ಕಾರವಾರ: ವಿದ್ಯುತ್ ಕಂಬ ಬಿದ್ದು ಸಂತೆ ಅಸ್ತವ್ಯಸ್ತ

ಕಾರವಾರ: ಬಿರುಸಿನ ಗಾಳಿಗೆ ಮರದ ಟೊಂಗೆಗಳು ಬಿದ್ದು ಇಲ್ಲಿನ ಎಂ.ಜಿ.ರಸ್ತೆಯಲ್ಲಿರುವ ನಗರಸಭೆ ಕಚೇರಿ ಸಮೀಪ ಮೂರಕ್ಕೂ ಹೆಚ್ಚು ವಿದ್ಯುತ್ ಕಂಬಗಳು ಶನಿವಾರ ರಾತ್ರಿ ಧರೆಗುರುಳಿದವು. ಕಂಬಗಳ ತೆರವಿಗೆ ವಿಳಂಬವಾಗಿದ್ದರಿಂದ ಭಾನುವಾರದ ಸಂತೆಗೆ ಅಡಚಣೆ ಉಂಟಾಯಿತು.

ಸಾಲು ಸಾಲಾಗಿ ಕಂಬಗಳು ಬಿದ್ದಿದ್ದರಿಂದ ಸುಮಾರು 200 ಮೀಟರ್ ದೂರದವರೆಗೆ ವಿದ್ಯುತ್ ತಂತಿಗಳು ಬಿದ್ದಿದ್ದವು. ನಸುಕಿನ ಜಾವದಿಂದಲೇ ಇದೇ ರಸ್ತೆಯಲ್ಲಿ ಅಂಗಡಿ ಇಟ್ಟುಕೊಳ್ಳುತ್ತಿದ್ದ ತರಕಾರಿ ವ್ಯಾಪಾರಿಗಳಿಗೆ ವಹಿವಾಟು ನಡೆಸಲು ಜಾಗದ ಕೊರತೆ ಎದುರಾಯಿತು. ಅಲ್ಲದೆ ಈ ರಸ್ತೆಯಲ್ಲಿ ಕೆಲ ತಾಸುಗಳವರೆಗೆ ಸಂಚಾರ ಸ್ಥಗಿತಗೊಂಡಿತ್ತು.

ಮಧ್ಯಾಹ್ನದ ವೇಳೆಗೆ ಕಂಬಗಳನ್ನು ತೆರವುಗೊಳಿಸಲಾಯಿತು. ಆದರೆ, ಅರ್ಧ ದಿನಕ್ಕೂ ಹೆಚ್ಚ ಕಾಲ 10ಕ್ಕೂ ಹೆಚ್ಚು ಅಂಗಡಿಕಾರರಿಗೆ ವಹಿವಾಟು ನಡೆಸಲು ಅವಕಾಶ ಆಗದೆ ಪರದಾಡಿದರು.