ಪೌರಕಾರ್ಮಿಕರ ಪ್ರತಿಭಟನೆ

ಶಿರಸಿ: ತಿಂಗಳ ಸಂಬಳ ವಿಳಂಬವಾದ ಕಾರಣ ಪೌರಕಾರ್ಮಿಕರು ಬುಧವಾರ ಇಲ್ಲಿ ನಗರಸಭೆ ಎದುರು ಪ್ರತಿಭಟನೆ ನಡೆಸಿದರು. ಸ್ವಚ್ಛತಾ ಕಾರ್ಯಕ್ಕೆ ಬಳಸುವ ಎಲ್ಲ ವಾಹನಗಳನ್ನು ನಗರಸಭೆ ಎದುರು ತಂದು ನಿಲ್ಲಿಸಿ, ಅಸಮಾಧಾನ ವ್ಯಕ್ತಪಡಿಸಿದರು.

‘ನವೆಂಬರ್ 20 ಕಳೆದರೂ, ಹಿಂದಿನ ತಿಂಗಳ ಸಂಬಳ ಖಾತೆಗೆ ಜಮಾ ಆಗಿಲ್ಲ. ಕೈಗಡ ಸಾಲ ಮಾಡಿಕೊಂಡು ಜೀವನ ನಡೆಸುತ್ತಿದ್ದೇವೆ. ಸಂಬಳಬಾರದೇ ತೊಂದರೆಯಾಗಿದೆ’ ಎಂದು 50ಕ್ಕೂ ಹೆಚ್ಚು ಪೌರಕಾರ್ಮಿಕರು ಆರೋಪಿಸಿದರು. ಸ್ಥಳಕ್ಕೆ ಭೇಟಿ ನೀಡಿದ ಪೌರಾಯುಕ್ತ ರಮೇಶ ನಾಯಕ ಅವರು, ತಾಂತ್ರಿಕ ಸಮಸ್ಯೆ ಬಗೆಹರಿಸಿ, ಆದಷ್ಟು ಶೀಘ್ರ ಸಂಬಳ ನೀಡಲಾಗುವುದು ಎಂದು ಭರವಸೆ ನೀಡಿದರು.