ಮೋದಿ ಸವಾಲು: ಕಾರ್ಯತಂತ್ರ ಬದಲು

ಈ ಪಕ್ಷಗಳು ತಮ್ಮ ಕೆಲವು ಅಭ್ಯರ್ಥಿಗಳನ್ನು ಬದಲಾಯಿಸಲಿವೆ. ಕೆಲವು ಹೊಸ ಮುಖಗಳನ್ನು ಇಲ್ಲಿ ಕಣಕ್ಕಿಳಿಸಲಿವೆ. ಹಾಗೆಯೇ ‘ಮೋದಿ ವಿರೋಧಿ ಮತಗಳು ವಿಭಜನೆಯಾಗದಂತೆ’ ಸಣ್ಣ ಪಕ್ಷಗಳ ಜೊತೆ ಹೊಂದಾಣಿಕೆ ಮಾಡಿಕೊಳ್ಳಲಿವೆ ಎಂದು ಈ ಪಕ್ಷಗಳು ಮೂಲಗಳು ಹೇಳಿವೆ.
 

ಉತ್ತರ ಪ್ರದೇಶದ ಪೂರ್ವ ಭಾಗದ ಇನ್ನೊಂದು ಮಹತ್ವದ ಕ್ಷೇತ್ರ ಅಜಂಗಡದಿಂದ ಎಸ್‌ಪಿ ಮುಖಂಡ ಮುಲಾಯಂ ಸಿಂಗ್‌ ಯಾದವ್‌ ಸ್ಪರ್ಧಿಸುವ ಸಾಧ್ಯತೆ ಈಗ ಬಹಳಷ್ಟು ಹೆಚ್ಚಾಗಿದೆ. ‘ಪೂರ್ವ ಭಾಗದಲ್ಲಿ ಮೋದಿ ಅವರಿಗೆ ಸ್ಪರ್ಧೆ ಒಡ್ಡಬಲ್ಲ ಪ್ರಮುಖ ನಾಯಕ ನಮಗೆ ಬೇಕಾಗಿದ್ದಾರೆ’ ಎಂದು ಎಸ್‌ಪಿಯ ಹಿರಿಯ ನಾಯಕರೊಬ್ಬರು ‘ಪ್ರಜಾವಾಣಿ’ಗೆ ಹೇಳಿದ್ದಾರೆ. 
 

ಎಸ್‌ಪಿಗೆ ಹೆಚ್ಚು ನಷ್ಟ: ವಾರಾಣಸಿಯಿಂದ ಮೋದಿ ಸ್ಪರ್ಧಿಸುತ್ತಿರುವುದು ಎಸ್‌ಪಿಯ ಚುನಾವಣಾ ಲೆಕ್ಕಾಚಾರದ ಮೇಲೆ ಪರಿಣಾಮ ಬೀರಬಹುದು ಎಂದು ಎಸ್‌ಪಿ ನಾಯಕರು ಅಭಿಪ್ರಾಯಪ­ಡು­ತ್ತಾರೆ. ‘ರಾಜ್ಯದ ಪೂರ್ವ ಭಾಗದಲ್ಲಿ ಬಿಜೆಪಿ ದುರ್ಬಲ­ವಾಗಿದ್ದರೆ ಎಸ್‌ಪಿ ಪ್ರಬಲವಾಗಿದೆ. ಈಗ ಈ ಭಾಗದಲ್ಲಿ ಬಿಜೆಪಿ ತನ್ನ ಸ್ಥಿತಿಯನ್ನು ಉತ್ತಮ­ಪಡಿಸಿ­ಕೊಳ್ಳುವ ಸಾಧ್ಯತೆ ಇದೆ. ಹಾಗಾದರೆ ಅದರಿಂದ ಎಸ್‌ಪಿಗೆ ನಷ್ಟ’ ಎಂದು ಎಸ್‌ಪಿ ನಾಯಕರೊಬ್ಬರು ಹೇಳಿದ್ದಾರೆ. 
 

ಮೋದಿ ಅವರನ್ನು ತಡೆಯಲು  ಚಿಕ್ಕ ಪಕ್ಷಗ­ಳೊಂದಿಗೆ ಹೊಂದಾಣಿಕೆಯ ಸಾಧ್ಯತೆಯನ್ನು ಪರಿ­ಶೀ­ಲಿಸ­ಲಾಗುವುದು ಎಂದು ನಾಯಕರು ತಿಳಿಸಿದ್ದಾರೆ. ಘೋಸಿ, ಸಲೇಂಪುರ್‌, ವಾರಾಣಸಿ, ಮಿರ್ಜಾಪುರ್‌ ಮತ್ತು ಇತರ ಕೆಲವು ಕ್ಷೇತ್ರಗಳ ಎಸ್‌ಪಿ ಅಭ್ಯರ್ಥಿಗಳ ಬದಲಾವಣೆ ಸಾಧ್ಯತೆಯೂ ಇದೆ. 
 

ಮುಲಾಯಂ ಮತ್ತು ಮೋದಿ ಅವರ ನಡುವೆ ನಿರಂತರವಾಗಿ ವಾಗ್ಯುದ್ಧ ನಡೆದಿದೆ. ಇದು ತಮ್ಮಿಬ್ಬರ ನಡುವೆಯೇ ಸ್ಪರ್ಧೆ ಇದೆ ಎಂಬುದನ್ನು ಜನರಿಗೆ ಮನದಟ್ಟು ಮಾಡುವ ತಂತ್ರ ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. 
 

ಬಿಎಸ್‌ಪಿಗೆ ಬ್ರಾಹ್ಮಣ ಮತದ ಆತಂಕ: ಬಿಎಸ್‌ಪಿ ಕೂಡ ತನ್ನ ಕಾರ್ಯತಂತ್ರವನ್ನು ಬದಲಾಯಿಸಿದೆ ಎನ್ನಲಾಗಿದೆ. ವಾರಾಣಸಿಗೆ ಮೋದಿ ಬಂದಿರುವುದ­ರಿಂದ ಬಿಎಸ್‌ಪಿಯ ಬ್ರಾಹ್ಮಣ ಮತದಾರರು ಬಿಜೆಪಿಯತ್ತ ವಾಲಬಹುದು ಎಂಬ ಆತಂಕ ಬಿಎಸ್‌ಪಿ­ಯನ್ನು ಕಾಡುತ್ತಿದೆ. ಮಾಯಾವತಿ ನೇತೃತ್ವದ ಬಿಎಸ್‌ಪಿಯ ಚುನಾವಣಾ ಯಶಸ್ಸಿಗೆ ಅದರ ಪರವಾಗಿರುವ ಬ್ರಾಹ್ಮಣ–ದಲಿತ ಸಮೀ­ಕರಣವೇ ಕಾರಣ. ಈ ಬಾರಿಯೂ ಬಿಎಸ್‌ಪಿ 23 ಬ್ರಾಹ್ಮಣ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದೆ. 
 

ಕಾಂಗ್ರೆಸ್‌ ಹೊಸ ಮುಖ: ಕಾಂಗ್ರೆಸ್‌ ಕೂಡ ರಣ­ತಂತ್ರದಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಲು ಉದ್ದೇಶಿಸಿದೆ. ವಾರಾಣಸಿಯಲ್ಲಿ ಮೋದಿ ಅವರ ವಿರುದ್ಧ ಹೊಸ ಮುಖವೊಂದನ್ನು ಕಣಕ್ಕಿಳಿಸಲು ಕಾಂಗ್ರೆಸ್‌ ಚಿಂತಿಸುತ್ತಿದೆ. ಸ್ಥಳೀಯರಾದ ರಾಜೇಶ್‌ ಮಿಶ್ರಾ ಅಥವಾ ಅಜಯ್‌ ರಾಯ್‌ ಅವರ­ಲ್ಲೊ­ಬ್ಬರಿಗೆ ಟಿಕೆಟ್‌ ನೀಡಲು ಕಾಂಗ್ರೆಸ್‌ ಯೋಜಿಸಿತ್ತು. ಈಗ ಅದು ಬದಲಾಗಬಹುದು ಎನ್ನಲಾಗಿದೆ. 

ಕೇಜ್ರಿವಾಲ್‌ ಸ್ಪರ್ಧೆ ಬೆದರಿಕೆಯಲ್ಲ: ಬಿಜೆಪಿ