ವಡಗೇರಾ | ಬಬಲಾದ ಬಳಿ ವೈದ್ಯಕೀಯ ಘನ ತ್ಯಾಜ್ಯ ಹಾಕುವುದಕ್ಕೆ ವಿರೋಧ: ಪ್ರತಿಭಟನೆ

ವಡಗೇರಾ: ವಡಗೇರಾ ತಾಲ್ಲೂಕಿನ ಬಬಲಾದ ಗ್ರಾಮದ ಹತ್ತಿರ ಘನತ್ಯಾಜ್ಯ ಘಟಕದಲ್ಲಿ ತ್ಯಾಜ್ಯವನ್ನು ಹಾಕುವುದನ್ನು ನಿಲ್ಲಿಸಬೇಕು ಎಂದು ಆಗ್ರಹಿಸಿ ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿ ಪದಾಧಿಕಾರಿಗಳು  ಮಂಗಳವಾರ ಬಬಲಾದ ಗ್ರಾಮದ ಗೇಟ್ ಹತ್ತಿರ ಪ್ರತಿಭಟನೆ ನಡೆಸಿದರು.

ಬೀದರ್‌ ಹಾಗೂ ಕಲಬುರಗಿ ವೈದ್ಯಕೀಯ ಆಸ್ಪತ್ರೆಗಳ ಘನ ತ್ಯಾಜ್ಯವನ್ನು ಇಲ್ಲಿ ತಂದು ಹಾಕುತ್ತಿರುವುದರಿಂದ ಸುತ್ತಲಿನ ಪರಿಸರ ಸಂಪೂರ್ಣವಾಗಿ ಹಾಳಾಗಿದೆ. ಕೂಡಲೇ ಇಲ್ಲಿ ಘನ ತ್ಯಾಜ್ಯವನ್ನು ಹಾಕುವುದನ್ನು ನಿಲ್ಲಿಸದಿದ್ದರೆ ಇದೇ 25ರಂದು ಯಾದಗಿರಿ ಬಂದ್ ಮಾಡಿ ಪ್ರತಿಭಟನೆ ಮಾಡಲಾಗುವುದು ಎಂದು ಎಚ್ಚರಿಸಿದರು.

ಪ್ರತಿಭಟನಾ ಸ್ಥಳಕ್ಕೆ ಬಂದ ವಡಗೇರಾ ತಹಶೀಲ್ದಾರ್‌ ಶ್ರೀನಿವಾಸ ಚಾಪೇಲ್ ಅವರಿಗೆ ಪ್ರತಿಭಟನಾಕಾರರು ಮನವಿ ಪತ್ರವನ್ನು ಸಲ್ಲಿಸಿದರು. ಮನವಿ ಪತ್ರ ಸ್ವೀಕರಿಸಿದ ತಹಶೀಲ್ದಾರ್‌,  ಸಮಸ್ಯೆಯನ್ನು ಈ ಕೂಡಲೇ ಜಿಲ್ಲಾಧಿಕಾರಿಗಳ ಗಮನಕ್ಕೆ ತರಲಾಗುವುದು ಎಂದು ಹೇಳಿದ ನಂತರ ಪ್ರತಿಭಟನೆಯನ್ನು ಅಂತ್ಯಗೊಳಿಸಲಾಯಿತು

ಪ್ರತಿಭಟನೆಯಲ್ಲಿ ದಲಿತ ಸಂಘರ್ಷ ಸಮಿತಿಯ ರಾಜ್ಯ ಸಂಚಾಲಕ  ಮಲ್ಲಿಕಾರ್ಜುನ ಕ್ರಾಂತಿ, ಗೌತಮ ಕ್ರಾಂತಿ, ಅಜೀಜ್ ಐಕೂರ, ಮಲ್ಲಿಕಾರ್ಜುನ ಶಾಖಾ, ನಿಂಗಣ್ಣ, ಕಟಗಿ, ಗಂಗಾರಾಮ್ ಕೊರಬಾರ್, ಈಶ್ವರ ಕ್ರಾಂತಿ ಬಬಲಾದ, ಪೂಜಾರಿ, ದೇವಿಕೆಮ್ಮ ಬಬಲಾದ, ನಾಗವೇಣಿ, ಲಕ್ಷ್ಮಿ, ನರಸಪ್ಪ, ಜ್ಯೋತಿ, ಇತತರು ಉಪಸ್ಥಿತರಿದ್ದರು.