ಯಲ್ಲಾಪುರ | ಕರಡಿ ದಾಳಿ: ಮೂವರಿಗೆ ಗಾಯ

ಯಲ್ಲಾಪುರ: ತಾಲ್ಲೂಕಿನ ಕುಂದರಗಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹೆಮ್ಮಾಡಿಯಲ್ಲಿ ಬುಧವಾರ ರಾತ್ರಿ ಮೂವರು ರೈತರ ಮೇಲೆ ಕರಡಿ ದಾಳಿ ಮಾಡಿದೆ.

ಹೆಮ್ಮಾಡಿಯ ಗಂಗಾಧರ ನಾಗ್ಯಾ ಮಡಿವಾಳ (52), ನಿತ್ಯಾನಂದ ಬಂಗಾರ್ಯ ಗೌಡ ( 52) ಹಾಗೂ ಪಾಂಡುರಂಗ ಗಂಗಾಧರ ಮಡಿವಾಳ (64) ಕರಡಿ ದಾಳಿಗೆ ಒಳಗಾದವರು.

ಹೊಲದಲ್ಲಿ ಕೆಲಸ ಮಾಡಿ ಮನೆಗೆ ಬರುತ್ತಿದ್ದ ವೇಳೆ ಕರಡಿ ದಾಳಿ ಮಾಡಿದೆ. ದಾಳಿಯ ಪರಿಣಾಮ ಇವರಿಗೆ ಚಿಕ್ಕಪುಟ್ಟ ಗಾಯವಾಗಿದ್ದು ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ಪಡೆದಿದ್ದಾರೆ ಎಂದು ಗ್ರಾಮಸ್ಥರು ತಿಳಿಸಿದ್ದಾರೆ.