆ ಎಂದು ರೈತರು ಹೇಳುತ್ತಾರೆ.

ಬೀಜ, ಗೊಬ್ಬರ ಖರೀದಿ: ಇಲ್ಲಿನ ಕೃಷಿ ಇಲಾಖೆಯ ರೈತ ಸಂಪರ್ಕ ಕೇಂದ್ರದಲ್ಲಿ ಭತ್ತ ಹಾಗೂ ಗೋವಿನಜೋಳದ ವಿವಿಧ ತಳಿಗಳ ಮಾಹಿತಿ, ದರವನ್ನು ರೈತರು ಪಡೆಯುತ್ತಿದ್ದಾರೆ. ವಾರದ ಮುಂಚೆ ಗದ್ದೆ ಹಸನು ಮಾಡಿಕೊಂಡಿರುವ ರೈತರಿಗೆ, ಬಿತ್ತನೆಗೆ ತುರ್ತಾಗಿ ಬೀಜ ಬೇಕಾಗಿವೆ.