ವಿಜಯಪುರ | ನಂದಿ ಸಹಕಾರಿ ಸಕ್ಕರೆ ಕಾರ್ಖಾನೆ ಚುನಾವಣೆ: ಶೇ 92 ರಷ್ಟು ಮತದಾನ

ವಿಜಯಪುರ: ತೀವ್ರ ಜಿದ್ದಾಜಿದ್ದಿಗೆ ಹಾಗೂ ಕುತೂಹಲಕ್ಕೆ ಕಾರಣವಾಗಿದ್ದ ಬಬಲೇಶ್ವರ ತಾಲ್ಲೂಕಿನ ಕೃಷ್ಣಾ ನಗರದ ಪ್ರತಿಷ್ಠಿತ ನಂದಿ ಸಹಕಾರಿ ಸಕ್ಕರೆ ಕಾರ್ಖಾನೆಗೆ ಶುಕ್ರವಾರ ಶಾಂತಿಯುತ ಮತದಾನ ನಡೆಯಿತು.

ಕೃಷ್ಣಾ ನಗರದ ನಂದಿ ಇಂಟರ್‌ನ್ಯಾಷನಲ್ ಶಾಲೆಯ ಆವರಣದಲ್ಲಿ ನಡೆದ ಚುನಾವಣೆಯಲ್ಲಿ 8168 ಮತದಾರರ ಪೈಕಿ, 7555 ಮತದಾರರು ತಮ್ಮ ಹಕ್ಕು ಚಲಾಯಿಸಿದರು. ಅಂದರೆ, ಶೇ 92ರಷ್ಟು ಮತದಾನವಾಗಿದೆ.

ಸಂಜೆ 5ರಿಂದ ಆರಂಭವಾದ ಮತ ಎಣಿಕೆ ಕಾರ್ಯವು ತಡರಾತ್ರಿವರೆಗೂ ನಡೆಯಿತು. ಯಾವುದೇ ಅಹಿತಕರ ಘಟನೆ ವರದಿಯಾಗಿಲ್ಲ.

ಹಾಲಿ ಅಧ್ಯಕ್ಷ ಶಶಿಕಾಂತಗೌಡ ಪಾಟೀಲ, ಮಾಜಿ ಅಧ್ಯಕ್ಷ ಕುಮಾರ ದೇಸಾಯಿ ಹಾಗೂ ರಮೇಶ ಬಿದನೂರು ಅವರ ಮೂರು ಬಣಗಳ ಒಟ್ಟು 38 ಅಭ್ಯರ್ಥಿಗಳ ನಡುವೆ 17 ನಿರ್ದೇಶಕ ಸ್ಥಾನಕ್ಕೆ ತುರಿಸಿನ ಪೈಪೋಟಿ ನಡೆದಿತ್ತು. ಯಾವ ಬಣಕ್ಕೆ ಕಾರ್ಖಾನೆ ಚುಕ್ಕಾಣಿ ಸಿಗಲಿದೆ ಎಂಬುದು ಕುತೂಹಲ ಮೂಡಿಸಿದೆ.