ಸವಿತಾ ಅಭಿವೃದ್ಧಿ ನಿಗಮಕ್ಕೆ ₹100 ಕೋಟಿ ಬೇಡಿಕೆ

ಹೊಸಪೇಟೆ: ಬಹುರಾಷ್ಟ್ರೀಯ ಕಂಪನಿಗಳಿಂದ ಸಲೂನ್‌, ಸ್ಪಾಗಳು ಸ್ಥಾಪನೆಯಾಗಿ ಸಾಂಪ್ರದಾಯಿಕ ಸವಿತಾ ಸಮಾಜದವರಿಗೆ ಕಂಟಕ ಎದುರಾಗಿದೆ. ಇದಕ್ಕೆ ಪ್ರತಿಸ್ಪರ್ಧೆ ಒಡ್ಡುವ ರೀತಿಯಲ್ಲಿ ಸಲೂನ್‌ಗಳನ್ನು ತೆರೆದು ಬದುಕು ಕಟ್ಟಿಕೊಳ್ಳಲು ಸಮಾಜದವರಿಗೆ ಹೆಚ್ಚಿನ ಅನುದಾನ ನೀಡಬೇಕಿದೆ. ಹೀಗಾಗಿ ನಿಗಮಕ್ಕೆ ಮುಂದಿನ ಬಜೆಟ್‌ನಲ್ಲಿ ₹100 ಕೋಟಿ ಒದಗಿಸಲು ಒತ್ತಾಯಿಸಲಾಗುತ್ತಿದೆ ಎಂದು ಸವಿತಾ ಸಮಾಜ ಅಭಿವೃದ್ಧಿ ನಿಗಮದ ಅಧ್ಯಕ್ಷ ಎಂ.ಎಸ್.ಮುತ್ತುರಾಜ್‌ ಹೇಳಿದರು.

ಇಲ್ಲಿ ಶುಕ್ರವಾರ ಸಮಾಜದವರ ಸನ್ಮಾನ ಸ್ವೀಕರಿಸಿ ಮಾತನಾಡಿದ ಅವರು, ಸವಿತಾ ಸಮಾಜ ಜನರಿಗೆ ಕುಲ ವೃತ್ತಿಯೇ ಜೀವಾಳ, ನಿಗಮದಿಂದ ಚಾಲ್ತಿಯಲ್ಲಿರುವ ಯೋಜನೆಗಳ ಪೈಕಿ ಗಂಗಾ ಕಲ್ಯಾಣ ಕೈಬಿಟ್ಟು, ಸ್ವಯಂ ಉದ್ಯೋಗಕ್ಕೆ ನೀಡಲಾಗುವ ಸಾಲದ ಪ್ರಮಾಣ ಹೆಚ್ಚಿಸಲು ಚಿಂತನೆ ನಡೆಸಲಾಗುತ್ತಿದೆ ಎಂದರು.

ಸವಿತಾ ಸಮಾಜದ ಜನರ ಕುಲವೃತ್ತಿಯನ್ನು ನಿಂದಿಸುವ ಪದ ಬಳಸುವವರನ್ನು ಶಿಕ್ಷೆಗೆ ಗುರಿಪಡಿಸಬೇಕು ಎಂದ ಅವರು, ಎಲ್ಲ ಕ್ಷೇತ್ರಗಳಲ್ಲಿ ಹಿಂದುಳಿದ ಸಮಾಜದ ಜನರ ಬದುಕಿನಲ್ಲಿ ಗುಣಾತ್ಮಕ ಬದಲಾವಣೆ ತರಲು ಪ್ರವರ್ಗ- 1ಬಿಗೆ ಈ ಸಮಾಜವನ್ನು ಸೇರಿಸಬೇಕು, ಈ ಕುರಿತು ಬೆಳಗಾವಿ ಅಧಿವೇಶನಕ್ಕೂ ಮುನ್ನ ಸಿಎಂ ಸಿದ್ದರಾಮಯ್ಯ ಅವರ ಗಮನಕ್ಕೆ ತರುತ್ತೇವೆ ಎಂದರು.

ಹೊಸಪೇಟೆ ಸವಿತಾ ಸಮಾಜದ ಅಧ್ಯಕ್ಷ ಡಿ.ತಿರುಮಲೇಶ, ಮುಖಂಡರಾದ ಶ್ರೀನಿವಾಸ್, ಮನೋಹರ್, ಎನ್.ವೇಣುಗೋಪಾಲ, ಎನ್.ದೀಪು, ವಿ.ಮಹೇಶ ಕುಮಾರ್, ಭೀಮಣ್ಣ ಇತರರು ಇದ್ದರು.