ಒಂದೇ ವಾರ್ಡ್‌ನಿಂದ ಅಕ್ಕ-ತಮ್ಮ ಗೆಲುವು

ಕಕ್ಕೇರಾ: ತಿಂಥಣಿ ಗ್ರಾಮ ಪಂಚಾಯಿತಿ ಚುನಾವಣೆಯಲ್ಲಿ ಅಕ್ಕ-ತಮ್ಮ ಒಂದೇ ವಾರ್ಡ್‌ಗೆ ಸ್ಪರ್ಧಿಸಿ ಭರ್ಜರಿ ಗೆಲುವು ಸಾಧಿಸಿದ್ದಾರೆ.

ಶಾಸಕ ರಾಜುಗೌಡ ಅವರ ಕಟ್ಟಾ ಬೆಂಬಲಿಗನಾದ ಪದವೀಧರ ಸಂಜೀವಪ್ಪ ವೈ.ಕವಾಲ್ದಾರ್, 2015ರಲ್ಲಿ ಜರುಗಿದ ಗ್ರಾ.ಪಂ ಸಾರ್ವತ್ರಿಕ ಚುನಾವಣೆಯಲ್ಲಿ ಪ್ರಥಮ ಬಾರಿಗೆ ಸ್ಪರ್ಧಿಸಿ ಗೆದ್ದು, 2ನೇ ಅವಧಿಗೆ ಅಧ್ಯಕ್ಷರಾಗಿದ್ದರು. ಈ ಸಲವು 2ನೇ ಬಾರಿಗೆ ತಿಂಥಣಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ವಾರ್ಡ್‌ ನಂ.3ರ ದಾದಲಾಪುರ ಸಾಮಾನ್ಯ ಕ್ಷೇತ್ರದಿಂದ ಸ್ಪರ್ಧಿಸಿ 79 ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದಾರೆ.

ಇದೇ ವಾರ್ಡ್‌ನ ಎಸ್‌ಟಿ ಕ್ಷೇತ್ರದಿಂದ ಸಂಜೀವಪ್ಪ ಅವರ ಅಕ್ಕ ಯಂಕಮ್ಮ ಮಲ್ಲಪ್ಪ ಕುರ್ಲಿ ಪ್ರಥಮ ಬಾರಿಗೆ ಸ್ಪರ್ಧಿಸಿ 103 ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದಾರೆ.